Аёқчи маҳалласи: эҳтиёжманд аҳоли манфаатлари — ҳимояда

Инсон қадрини улуғлаш, эҳтиёжманд қатламларни ижтимоий қўллаб-қувватлаш ва уларнинг ҳаёт даражасини яхшилаш бугунги куннинг энг устувор вазифаларидан бирига айланган. Ушбу эзгу мақсадларнинг амалдаги ижросини ҳар бир ҳудуд, ҳар бир хонадон мисолида яққол кўришимиз мумкин. Хусусан, Амударё туманининг Аёқчи маҳалласида олиб борилаётган кенг кўламли ижтимоий ҳимоя ишлари бунинг ёрқин ифодасидир. Мазкур ҳудудда маҳалла ижтимоий ходими Нигора Палванова бошчилигида аҳолининг ёрдамга муҳтож қатлами билан манзилли ва тизимли ишлар йўлга қўйилган.

Рақамларга мурожаат қиладиган бўлсак, бугунги кунда Аёқчи маҳалласида жами 949 та хонадон мавжуд бўлиб, уларда 1512 та оила истиқомат қилади. Маҳалланинг умумий аҳоли сони эса 4617 нафарни ташкил этади. Ушбу катта жамоа ичида алоҳида эътибор ва ғамхўрликка муҳтож, ногиронлиги бўлган фуқаролар 116 нафардан иборат. Уларнинг 27 нафари 1-гуруҳ, 77 нафари 2-гуруҳ ва 12 нафари 3-гуруҳ ногиронлари ҳисобланади. Бундай тоифадаги инсонларнинг жамиятда ўз ўрнини топиши, соғлиғини тиклаши ва кундалик ҳаётда қийналмасдан яшаши учун давлат ва ҳомийлар томонидан доимий равишда зарур ёрдамлар кўрсатиб келинмоқда.

Давлат таъминотидаги оилалар рўйхатида турган Нодира Тиловмуротова хонадонида яқинда қувончли воқеа юз берди. Унинг фарзанди Умиджон Ўрозматовнинг саломатлигини тиклаш, хусусан, мураккаб жарроҳлик амалиётини ўтказиш мақсадида “Саховат ва кўмак” жамғармаси ҳисобидан 13 миллион 857 минг сўм миқдоридаги пул маблағи тўлиқ ўтказиб берилди. Бу эса бир оиланинг эртанги кунга бўлган ишончини оширди.

Маҳаллада истиқомат қилувчи Айнура Жуманиёзованинг матонати ҳам кўпчиликка ўрнак бўла олади. У ногиронлиги бўлган фарзанди Бунёдбек Муродбоевга доимий қараб, уй шароитида тикувчилик билан шуғулланиб келмоқда. Оиланинг иқтисодий аҳволини яхшилаш ва қўллаб-қувватлаш мақсадида маҳалла томонидан субсидия ҳисобига замонавий тикув машинаси олиб берилди. Тадбиркорлик ташаббусини янада кенгайтириш учун эса ҳозирда унга 30 миллион сўм миқдорида фоизсиз кредит ажратишга кўмаклашилиб, ўз ишини ривожлантириш учун мустаҳкам замин яратилмоқда.

Ижтимоий ҳимояга муҳтож фуқароларнинг яшаш шароитларини енгиллаштириш йўлидаги амалий саъй-ҳаракатлар 1-гуруҳ ногирони Роза Раҳимова ҳаётига ҳам қувонч олиб кирди. Маҳалла ижтимоий ходими ва саховатпеша ҳомийларнинг яқиндан кўрсатган ёрдами натижасида унга ногиронлик аравачаси топширилди.

Маҳаллада яшовчи Дилфуза Жуматованинг фарзанди Давронбек Давлатбаевнинг Тошкент шаҳридаги болалар шифохонасида “Вақф” хайрия жамоат фонди ҳомийлиги асосида даволангани ва юрак операцияси муваффақиятли ўтказилгани қанчадан-қанча инсонларнинг дуоси ва амалий ҳаракатлари натижасидир.

Бундан ташқари, Аёқчи маҳалласи ижтимоий ходимининг бевосита ташаббуси билан ҳудуддаги ногиронлиги бўлган фуқароларнинг соғлиғини тиклаш борасида ҳам салмоқли ишлар қилинмоқда. Хусусан, уларнинг 8 нафарига махсус реабилитация марказларида сифатли даволанишлари учун зарур амалий ёрдамлар берилди. Кексалик гаштини сураётган нуронийлар ва ўзгалар парваришига муҳтож инсонлар ҳам доимий эътиборда. Ҳудуддаги 6 нафар ёлғиз кекса ва 1-гуруҳ ногиронларига махсус қаровчилар бириктирилган бўлиб, уларга маҳалла фаоллари ва ҳомийлар томонидан мунтазам равишда моддий ва маънавий кўмак бериб келинмоқда.

Ушбу амалий ишлар жамиятда ҳеч ким меҳр ва эътибордан четда қолмаслигини, давлатнинг ижтимоий сиёсати ҳар бир муҳтож хонадонга кириб бораётганини тасдиқлайди. Ижтимоий ҳимоя институти ва унинг фидойи ходимлари томонидан кўрсатилаётган бундай беғараз ёрдамлар ва манзилли ижтимоий хизматлар аҳоли фаровонлигини таъминлашга, одамлар қалбида эртанги ёруғ кунга бўлган умид ва ишончни мустаҳкамлашга хизмат қилиши шубҳасиз.