XOLIMBEGDA ShUNDAY OILA BOR

Dehqon xoʻjaliklari va tomorqa yer uchastkalarida hosildor, yuqori daromad beradigan qishloq xoʻjalik ekinlarini joylashtirish orqali ichki isteʼmol va eksport uchun mahsulot yetishtirishni koʻpaytirish – qishloq aholisi moddiy manfaatdorligini oshirib, turmushi sifatini yaxshilamoqda.
Agar tumanimiz ovullarini kezsangiz, biri-biridan obod, zamonaviy taʼmirlangan va orasta hovlilarga koʻzingiz tushadi. Yoʻl boʻylariga, hovlilar atroflariga ekilgan anvoyi  gullar, mevali, manazarali daraxtlar hududlar koʻrkiga koʻrk qoʻshib turibdi.
Xolimbeg ovulidagi taʼlim faxriysi Adamboy Shomurodov xonadoniga tashrif buyurgan kishi tomorqasida, hovlisi atrofida halol mehnatlaridan bunyodga kelgan bogʻni, turli ekinlarni koʻrib, qoyil qolishi tayin. Ayni paytda 61 yoshni qarshilayotgan Adamboy Shomurodov uzoq yillar maktabda oʻquvchilarga  mehnat taʼlimidan dars berdi. Ayoli Yangiljon Vafoyeva esa ovuldagi maktabgacha taʼlim tashkilotida kichkintoy  bolajonlarga boshlangʻich musiqa taʼlimini oʻrgatdi. Pedagoglar oʻzlarining mutaxassisligi boʻyicha ishi uch nafar qiz, ikki nafar oʻgʻillarining tarbiyasidan ortib, hovlisi atrofini, tomorqasini ham daromad manbaiga aylantirdi. Farzandlari koʻmakchi boʻlib qolishgach, 1,5 gektar bogʻni ham  ijaraga olib, moʻl hosil yetishtirishmoqda.
Olingan daromadlar yaxshilikka sarflanayapti. Katta oʻgʻil Qahramon 17-sonli maktabda xoʻjalik ishlari mudiri boʻlib ishlaydi. Rohatoy, Barchinoy, Bahodir, Nafosatlar Nukus davlat davlat pedagogika institutida kontrakt asosida tahsil olib, turli maktablarda ishlashayapti.
Oilada oʻgʻillar, kelinlar va 6 nafar nevaralarning kattalari ham Adamboy Shomurodov, Yangiljon Vafoyevalarning haqiqiy koʻmakchilari.
Ularning tomorqasida ekinlarning did bilan joylashtirilgani, barcha ekinlarning baravj oʻsayotgani qarovsiz bir qarich yer ham yoʻqligi kishi diqqatini tortadi. Adamboy Shomurodovning aytishicha, dehqonchilikda yerning tilini tushunish, ishning koʻzini bilish juda muhim. Balki buning uddasidan chiqqani uchundir, ularning tomorqasida yetilgan kartoshka, sabzi allaqachon isteʼmolga yarab, sotishga ham ortayapti. Piyoz, bodringlarni bozorga chiqarishganiga esa bir oycha boʻldi.
Bir yarim gektarlik bogʻda uzum, olma, oʻrik, olcha, nashvati, anor, gilos kabi oʻndan ortiq turdagi mevali daraxtlarning ham ertagi, ham kechki navlari bor. Hozir ular oʻrik, olcha, ertagi olmalarini bozorda sotishayapti. Ular tili bilan aytganda, bogʻ – naq moʻmay daromad koni. Faqat – mehnatdan qochmaslik kerak.
Ha, inson jamiki goʻzalliklarning, neʼmatlarning bunyodkori. Ana shunday fidoyi mehnat insonni ulugʻlaydi, qadr-qimmatini oshiradi, hayotini bezaydi.
Bu hamjihat, ogʻizbirchilikli oila ham halol mehnatdan obod, farovon. Ikkita zamonaviy yengil avtomashina, 3 tonna yukka moʻljallangan “Mersedes” rusumli yuk mashinasi, shinam ikki hovli, oziq-ovqat va nooziq-ovqat mahsulotlari sotiladigan doʻkonlari bor.
Ular dehqonchilikdan tashqari, parranda, qoramol boqishdan ham ancha daromad topishadi, uylarida toʻrt yildan beri oʻstirayotgan xonaki limonlarining bu yilgi mevasi ancha salmoqli.
Ularning xonadonida boʻlib, bularning hammasini koʻzdan kechirgan kishining koʻngliga “bariga qanday ulgurishar ekan”, degan oʻy kelishi shubhasiz. Bunga oila aʼzolarida javob tayyor: “koʻnglida istak, ishtiyoq boʻlsa, inson koʻp ishlarga qodir”.
Tilagimiz: yurtimizda ana shunday oilalar koʻpayaversin.

Oygul RAJABOVA.