Tumanimizdagi 2-sonli kasb-hunar maktabida “Yashil makon” umummilliy harakati doirasida koʻchat ekish tadbirlari uyushqoqlik bilan oʻtkazilmoqda

Davlatimiz rahbarining tashabbusi bilan hududlar ekologiyasini yanada yaxshilash, atrof-muhit musaffoligini taʼminlash masalalariga alohida eʼtibor qaratilmoqda. Ekologik vaziyatni inobatga olib, tabiatni asrash maqsadida daraxt ekish ishlari kun tartibidagi muhim masalaga aylanmoqda. Shu maqsadda davlatimiz rahbari “Yashil makon” umummilliy loyihasi va loyiha doirasida qator tadbirlarni amalga oshirish borasidagi ustuvor vazifalarni belgilab bergan edi.

Bugun yurtimizda keng tus olgan “Yashil makon” umummilliy harakatining maʼno-mazmuni, maqsadi yurtimizda yashillikni kengaytirish barobarida tabiatni asrash, ekologiya musaffoligini saqlashga qaratilgani bilan nihoyatda ahamiyatlidir.

Amudaryo tumanidagi 2-sonli kasb-hunar maktabida ham “Yashil makon” umummilliy harakati doirasidagi koʻchat ekish ishlari uyushqoqlik bilan olib borilmoqda.

Kasb-hunar maktabi miqiyosida “Yashil makon” umummilliy loyihasini amalga oshirishdan koʻzlangan asosiy maqsad – atrof-muhit musaffoligiga hissa qoʻshish va oʻquvchi-yoshlarning manzarali va mevali daraxt, buta koʻchatlari hamda urugʻ yetishtirish, ekish va parvarish qilish boʻyicha koʻnikmalarini oshirish, ular qalbiga ekologiyani asrash tushunchasini singdirishdan iboratdir.

Ustoz-murabbiylar bilan bir qatorda oʻquvchi-yoshlar ham daraxt koʻchatlarini ekib, tumanimizni yashil makonga aylantirishga oʻzlarining hissalarini qoʻshmoqdalar.

Xalqimiz orasida koʻchat ekib, bogʻ yaratish, yashab turgan hududni yashil makonga aylantirish azaliy qadriyatlarimizdan hisoblanadi. Shu bois, ajdodlarimiz juda qadimdan guzar va yoʻllar boʻylari, ekinzorlarning chetlariga, koʻchalar yoqalatib turli xil manzarali va mevali daraxt koʻchatlarini oʻtqazishgan va buni oʻz farzandlari uchun ham doimiy anʼanaga aylantirishgan. Mamlakatimizda yashil hududlar barpo etish, ekilgan har bir tup niholni avaylab-asrash, uning tuproqqa ildiz qoʻyib, unib-oʻsib ketishini taʼminlash maqsadida har yili kuzgi va bahorgi koʻchat ekish mavsumiga alohida puxta taraddud koʻriladi.

“Yashil makon” umummilliy loyihasi doirasida kasb-hunar maktabi atrofiga jami 988 tup daraxt koʻchatlari ekilmoqda. Shundan 112 dona terak niholi, 48 dona tut daraxti, 203 dona manzarali daraxt, 625 dona mevali daraxt koʻchatlari ekilishi tumanimiz tabiatining sofligi va tozaligiga, qolaversa iqlim barqarorligiga katta hissa boʻlib qoʻshiladi. Bundan tashqari bino oldi hamda atrofiga 200ga yaqin gul koʻchatlari, 120 tup archa koʻchatlari ekilmoqda.

Daraxtlar hududning iqlim sharoitidan kelib chiqib, bogʻlar hosil qilish va koʻkalamzorlashtirishni nazarda tutgan holda tanlab olindi. Ekish ishlari yakunlanganidan keyin koʻchatlar agrotexnik talablar asosida parvarish qilinadi, mineral va organik oʻgʻitlar bilan oziqlantirilib, zararkunandalardan himoya qilish choralari koʻriladi.

Muhtaram Prezidentimiz taʼkidlaganidek, “Yashil makon” loyihasi − bu bir yillik tadbir emas. Yashab turgan joyimizni ozoda saqlab, tabiatga qanchalik koʻp mehr va eʼtibor bersak, kelajak avlod ham munosib ekologik sharoitda yashaydi. Buning uchun bizdan talab qilinadigan birgina narsa – tabiatni toza saqlagan holda yer va suv resurslarini, ekologik tizimni asrash hamda daraxt koʻchatlarini ekib, bogʻ yaratishdir.

Amalga oshirilayotgan bu kabi ezgu ishlar ona tabiatni asrashga, shu bilan birga xalqimizning asrlar osha saqlanib kelayotgan milliy qadriyatlarini yoshlarimiz qalbiga yanada chuqur singdirishga xizmat qilishi bilan ahamiyatlidir.

Shu oʻrinda aytish kerakki, “Yashil makon” umummilliy tadbirlari nafaqat oʻzimiz uchun, balki kelajak avlod uchun ham gʻamxoʻrlikning bir koʻrinishidir. Zero, tozalik va ozodalik bor joyda fayz-u baraka boʻladi. Yashil makonlar va koʻkalamzor hududlar esa sogʻlom turmush kechirishning eng asosiy omillaridan biridir.

Tuman hokimligi Axborot xizmati