Nodavlat notijorat tashkilotlari uchun "Loyiha ishlab chiqish va xalqaro grant yozish" mavzusida seminar oʻtkazildi

Fuqarolik jamiyati institutlarining barqaror rivojlanishini taʼminlash va ularning ijtimoiy hayotdagi faol ishtirokini qoʻllab-quvvatlash mamlakatimizda olib borilayotgan keng koʻlamli islohotlarning eng muhim yoʻnalishlaridan biri sanaladi. Bugungi kunda nodavlat notijorat tashkilotlarining aholi muammolarini oʻrganish, ijtimoiy loyihalarni amalga oshirish hamda davlat va jamoatchilik oʻrtasida samarali muloqot oʻrnatishdagi oʻrni tobora ortib bormoqda. Bunday sharoitda ushbu tashkilotlar faoliyatini zamonaviy yondashuvlar asosida tashkil etish, xalqaro donorlar mablagʻlarini jalb qilish orqali moliyaviy imkoniyatlarni kengaytirish va sifatli ijtimoiy loyihalarni ishlab chiqish eng dolzarb vazifalar sirasiga kiradi. Aynan shu maqsadlarni oʻzida mujassam etgan holda 1–2-iyul kunlari Nukus shahrida joylashgan Nodavlat notijorat tashkilotlari uyida "Loyiha ishlab chiqish va xalqaro grant yozish" mavzusida 2 kunlik amaliy seminar-trening boʻlib oʻtdi.

Oʻzbekiston Nodavlat notijorat tashkilotlari milliy assotsiatsiyasining Qoraqalpogʻiston Respublikasi hududiy boʻlinmasi tomonidan tashkil etilgan mazkur tadbir mahalliy nodavlat tashkilotlari rahbarlari, mutaxassislari va fuqarolik jamiyati vakillari uchun muhim tajriba maydoniga aylandi.

Tadbirni assotsiatsiyaning hududiy boʻlinmasi boshligʻi Quoʻatbay Karimxodjayev kirish soʻzi bilan ochib berdi. Ijtimoiy loyihalar va institutsional rivojlanish boʻyicha malakali mutaxassis Gulmira Axmetova xalqaro donor tashkilotlari faoliyati, grant dasturlari turlari hamda arizalarni baholash mezonlari haqidagi muhim maʼlumotlarni yigʻilganlarga taqdim etdi. Hozirgi vaqtda xalqaro donorlar tomonidan atrof-muhitni muhofaza qilish, inklyuziv rivojlanish, taʼlim, sogʻliqni saqlash, gender tengligi, ijtimoiy himoya, inson huquqlari, raqamli texnologiyalar, tadbirkorlik va bandlik kabi koʻplab sohalar boʻyicha grantlar eʼlon qilinmoqda. Ushbu imkoniyatlardan unumli foydalanish maqsadida qatnashchilar loyiha gʻoyasini shakllantirish, muammoni chuqur tahlil qilish, manfaatdor tomonlarni aniqlash va maqsadli guruhlarni toʻgʻri belgilash usullarini oʻrgandilar.

Seminarning amaliy ahamiyati shundaki, ishtirokchilar nafaqat nazariy bilimlar oldi, balki grant arizasining asosiy boʻlimlarini, jumladan, tashkilot haqida maʼlumot, loyihaning dolzarbligi, maqsad va vazifalar, kutilayotgan natijalar, monitoring, xavflarni boshqarish hamda loyihaning barqarorligini taʼminlash qismlarini toʻldirish tartibini amaliyotda sinab koʻrdilar.

Alohida eʼtibor moliyaviy rejalashtirish va loyiha byudjetini xalqaro standartlar asosida shakllantirishga qaratildi. Mutaxassislar tomonidan xarajatlar smetasini tuzish, moliyaviy hisob-kitoblarni amalga oshirish va baholash jarayonida eng koʻp yoʻl qoʻyiladigan xatolarni bartaraf etish usullari aniq misollar yordamida tushuntirildi. 2 kun davom etgan mashgʻulotlarning oʻziga xos xususiyati shunda boʻldiki, qatnashchilar shunchaki tayyor shablonlar bilan ishlamasdan, balki oʻz tashkilotlarining real ehtiyojlaridan kelib chiqqan holda aniq grant loyihalarini ishlab chiqdilar. Yakuniy bosqichda ushbu loyihalar taqdimot qilinib, ekspertlarning xulosa va tavsiyalari olindi.

Mazkur oʻquv dasturi fuqarolik jamiyati institutlarining institutsional salohiyatini oshirish, ijtimoiy tashabbuslarni qoʻllab-quvvatlash va hududlarda sifatli loyihalar sonini koʻpaytirishga xizmat qilishi shubhasiz. Shu bilan birga, bunday tadbirlar turli tashkilotlar oʻrtasida tajriba almashish va qoʻshma loyihalarni amalga oshirish uchun mustahkam poydevor yaratadi.

Oʻzbekiston Nodavlat notijorat tashkilotlari milliy assotsiatsiyasining Qoraqalpogʻiston Respublikasi hududiy boʻlinmasi kelgusida ham bu kabi amaliy seminarlar va maslahat tadbirlarini muntazam ravishda tashkil etishni rejalashtirgan. Bu esa oʻz navbatida, nodavlat notijorat tashkilotlarining xalqaro grant mablagʻlarini jalb qilish imkoniyatlarini kengaytirib, jamiyatimizning barqaror rivojlanishiga oʻzining munosib hissasini qoʻshadi.