Такрорий экинлардан мўл ҳосил олиш йўлида
Деҳқончилик илми ва ерга бўлган юксак эътибор юртимиз қишлоқ хўжалигида улкан марраларни забт этишга, энг асосийси, халқимиз дастурхонининг тўкинлигини таъминлашга хизмат қилмоқда. Жорий йилда ҳам Амударё тумани ғаллакорлари ер билан тиллашиб, контрактация шартномаларини ортиғи билан бажаришга эришдилар ва мўл хирмон бунёд этдилар. Ўз навбатида ҳар бир қарич ердан унумли ва оқилона фойдаланиш мақсадида ғалладан бўшаган майдонларга такрорий экинлар экилиб, текис ниҳол олишга эришилди. Ушбу майдонларга такрорий экин сифатида асосан сабзавот, полиз маҳсулотлари, мош ва чорва моллари учун тўйимли озуқалар экилган.
Туманнинг Дўрман овули ҳудудида фаолият юритаётган фермер хўжаликларининг 229 гектар, шунингдек, Холимбег овулидаги фермер хўжаликларининг 194 гектар ғалладан бўшаган майдонига ҳам турли хил такрорий экинлар экилган. Бу жараёнда туман фермерлар кенгаши масъуллари ҳам четда турмай, такрорий экин эккан фермер хўжаликларига ташриф буюриб, деҳқонларга яқиндан кўмак бермоқдалар. Улар томонидан ердан унумли фойдаланишнинг мамлакат озиқ-овқат хавфсизлигини таъминлашдаги ўрни ва фермер хўжаликларининг молиявий кўрсаткичларини, иқтисодий даромадларини яхшилашдаги аҳамияти ҳақида кенг тушунчалар ҳамда тегишли тавсиялар бериб борилмоқда.
Аграр соҳа мутахассисларининг таъкидлашича, такрорий экинларнинг қишлоқ хўжалигидаги аҳамияти жуда катта. Энг аввало, бу усул ердан максимал даражада самарали фойдаланиш, яъни бир майдоннинг ўзидан йил давомида камида 2 марта ҳосил олиш имконини беради. Қолаверса, бу жараён аҳолини йил давомида янги, сархил ва сифатли сабзавот, полиз ҳамда чорва озуқа маҳсулотлари билан узлуксиз таъминлаш орқали озиқ-овқат хавфсизлигини мустаҳкамлайди.
Агротехник нуқтаи назардан эса, дуккакли экинлар экилганда тупроқ таркиби соф азот билан бойиб, унинг структураси яхшиланади ва унумдорлиги ортади. Натижада, фермер ва деҳқон хўжаликлари учун мўмайгина қўшимча иқтисодий фойда келтиради. Одатда, такрорий экин сифатида вегетация даври нисбатан қисқа бўлган ва иссиқсевар ўсимликлар танланади. Дон ва дуккакли экинлардан мош, ловия, жўхори ва чорва озуқаси учун маккажўхори ва бошқа озуқа экинлари шулар жумласидандир.
Айни кунларда ёз мавсумида турли хил ҳашаротлар ва зараркунандаларнинг фаоллиги юқори даражада бўлгани учун фермерлар ва мутахассислар томонидан экинларнинг ҳолати доимий равишда назорат қилиниб, касалликларга қарши ўз вақтида кимёвий ва биологик ишлов берилмоқда.
Хулоса қилиб айтганда, деҳқонларимизнинг бугунги машаққатли меҳнати, ерга берилаётган меҳр ва тўғри қўлланилаётган агротехник тадбирлар кузга бориб юртимиз бозорларида тўкин-сочинликни таъминлайди ва иқтисодиётимизнинг янада юксалишига хизмат қилади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
