Туманимиздаги 2-сонли касб-ҳунар мактабида “Яшил макон” умуммиллий ҳаракати доирасида кўчат экиш тадбирлари уюшқоқлик билан ўтказилмоқда
Давлатимиз раҳбарининг ташаббуси билан ҳудудлар экологиясини янада яхшилаш, атроф-муҳит мусаффолигини таъминлаш масалаларига алоҳида эътибор қаратилмоқда. Экологик вазиятни инобатга олиб, табиатни асраш мақсадида дарахт экиш ишлари кун тартибидаги муҳим масалага айланмоқда. Шу мақсадда давлатимиз раҳбари “Яшил макон” умуммиллий лойиҳаси ва лойиҳа доирасида қатор тадбирларни амалга ошириш борасидаги устувор вазифаларни белгилаб берган эди.
Бугун юртимизда кенг тус олган “Яшил макон” умуммиллий ҳаракатининг маъно-мазмуни, мақсади юртимизда яшилликни кенгайтириш баробарида табиатни асраш, экология мусаффолигини сақлашга қаратилгани билан ниҳоятда аҳамиятлидир.
Амударё туманидаги 2-сонли касб-ҳунар мактабида ҳам “Яшил макон” умуммиллий ҳаракати доирасидаги кўчат экиш ишлари уюшқоқлик билан олиб борилмоқда.
Касб-ҳунар мактаби миқиёсида “Яшил макон” умуммиллий лойиҳасини амалга оширишдан кўзланган асосий мақсад – атроф-муҳит мусаффолигига ҳисса қўшиш ва ўқувчи-ёшларнинг манзарали ва мевали дарахт, бута кўчатлари ҳамда уруғ етиштириш, экиш ва парвариш қилиш бўйича кўникмаларини ошириш, улар қалбига экологияни асраш тушунчасини сингдиришдан иборатдир.
Устоз-мураббийлар билан бир қаторда ўқувчи-ёшлар ҳам дарахт кўчатларини экиб, туманимизни яшил маконга айлантиришга ўзларининг ҳиссаларини қўшмоқдалар.
Халқимиз орасида кўчат экиб, боғ яратиш, яшаб турган ҳудудни яшил маконга айлантириш азалий қадриятларимиздан ҳисобланади. Шу боис, аждодларимиз жуда қадимдан гузар ва йўллар бўйлари, экинзорларнинг четларига, кўчалар ёқалатиб турли хил манзарали ва мевали дарахт кўчатларини ўтқазишган ва буни ўз фарзандлари учун ҳам доимий анъанага айлантиришган. Мамлакатимизда яшил ҳудудлар барпо этиш, экилган ҳар бир туп ниҳолни авайлаб-асраш, унинг тупроққа илдиз қўйиб, униб-ўсиб кетишини таъминлаш мақсадида ҳар йили кузги ва баҳорги кўчат экиш мавсумига алоҳида пухта тараддуд кўрилади.
“Яшил макон” умуммиллий лойиҳаси доирасида касб-ҳунар мактаби атрофига жами 988 туп дарахт кўчатлари экилмоқда. Шундан 112 дона терак ниҳоли, 48 дона тут дарахти, 203 дона манзарали дарахт, 625 дона мевали дарахт кўчатлари экилиши туманимиз табиатининг софлиги ва тозалигига, қолаверса иқлим барқарорлигига катта ҳисса бўлиб қўшилади. Бундан ташқари бино олди ҳамда атрофига 200га яқин гул кўчатлари, 120 туп арча кўчатлари экилмоқда.
Дарахтлар ҳудуднинг иқлим шароитидан келиб чиқиб, боғлар ҳосил қилиш ва кўкаламзорлаштиришни назарда тутган ҳолда танлаб олинди. Экиш ишлари якунланганидан кейин кўчатлар агротехник талаблар асосида парвариш қилинади, минерал ва органик ўғитлар билан озиқлантирилиб, зараркунандалардан ҳимоя қилиш чоралари кўрилади.
Муҳтарам Президентимиз таъкидлаганидек, “Яшил макон” лойиҳаси − бу бир йиллик тадбир эмас. Яшаб турган жойимизни озода сақлаб, табиатга қанчалик кўп меҳр ва эътибор берсак, келажак авлод ҳам муносиб экологик шароитда яшайди. Бунинг учун биздан талаб қилинадиган биргина нарса – табиатни тоза сақлаган ҳолда ер ва сув ресурсларини, экологик тизимни асраш ҳамда дарахт кўчатларини экиб, боғ яратишдир.
Амалга оширилаётган бу каби эзгу ишлар она табиатни асрашга, шу билан бирга халқимизнинг асрлар оша сақланиб келаётган миллий қадриятларини ёшларимиз қалбига янада чуқур сингдиришга хизмат қилиши билан аҳамиятлидир.
Шу ўринда айтиш керакки, “Яшил макон” умуммиллий тадбирлари нафақат ўзимиз учун, балки келажак авлод учун ҳам ғамхўрликнинг бир кўринишидир. Зеро, тозалик ва озодалик бор жойда файз-у барака бўлади. Яшил маконлар ва кўкаламзор ҳудудлар эса соғлом турмуш кечиришнинг энг асосий омилларидан биридир.
Туман ҳокимлиги Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
