Амударё туманида Манғит сув тозалаш иншооти фойдаланишга топширилди
Ватанимиз мустақиллигининг 35 йиллик байрами арафасида бутун мамлакатимиз бўйлаб улкан бунёдкорлик ва янгиланишлар нафаси кезмоқда. Ушбу тарихий санага муносиб туҳфа сифатида, ҳурматли Президентимиз Шавкат Мирзиёев иштирокида ҳудудларда умумий қиймати 50 триллион сўмлик 163 та янги иншоотни фойдаланишга топширишга бағишланган тантанали маросим бўлиб ўтди. Мазкур тадбирда давлатимиз раҳбари видеоалоқа орқали ҳудудлардаги студияларга йиғилган кенг жамоатчилик вакилларини ва улар орқали бутун Ўзбекистон халқини яқинлашиб келаётган энг улуғ, энг азиз байрам билан самимий муборакбод этди. Шундан сўнг, давлатимиз раҳбари рамзий тугмани босиш орқали мамлакатимиз иқтисодий ва ижтимоий ҳаётида муҳим аҳамият касб этувчи 72 та йирик инвестиция лойиҳаси ҳамда 91 та ижтимоий соҳа объектига расман старт берди.
Бугунги кунда олиб борилаётган ислоҳотларнинг амалий натижаси сифатида, Қорақалпоғистон Республикасининг ўзида жами 12 та йирик объект аҳоли хизматига топширилди. Ушбу иншоотлар қаторида умумий қиймати 167,7 миллиард сўм маблағ ҳисобидан тўлиқ реконструкция қилинган Манғит сув тозалаш иншоотининг борлиги ҳудуд аҳолиси учун чинакам байрам туҳфаси бўлди.
Таъкидлаш ўринлики, сўнгги йиллар давомида минтақада “Амударё туманининг ичимлик сув таъминотини яхшилаш” лойиҳаси изчил амалга ошириб келинмоқда. Ушбу лойиҳа доирасида тузилган шартнома асосида 3 та йирик ичимлик суви объекти ҳамда узунлиги 300 километрдан ортиқ бўлган ичимлик суви тармоқларини янгидан қуриш ва реконструкция қилиш ишлари жадал олиб борилди. Мазкур “Манғит” сув тозалаш иншооти ҳамда унга туташ ичимлик суви тармоқларининг тўлиқ фойдаланишга топширилиши натижасида, тумандаги истеъмолчиларни тоза ва марказлашган ичимлик суви билан таъминлаш даражасини 80 фоизга етказиш режалаштирилган. Лойиҳанинг техник ва муҳандислик имкониятлари ҳам ғоят эътиборга моликдир. Мазкур замонавий иншоот 1 суткада 40 000 куб метр ичимлик сувини тозалаш қувватига эга. Айни кунларда иншоотда барча қурилиш ва монтаж ишлари юқори сифат даражасида тўлиқ якунига етказилган бўлиб, станция энг сўнгги русумдаги замонавий сув тозалаш технологиялари билан жиҳозланган.
Президентимиз ушбу объектларни расман очиб берганидан сўнг, туман ҳокими Собир Хўжаметов бошчилигида маҳаллий фаоллар ва нуронийлар рамзий тасмани кесиб, мажмуанинг бугунги кундаги фаолияти, шунингдек, яратилган замонавий шароитлар билан яқиндан танишдилар.
Бу каби йирик бунёдкорлик ишлари ва янгиланишлар фақатгина иқтисодий кўрсаткичларда акс этмайди. Аввало, ушбу лойиҳанинг амалга ошиши минглаб хонадонларнинг кундалик турмуш сифатини кескин яхшилаш, ҳудудда санитария ва гигиена шароитларини янада мустаҳкамлаш ва аҳоли орасида соғлом турмуш тарзини барқарор таъминлашга бевосита хизмат қилади. Бу эса мамлакатимизда инсон қадрини улуғлаш йўлида олиб борилаётган ислоҳотларнинг ёрқин ифодасидир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
