Аёқчи маҳалласидаги “еттилик” юрт фаровонлиги йўлида

Мамлакатимизда амалга оширилаётган ислоҳотлар жараёнида маҳалла институти фаолияти янгича мазмун касб этмоқда. Давлат раҳбарининг ташаббуси билан жорий этилган “Маҳалла еттилиги” тизими маҳаллаларда ижтимоий барқарорликни таъминлаш, аҳолининг турмуш даражасини ошириш, тадбиркорликни ривожлантиришга хизмат қилмоқда.

Амударё туманининг марказдан олис ҳудудида жойлашган Аёқчи маҳалласида аҳоли асосан деҳқончилик, чорвачилик, паррандачилик каби соҳалар билан шуғулланиб келади. Ҳудудда “Маҳалла еттилиги” фаолияти натижасида кичик бизнес ва тадбиркорликнинг ўсиши кузатилмоқда. Маҳалла раиси бошчилигида барча ходимлар маҳалладошларини ишбилармонликка ундаб, уларни ҳар томонлама қўллаб-қувватлаб келмоқда.

Ёш тадбиркор Юлдуз Исмоилова кўп йиллардан буён тикувчилик билан шуғулланиб келади. Сўнгги йилларда иш кўламини кенгайтириб, мустақил цех фаолиятини йўлга қўйган. Ҳозирда буюртма асосида кўрпа, тўшак, ёстиқ, кўрпача каби ҳар бир хонадонга зарур бўлган маҳсулотлар тайёрлайди. Замонавий тикув ускуналари фаолиятга жалб этилганидан сўнг иш самарадорлиги анча ошди. Тадбиркорга маҳалладаги масъуллар, жумладан, хотин-қизлар фаоли Наргиза Аҳмедова томонидан зарур ёрдамлар кўрсатиляпти.

Аёқчи маҳалласининг деярли ҳар бир хонадонида чорвачилик ва паррандачилик фаолияти йўлга қўйилган. Илҳом Матжонов хонадонида ҳам чорвачилик оила учун барқарор даромад манбаига айланган. Чорвадорнинг айтишича, ўз вақтида парваришланган ва тўғри озуқа билан таъминланган чорва тез ўсади ва яхши фойда беради. Мамлакатимизда гўшт маҳсулотларининг катта қисми айнан якка тартибда парваришланаётган чорва ҳиссасига тўғри келади. Бу эса бозорда гўшт нархининг барқарор бўлишига хизмат қилмоқда.

Гулистон Йўлдошева эса маҳалладаги 69-сонли умумтаълим мактабида ўқитувчи бўлиб ишлаш билан бир қаторда хонадонида парранда етиштиришни ҳам йўлга қўйган. Апрель-май ойларида тухумлардан чиққан жўжалар алоҳида парвариш қилинади. Уларни парваришлаш осон эмас аслида. Жўжалар турли касалликлар ва зараркунанда ҳашаротларга қарши мунтазам равишда эмланиши, зарур витаминлар билан таъминланиши лозим, дейди қаҳрамонимиз.

Ёшларга ер ажратиш орқали уларнинг бандлигини таъминлашда ҳам ижобий натижалар кўзга ташланмоқда. Ер – деҳқон учун даромад, маҳалла фаровонлиги, бозорларимизга эса маҳсулот манбаи. Маҳаллада яшовчи Шоҳрух Маткаримовга ҳам ер ажратилган. У мавсумга мос тарзда экин экиб, яхши даромадга эга бўлмоқда. Айни кунда даласидаги тарвуз палаклари ҳосилга кириб, етилиб улгурган. Сара ҳосилнинг эса бозори чаққон бўлади, харидорлар даланинг ўзидан ҳам олиб кетишади. 1 та тарвуз ўртача 10 килограмм тош босади.

Шоҳрух Маткаримов фақат тарвуздан ташқари мавсумга мос бошқа полиз ва сабзавот маҳсулотларини ҳам етиштириб келмоқда. Меҳнат ва бозор эҳтиёжини ҳисобга олган ҳолда ташкил этилган фаолият самара бериши шубҳасиз. Ёшлар етакчиси Зафаржон Ўразметов бошчилигида ғалладан бўшаган ерлар ҳам такрорий экин учун ёшларга бериляпти.

Аёқчи маҳалласида шлакоблок ва ғишт ишлаб чиқариш фаолияти ҳам йўлга қўйилган. Тадбиркор Ғуломжон Раҳимов ташаббуси билан ташкил этилган цехда маҳалланинг ёшлари иш билан банд. Улар бу ерда даромад топиш билан бирга, касб-ҳунар ҳам ўрганмоқда. Мамлакатимизда кеч баҳордан кузгача қурилиш ишлари авж олади. Айниқса, ҳовли атрофини девор билан ўрашда шлакоблок маҳсулотларига талаб юқори.

Аёқчи маҳалласининг бугунги қиёфаси — мамлакатда амалга оширилаётган кенг кўламли ислоҳотлар, “Маҳалла еттилиги” тизими ва аҳоли меҳнати самарасини ўзида акс эттиради. Ҳар бир овул ва маҳалланинг тараққиёти, фаровонлиги, тинч ва обод ҳаёти унда яшовчи юртдошларимизнинг жонкуяр саъй-ҳаракатларига боғлиқ. Маҳалла аҳли бир мақсад – юртни ривожлантириш учун меҳнат қилса, бу ерда албатта ривожланиш бўлади.

Шоҳзод Қурбонбоев.