Нодавлат нотижорат ташкилотлари учун "Лойиҳа ишлаб чиқиш ва халқаро грант ёзиш" мавзусида семинар ўтказилди
Фуқаролик жамияти институтларининг барқарор ривожланишини таъминлаш ва уларнинг ижтимоий ҳаётдаги фаол иштирокини қўллаб-қувватлаш мамлакатимизда олиб борилаётган кенг кўламли ислоҳотларнинг энг муҳим йўналишларидан бири саналади. Бугунги кунда нодавлат нотижорат ташкилотларининг аҳоли муаммоларини ўрганиш, ижтимоий лойиҳаларни амалга ошириш ҳамда давлат ва жамоатчилик ўртасида самарали мулоқот ўрнатишдаги ўрни тобора ортиб бормоқда. Бундай шароитда ушбу ташкилотлар фаолиятини замонавий ёндашувлар асосида ташкил этиш, халқаро донорлар маблағларини жалб қилиш орқали молиявий имкониятларни кенгайтириш ва сифатли ижтимоий лойиҳаларни ишлаб чиқиш энг долзарб вазифалар сирасига киради. Айнан шу мақсадларни ўзида мужассам этган ҳолда 1–2 июль кунлари Нукус шаҳрида жойлашган Нодавлат нотижорат ташкилотлари уйида "Лойиҳа ишлаб чиқиш ва халқаро грант ёзиш" мавзусида 2 кунлик амалий семинар-тренинг бўлиб ўтди.
Ўзбекистон Нодавлат нотижорат ташкилотлари миллий ассоциациясининг Қорақалпоғистон Республикаси ҳудудий бўлинмаси томонидан ташкил этилган мазкур тадбир маҳаллий нодавлат ташкилотлари раҳбарлари, мутахассислари ва фуқаролик жамияти вакиллари учун муҳим тажриба майдонига айланди.
Тадбирни ассоциациянинг ҳудудий бўлинмаси бошлиғи Қуўатбай Каримходжаев кириш сўзи билан очиб берди. Ижтимоий лойиҳалар ва институционал ривожланиш бўйича малакали мутахассис Гулмира Ахметова халқаро донор ташкилотлари фаолияти, грант дастурлари турлари ҳамда аризаларни баҳолаш мезонлари ҳақидаги муҳим маълумотларни йиғилганларга тақдим этди. Ҳозирги вақтда халқаро донорлар томонидан атроф-муҳитни муҳофаза қилиш, инклюзив ривожланиш, таълим, соғлиқни сақлаш, гендер тенглиги, ижтимоий ҳимоя, инсон ҳуқуқлари, рақамли технологиялар, тадбиркорлик ва бандлик каби кўплаб соҳалар бўйича грантлар эълон қилинмоқда. Ушбу имкониятлардан унумли фойдаланиш мақсадида қатнашчилар лойиҳа ғоясини шакллантириш, муаммони чуқур таҳлил қилиш, манфаатдор томонларни аниқлаш ва мақсадли гуруҳларни тўғри белгилаш усулларини ўргандилар.
Семинарнинг амалий аҳамияти шундаки, иштирокчилар нафақат назарий билимлар олди, балки грант аризасининг асосий бўлимларини, жумладан, ташкилот ҳақида маълумот, лойиҳанинг долзарблиги, мақсад ва вазифалар, кутилаётган натижалар, мониторинг, хавфларни бошқариш ҳамда лойиҳанинг барқарорлигини таъминлаш қисмларини тўлдириш тартибини амалиётда синаб кўрдилар.
Алоҳида эътибор молиявий режалаштириш ва лойиҳа бюджетини халқаро стандартлар асосида шакллантиришга қаратилди. Мутахассислар томонидан харажатлар сметасини тузиш, молиявий ҳисоб-китобларни амалга ошириш ва баҳолаш жараёнида энг кўп йўл қўйиладиган хатоларни бартараф этиш усуллари аниқ мисоллар ёрдамида тушунтирилди. 2 кун давом этган машғулотларнинг ўзига хос хусусияти шунда бўлдики, қатнашчилар шунчаки тайёр шаблонлар билан ишламасдан, балки ўз ташкилотларининг реал эҳтиёжларидан келиб чиққан ҳолда аниқ грант лойиҳаларини ишлаб чиқдилар. Якуний босқичда ушбу лойиҳалар тақдимот қилиниб, экспертларнинг хулоса ва тавсиялари олинди.
Мазкур ўқув дастури фуқаролик жамияти институтларининг институционал салоҳиятини ошириш, ижтимоий ташаббусларни қўллаб-қувватлаш ва ҳудудларда сифатли лойиҳалар сонини кўпайтиришга хизмат қилиши шубҳасиз. Шу билан бирга, бундай тадбирлар турли ташкилотлар ўртасида тажриба алмашиш ва қўшма лойиҳаларни амалга ошириш учун мустаҳкам пойдевор яратади.
Ўзбекистон Нодавлат нотижорат ташкилотлари миллий ассоциациясининг Қорақалпоғистон Республикаси ҳудудий бўлинмаси келгусида ҳам бу каби амалий семинарлар ва маслаҳат тадбирларини мунтазам равишда ташкил этишни режалаштирган. Бу эса ўз навбатида, нодавлат нотижорат ташкилотларининг халқаро грант маблағларини жалб қилиш имкониятларини кенгайтириб, жамиятимизнинг барқарор ривожланишига ўзининг муносиб ҳиссасини қўшади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
