ЁР-ЁР САДОСИДА ҲИКМАТ КЎП

Ота-боболаримиздан қолган удумларимиздан бири – ёр-ёр садоси билан бошланадиган тўйларимиздир. Ҳозирда негадир ёр-ёрлар кам айтилади, яъни унутилиб бормоқда. Зеро, қиз узатиш маросими ёр-ёр садолари билан гўзалдир.

Аввал бошда худони ёд этайлик, ёр-ёр,

Пайғамбарнинг руҳини шод этайлик, ёр-ёр.

Пайғамбарнинг қизини Али олган, ёр-ёр,

Қиз олишиб, қиз бермоқ шундан қолган, ёр-ёр.

Шундай экан, ҳозир ҳам ёр-ёр садоси остида уйингизга келин кириб келса, қандай яхши. Ёр-ёрнинг ҳар бир сатрида ёшларимизга айтилган ўгит-насиҳат ва тарбиявий таъсир бор.

Пайғамбарнинг қизидай бахтинг бўлгай, ёр-ёр,

Сулаймоннинг тахтидай тахтинг бўлгай, ёр-ёр.

“Ҳафтияк”нинг ўртаси “Таборак”дир, ёр-ёр,

Эрка қизим, тўйларинг муборакдир, ёр-ёр.

Айтилган ҳар бир тилакда жуда улуғ, эзгу маънолар борки, кўпнинг тилаги, албатта, ижобат бўлади.

Қозондаги қатлама, қатланади, ёр-ёр,

Қизни олиб янгалар отланади, ёр-ёр.

Тура-туринг янгалар, ошиқманглар, ёр-ёр,

Қизни туққан онаси рози бўлсин, ёр-ёр.

Борган жойингда бахтинг қатламадек, қат-қат бўлиб қатланаверсин, қиз-у ўғил фарзандлар берсин, ота-онанг дуосини олгин, деган маънода ана шундай тилаклар ёр-ёрга қўшиб айтилган.

Қадимда мана шундай ёр-ёрлар айтилиб, қизларимиз ёр-ёр садолари билан узатилган. Ҳозирги ёшларимиз ҳам қадимги удумларимизга риоя  қилган ҳолда, тўйларимизда ёр-ёрлар садоси янграб, қизларимиз ўзимизнинг миллий либосларда чиқса, қандай яхши бўларди. Бошларида дўппи, эгнида зарчопонлар бўлса, чиройига-чирой, кўркига-кўрк қўшиларди.

Илоҳим, барча қизларимиз борган жойида тошдек қотиб, албатта, бахтли бўлсин, деймиз. Ёр-ёрларда, назаримда қандайдир илоҳийлик бор. Юқоридаги каби ёр-ёрлар билан узатилган ҳозирги момоларимиз ҳамон ана шу илоҳий оҳангларни унутмасликларида ҳам ана шу ҳикмат мужассам бўлса, не ажаб?!.

Гулора ДЎСЧАНОВА.