Ҳуқуқбузарликлар профилактикаси куни доирасида 38-сонли умумтаълим мактабида йиғилиш ўтказилди

Мамлакатимизда ҳафтанинг ҳар пайшанба куни “Ҳуқуқбузарликлар профилактикаси куни” сифатида белгиланган бўлиб, бу кун доирасида жойларда жиноятчиликнинг олдини олиш, аҳолининг ҳуқуқий маданиятини юксалтириш ҳамда ижтимоий-маънавий муҳитни соғломлаштиришга қаратилган кенг қамровли тадбирлар амалга оширилмоқда. Чиндан ҳам, профилактика ишларини фақат қонунбузарлик содир бўлганидан кейин эмас, балки унинг илдиз сабабларини барвақт аниқлаб, аҳолини огоҳлантириш, ёшларни тўғри йўналтириш орқали ташкил этиш муҳим вазифа саналади. Ана шундай муҳим тадбирлардан бири Амударё туманининг Бўстон маҳалласи ҳудудида жойлашган 38-сонли умумтаълим мактабида ташкил этилди.

Туман ҳудудида хотин-қизлар ва ёшлар ўртасида ҳуқуқбузарлик ҳамда жиноятчиликнинг барвақт олдини олиш мақсадида ўтказилган йиғилишда мактабнинг юқори синф ўқувчилари, педагоглар жамоаси, ота-оналар ҳамда маҳалла фаоллари иштирок этдилар.

Тадбирда таълим муассасаси ва маҳалла ҳамкорлиги, ота-она назорати, ёшларнинг бўш вақтини мазмунли ташкил этиш, уларни турли хавфли иллатлардан асраш каби масалаларнинг долзарблиги таъкидланди. Шунингдек, ҳуқуқий билимлар билан бир қаторда маънавий тарбия, ўзаро ҳурмат ва жамоадаги масъулиятни кучайтириш орқали профилактика самарадорлиги ошиши қайд этилди.

Тадбирнинг кун тартибидан ўрин олган биринчи ва энг долзарб масала — бугунги ахборот технологиялари ривожланган асрда авж олаётган кибержиноятчилик муаммоси бўлди. Туман Ички ишлар бўлими жамоат хавфсизлиги хизмати ҳуқуқбузарликлар профилактикаси бўлинмасининг хотин-қизлар масалалари бўйича катта инспектори, катта лейтенант Инобат Ўрозматова йиғилганларга виртуал оламдаги таҳдидлар, хусусан, фирибгарликнинг янги турлари ҳақида батафсил тушунчалар берди. Маърузачилар, айниқса, Telegram мессенжери ва бошқа ижтимоий тармоқлар орқали келаётган турли “ёлғон” хабарлар, сохта ютуқли ўйинлар ва шубҳали ҳаволаларга алданиб қолмаслик зарурлигини ҳаётий мисоллар орқали тушунтирдилар. Бунда ёшлар ва катталар бирдек эҳтиёт бўлиши, ҳеч қандай текширувсиз хабарларга ишониб, маълумот ёки кодларни тақдим этиш хавфли экани таъкидланди.

Фуқароларнинг шахсий маълумотлари ва банк карталаридаги маблағларини ҳимоя қилиш мақсадида уяли алоқа воситалари ҳамда ижтимоий тармоқлардаги аккаунтларга “икки босқичли ҳимоя” тизимини ўрнатиш, мураккаб пароллардан фойдаланиш бўйича аниқ тавсиялар берилди. Шу билан бирга, паролларни бошқаларга айтмаслик, бир хил паролни турли платформаларда қўлламаслик, номаълум манбалардан дастур ва файлларни юклаб олмаслик каби оддий қоидаларнинг ўзи ҳам катта хавфларнинг олдини олиши мумкинлиги қайд этилди.

Тадбир фақатгина ҳуқуқий тарғибот билан чекланиб қолмади, балки унда жамиятнинг энг муҳим бўғини бўлган оила мустаҳкамлиги масаласига ҳам алоҳида эътибор қаратилди. Учрашувда “Маҳалла еттилиги” вакиллари, туман Давлат хизматлари маркази, Фуқаролик ҳолати далолатномаларини ёзиш бўлими масъул ходимлари ҳамда туман бош имом-хатиблари ҳам фаол иштирок этдилар. Мулоқот давомида Бўстон маҳалласи ҳудудида истиқомат қилувчи, турли сабаблар билан ўзаро келишмовчиликка борган ва ажрим ёқасига келиб қолган оилаларнинг вазияти ўрганилди. Маърузалар ва мулоқотларда масаланинг ҳуқуқий-ижтимоий томонлари билан бирга, унинг маънавий оқибатларига ҳам урғу берилди.

Диний ва дунёвий билимга эга уламолар ва мутахассислар томонидан оиланинг муқаддаслиги, эр-хотиннинг бир-бири олдидаги бурч ва масъулияти, фарзандлар тақдирига бефарқ бўлмаслик лозимлиги ҳақида таъсирчан насиҳатлар қилинди. Олиб борилган тушунтириш ишлари ва самимий суҳбатлар натижасида низоли оилаларга яна бир бор имконият берилди. Ҳуқуқбузарликлар профилактикаси куни доирасида ўтказилган мазкур тадбир бир вақтнинг ўзида ҳам ҳуқуқий саводхонликни оширишга, ҳам маънавий қадриятларимизни мустаҳкамлашга хизмат қилди.

Бундай амалий учрашувлар аҳолини огоҳликка чорлаш, ёшларни турли хавф-хатарлардан асраш, низоли ҳолатларни барвақт бартараф этиш орқали ҳудудда жиноятчиликни жиловлаш ва соғлом оилавий муҳитни шакллантиришда муҳим аҳамият касб этади.