«Oʻzbekiston Respublikasi Mustaqilligining 35 yilligi» esdalik nishoni oʻz egalariga tantanali ravishda topshirildi

Mustaqillik — millatning oʻzligini, shaʼni va qadr-qimmatini namoyon etadigan, xalqning oʻz taqdirini oʻzi belgilashi, ozod va farovon hayot qurishi uchun mustahkam zamin yaratadigan buyuk neʼmatdir. Oʻtgan 35-yil davomida yurtimiz hayotining barcha jabhalarida ulkan oʻzgarish va yangilanishlar amalga oshirildi. Eng muhimi, bu jarayonlarda inson qadri, xalq manfaatlari va Vatan taraqqiyoti ustuvor maqsad sifatida namoyon boʻldi.

Bugun Oʻzbekistonning dunyo hamjamiyatidagi nufuzi tobora ortib, mamlakatimizda tinchlik va osoyishtalik, bunyodkorlik va taraqqiyot muhiti mustahkamlanib borayotgan bir paytda, mustaqillikning qadrini chuqur anglash, uning neʼmatlarini asrab-avaylash va kelajak avlodlarga munosib meros qoldirish har bir yurtdoshimizning muqaddas burchidir.

Ulugʻ sana — Oʻzbekiston Respublikasi davlat mustaqilligining 35 yilligi arafasida Amudaryo tumani hokimligining majlislar zalida el-yurt ravnaqi, xalq farovonligi va hudud taraqqiyotiga munosib hissa qoʻshib kelayotgan bir guruh yurtdoshlarimizni taqdirlashga bagʻishlangan tantanali marosim boʻlib oʻtdi.

Tadbir koʻtarinki ruhda, samimiy va bayramona kayfiyatda oʻtdi. Unda uzoq yillar davomida turli sohalarda samarali mehnat qilib, oʻzining fidoyiligi, tashabbuskorligi, masʼuliyatli yondashuvi va jamoatchilik hayotidagi faolligi bilan el-yurt hurmatiga sazovor boʻlgan yurtdoshlarimizning xizmatlari munosib eʼtirof etildi.

Oʻzbekiston Respublikasi Prezidentining tegishli Farmoniga muvofiq, mamlakatimiz mustaqilligining 35 yilligi munosabati bilan taʼsis etilgan “Oʻzbekiston Respublikasi mustaqilligining 35 yilligi” esdalik nishoni bir guruh yurtdoshlarimizga tantanali ravishda topshirildi.

Taqdirlash marosimida Amudaryo tumani hokimi Sobir Xoʻjametov, mehnat faxriylari va nuroniylar soʻzga chiqib, mukofotlangan yurtdoshlarimizni mustaqillikning 35 yilligi hamda yuksak davlat mukofoti bilan samimiy muborakbod etdilar.

Soʻzga chiqqanlar taʼkidlaganidek, bugungi tinch va farovon hayot, obod mahallalar, zamonaviy infratuzilma, taʼlim va tibbiyot sohalaridagi yangilanishlar, ishlab chiqarish va tadbirkorlik uchun yaratilayotgan imkoniyatlar, eng avvalo, mustaqillik bergan beqiyos imkoniyatlarning amaliy samarasidir.

Tadbirda yurtimizda mustaqillik yillarida amalga oshirilgan keng koʻlamli islohotlar, bunyodkorlik ishlari va ijtimoiy-iqtisodiy taraqqiyot borasida erishilgan natijalar haqida ham soʻz yuritildi.

Taʼkidlanganidek, istiqlol yillarida mamlakatimiz hayotining barcha jabhalarida tub oʻzgarishlar yuz berdi. Yangi korxonalar, zamonaviy taʼlim muassasalari, tibbiyot maskanlari, yoʻl va infratuzilma obʼektlari barpo etildi. Aholining munosib hayot kechirishi, yoshlarning bilim olishi va kasb-hunar egallashi, tadbirkorlik bilan shugʻullanishi uchun keng imkoniyatlar yaratildi.

Soʻnggi yillarda inson manfaatlarini taʼminlash, mahallalarni obod qilish, aholi bandligi va daromadlarini oshirish, ijtimoiy himoyaga muhtoj qatlamlarni qoʻllab-quvvatlash, yoshlar va xotin-qizlarning jamiyatdagi faolligini oshirish borasidagi ishlar yangi bosqichga koʻtarildi.

Bu ulkan jarayonlarda har bir hudud, har bir mahalla, har bir jamoaning oʻziga xos hissasi bor. Amudaryo tumani aholisi ham mamlakatimiz taraqqiyotiga munosib hissa qoʻshib, bunyodkorlik va obodonlashtirish, ishlab chiqarish, qishloq xoʻjaligi, tadbirkorlik, taʼlim, tibbiyot, madaniyat va boshqa sohalarda samarali mehnat qilib kelmoqda.

Bugun yuksak mukofot bilan taqdirlangan yurtdoshlarimizning har biri oʻz faoliyat sohasi, hayotiy tajribasi va mehnat yoʻli bilan mamlakatimiz ravnaqiga munosib hissa qoʻshib kelmoqda. Ularning mehnati — Vatanga sadoqatning, kasbga masʼuliyatning va xalq manfaatlariga xizmat qilishning yorqin namunasidir.

Taqdirlash marosimi yana bir yuksak haqiqatni namoyon etdi: Vatan ravnaqi va xalq farovonligi yoʻlida sidqidildan qilingan mehnat hech qachon eʼtiborsiz qolmaydi.

Mustaqillikning 35 yilligi munosabati bilan oʻtkazilgan mazkur tadbir qalblarda Vatanga daxldorlik, yurt kelajagiga ishonch tuygʻularini yanada mustahkamladi.

Zero, mustaqillik — faqat tarixiy sana emas, balki har kuni asrab-avaylanadigan buyuk qadriyat, tinchlik va bunyodkorlik, birlik va hamjihatlik, taraqqiyot va farovonlik sari chorlovchi ulkan masʼuliyatdir.

Mustaqilligimiz abadiy, osmonimiz musaffo, yurtimiz tinch va xalqimiz farovon boʻlsin!

Oʻzbekistonning yorqin kelajagi yoʻlida fidokorona mehnat qilayotgan barcha yurtdoshlarimizga kuch-gʻayrat, mustahkam sogʻlik va yangi zafarlar tilaymiz!

Charos Arslonova, tuman hokimligining Axborot xizmati rahbari.