ХОЛИМБЕГДА ШУНДАЙ ОИЛА БОР

Деҳқон хўжаликлари ва томорқа ер участкаларида ҳосилдор, юқори даромад берадиган қишлоқ хўжалик экинларини жойлаштириш орқали ички истеъмол ва экспорт учун маҳсулот етиштиришни кўпайтириш – қишлоқ аҳолиси моддий манфаатдорлигини ошириб, турмуши сифатини яхшиламоқда.
Агар туманимиз овулларини кезсангиз, бири-биридан обод, замонавий таъмирланган ва ораста ҳовлиларга кўзингиз тушади. Йўл бўйларига, ҳовлилар атрофларига экилган анвойи  гуллар, мевали, маназарали дарахтлар ҳудудлар кўркига кўрк қўшиб турибди.
Холимбег овулидаги таълим фахрийси Адамбой Шомуродов хонадонига ташриф буюрган киши томорқасида, ҳовлиси атрофида ҳалол меҳнатларидан бунёдга келган боғни, турли экинларни кўриб, қойил қолиши тайин. Айни пайтда 61 ёшни қаршилаётган Адамбой Шомуродов узоқ йиллар мактабда ўқувчиларга  меҳнат таълимидан дарс берди. Аёли Янгилжон Вафоева эса овулдаги мактабгача таълим ташкилотида кичкинтой  болажонларга бошланғич мусиқа таълимини ўргатди. Педагоглар ўзларининг мутахассислиги бўйича иши уч нафар қиз, икки нафар ўғилларининг тарбиясидан ортиб, ҳовлиси атрофини, томорқасини ҳам даромад манбаига айлантирди. Фарзандлари кўмакчи бўлиб қолишгач, 1,5 гектар боғни ҳам  ижарага олиб, мўл ҳосил етиштиришмоқда.
Олинган даромадлар яхшиликка сарфланаяпти. Катта ўғил Қаҳрамон 17-сонли мактабда хўжалик ишлари мудири бўлиб ишлайди. Роҳатой, Барчиной, Баҳодир, Нафосатлар Нукус давлат давлат педагогика институтида контракт асосида таҳсил олиб, турли мактабларда ишлашаяпти.
Оилада ўғиллар, келинлар ва 6 нафар невараларнинг катталари ҳам Адамбой Шомуродов, Янгилжон Вафоеваларнинг ҳақиқий кўмакчилари.
Уларнинг томорқасида экинларнинг дид билан жойлаштирилгани, барча экинларнинг баравж ўсаётгани қаровсиз бир қарич ер ҳам йўқлиги киши диққатини тортади. Адамбой Шомуродовнинг айтишича, деҳқончиликда ернинг тилини тушуниш, ишнинг кўзини билиш жуда муҳим. Балки бунинг уддасидан чиққани учундир, уларнинг томорқасида етилган картошка, сабзи аллақачон истеъмолга яраб, сотишга ҳам ортаяпти. Пиёз, бодрингларни бозорга чиқаришганига эса бир ойча бўлди.
Бир ярим гектарлик боғда узум, олма, ўрик, олча, нашвати, анор, гилос каби ўндан ортиқ турдаги мевали дарахтларнинг ҳам эртаги, ҳам кечки навлари бор. Ҳозир улар ўрик, олча, эртаги олмаларини бозорда сотишаяпти. Улар тили билан айтганда, боғ – нақ мўмай даромад кони. Фақат – меҳнатдан қочмаслик керак.
Ҳа, инсон жамики гўзалликларнинг, неъматларнинг бунёдкори. Ана шундай фидойи меҳнат инсонни улуғлайди, қадр-қимматини оширади, ҳаётини безайди.
Бу ҳамжиҳат, оғизбирчиликли оила ҳам ҳалол меҳнатдан обод, фаровон. Иккита замонавий енгил автомашина, 3 тонна юкка мўлжалланган “Мерседес” русумли юк машинаси, шинам икки ҳовли, озиқ-овқат ва ноозиқ-овқат маҳсулотлари сотиладиган дўконлари бор.
Улар деҳқончиликдан ташқари, парранда, қорамол боқишдан ҳам анча даромад топишади, уйларида тўрт йилдан бери ўстираётган хонаки лимонларининг бу йилги меваси анча салмоқли.
Уларнинг хонадонида бўлиб, буларнинг ҳаммасини кўздан кечирган кишининг кўнглига “барига қандай улгуришар экан”, деган ўй келиши шубҳасиз. Бунга оила аъзоларида жавоб тайёр: “кўнглида истак, иштиёқ бўлса, инсон кўп ишларга қодир”.
Тилагимиз: юртимизда ана шундай оилалар кўпаяверсин.

Ойгул РАЖАБОВА.