Doʻrman ovulidagi davlat ahamiyatiga ega koʻprik mukammal taʼmirlanib, foydalanishga topshirildi

Keyingi yillarda Davlatimiz rahbarining tashabbusi bilan shahar va qishloqlarimizning koʻrki tamomila oʻzgacha chiroy ochib bormoqda. Xususan, soʻnggi yillarda zamonaviy va goʻzal inshootlar, sanoat korxonalari, ravon yoʻllar va koʻpriklar, shifoxona va maktablar bunyod etilmoqda. Koʻplab koʻpriklar taʼmirlanib, foydalanishga topshiralayotgani natijasida fuqarolarning turmush darajasi yaxshilanib, odamlar hayotdan rozi boʻlib yashashlarida muhim omil boʻlmoqda. Mamlakatimizda olib borilayotgan keng koʻlamli islohotlar natijasi olis-olis hududlarda ham oʻz natijasini koʻrsatmoqda.

Qoraqalpogʻiston Respublikasi Joʻqorgʻi Kengesining 2023-yil 22-iyun kungi Qaroriga asosan Amudaryo tumanining olis Doʻrman ovuli hududidan oʻtuvchi 4k45-sonli koʻprik mukammal taʼmirlanib, foydalanishga topshirildi.

Qarorga muvofiq davlat ahamiyatiga molik boʻlgan koʻprikning qurilishiga jami 4,3 mlrd. soʻm mablagʻ ajratilgan.

Koʻprikning ishga tushirilishiga bagʻishlangan tadbirda tuman hokimi Sobir Xoʻjametov, sektorlar rahbarlari, tuman hokimining qurilish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha oʻrinbosari Bahodir Ernazarov, tuman hokimining qishloq va suv xoʻjaligi masalalari boʻyicha oʻrinbosari Anvar Yoʻldoshev, faxriylar, ovul fuqarolar yigʻini masʼullari hamda koʻchaboshchilar ishtirok etdilar.

Yurtimizda yangi yil shodiyonalari kezib yurgan paytda koʻprikning taʼmirlanib, foydalanishga topshirilgani doʻrmanliklar uchun quvonarli voqea boʻldi.

Qayta rekonstruktsiya ishlaridan soʻng mazkur koʻprikning uzunligi 57 metr, umumiy kengligi 10 metrni tashkil qildi. Endi transport qatnovi uchun, piyodalar harakati uchun barpo etilgan yoʻlaklardan bemalol foydalanish mumkin. 57 metrdan iborat boʻlgan koʻprik mustahkam va xavfsiz. Ikki tomonida himoya devorlari va gʻildirak qaytargichlar ham qurilgan. Ikki tasmali avtomobil yoʻlida bir kunda 11 mingdan ortiq transport oʻtish imkoniyati mavjudligi yoʻlovchilar uchun yanada qulaylik yaratadi.

Koʻprikning ishga tushirilishiga bagʻishlangan tadbirda tuman hokimi Sobir Xoʻjametov qayta rekonstruktsiya qilingan koʻprik ovul va mahallalar ahlini bir-biriga bogʻlashini aytib oʻtdi.

Marosimda soʻz olgan masʼullar, ovul faollari har bir inson bugun kechagidan, ertaga bugungidan yaxshi yashashni istashini, tumanimiz boʻylab amalga oshirilayotgan keng qamrovli ishlar odamlarning turmush farovonligini yaxshilashga qaratilayotgani bilan ahamiyatli ekanligini taʼkidlab oʻtdilar.

Bugun yurtimizning qay bir hududiga bormang ulkan bunyodkorlik ishlariga guvoh boʻlasiz. Ayniqsa, yoʻlsozlar hamda quruvchilarning qoʻli-qoʻliga tegmaydi, yoʻl, koʻprik qurishdek savobli ishlar yoʻlida gʻayrat bilan mehnat qilishmoqda.

Bir paytlar qishloqlardagi yogʻoch koʻpriklar muammosi aholining eʼtiroziga sabab boʻlgani rost. Bugun esa boshqa masalalar qatorida ovul va mahallalarni bogʻlaydigan koʻpriklarning taʼmirlanishi aholiga qulaylik yaratmoqda.

Mukammal taʼmirlanib, foydalanishga topshirilgan mazkur koʻprik uzoq yillar mobaynida ezgu maqsadlar yoʻlida xalqimizga xizmat qiladi, albatta. Koʻprikning ishga tushirilishi natijasida hududlar farovonlashib, aholining turmush darajasi yanada yaxshilanadi. Tadbirda faol quruvchi-ustalarga tashakkurnomalar va esdalik sovgʻalari topshirildi.

Tuman hokimligi Axborot xizmati