Дўрман овулидаги давлат аҳамиятига эга кўприк мукаммал таъмирланиб, фойдаланишга топширилди
Кейинги йилларда Давлатимиз раҳбарининг ташаббуси билан шаҳар ва қишлоқларимизнинг кўрки тамомила ўзгача чирой очиб бормоқда. Хусусан, сўнгги йилларда замонавий ва гўзал иншоотлар, саноат корхоналари, равон йўллар ва кўприклар, шифохона ва мактаблар бунёд этилмоқда. Кўплаб кўприклар таъмирланиб, фойдаланишга топширалаётгани натижасида фуқароларнинг турмуш даражаси яхшиланиб, одамлар ҳаётдан рози бўлиб яшашларида муҳим омил бўлмоқда. Мамлакатимизда олиб борилаётган кенг кўламли ислоҳотлар натижаси олис-олис ҳудудларда ҳам ўз натижасини кўрсатмоқда.
Қорақалпоғистон Республикаси Жўқорғи Кенгесининг 2023 йил 22 июнь кунги Қарорига асосан Амударё туманининг олис Дўрман овули ҳудудидан ўтувчи 4к45-сонли кўприк мукаммал таъмирланиб, фойдаланишга топширилди.
Қарорга мувофиқ давлат аҳамиятига молик бўлган кўприкнинг қурилишига жами 4,3 млрд. сўм маблағ ажратилган.
Кўприкнинг ишга туширилишига бағишланган тадбирда туман ҳокими Собир Хўжаметов, секторлар раҳбарлари, туман ҳокимининг қурилиш, коммуникациялар, коммунал хўжалик, экология ва кўкаламзорлаштириш масалалари бўйича ўринбосари Баҳодир Эрназаров, туман ҳокимининг қишлоқ ва сув хўжалиги масалалари бўйича ўринбосари Анвар Йўлдошев, фахрийлар, овул фуқаролар йиғини масъуллари ҳамда кўчабошчилар иштирок этдилар.
Юртимизда янги йил шодиёналари кезиб юрган пайтда кўприкнинг таъмирланиб, фойдаланишга топширилгани дўрманликлар учун қувонарли воқеа бўлди.
Қайта реконструкция ишларидан сўнг мазкур кўприкнинг узунлиги 57 метр, умумий кенглиги 10 метрни ташкил қилди. Энди транспорт қатнови учун, пиёдалар ҳаракати учун барпо этилган йўлаклардан бемалол фойдаланиш мумкин. 57 метрдан иборат бўлган кўприк мустаҳкам ва хавфсиз. Икки томонида ҳимоя деворлари ва ғилдирак қайтаргичлар ҳам қурилган. Икки тасмали автомобиль йўлида бир кунда 11 мингдан ортиқ транспорт ўтиш имконияти мавжудлиги йўловчилар учун янада қулайлик яратади.
Кўприкнинг ишга туширилишига бағишланган тадбирда туман ҳокими Собир Хўжаметов қайта реконструкция қилинган кўприк овул ва маҳаллалар аҳлини бир-бирига боғлашини айтиб ўтди.
Маросимда сўз олган масъуллар, овул фаоллари ҳар бир инсон бугун кечагидан, эртага бугунгидан яхши яшашни исташини, туманимиз бўйлаб амалга оширилаётган кенг қамровли ишлар одамларнинг турмуш фаровонлигини яхшилашга қаратилаётгани билан аҳамиятли эканлигини таъкидлаб ўтдилар.
Бугун юртимизнинг қай бир ҳудудига борманг улкан бунёдкорлик ишларига гувоҳ бўласиз. Айниқса, йўлсозлар ҳамда қурувчиларнинг қўли-қўлига тегмайди, йўл, кўприк қуришдек савобли ишлар йўлида ғайрат билан меҳнат қилишмоқда.
Бир пайтлар қишлоқлардаги ёғоч кўприклар муаммоси аҳолининг эътирозига сабаб бўлгани рост. Бугун эса бошқа масалалар қаторида овул ва маҳаллаларни боғлайдиган кўприкларнинг таъмирланиши аҳолига қулайлик яратмоқда.
Мукаммал таъмирланиб, фойдаланишга топширилган мазкур кўприк узоқ йиллар мобайнида эзгу мақсадлар йўлида халқимизга хизмат қилади, албатта. Кўприкнинг ишга туширилиши натижасида ҳудудлар фаровонлашиб, аҳолининг турмуш даражаси янада яхшиланади. Тадбирда фаол қурувчи-усталарга ташаккурномалар ва эсдалик совғалари топширилди.
Туман ҳокимлиги Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
