Фаровон маҳалласи: Камбағалликни қисқартириш ва тадбиркорликни ривожлантириш йўлида амалий ишлар қилинмоқда

Мамлакатимизда аҳоли бандлигини таъминлаш, камбағалликни қисқартириш ва тадбиркорлик ташаббусларини қўллаб-қувватлаш давлат сиёсатининг устувор йўналишига айланган. Ушбу эзгу мақсадларнинг амалдаги ижросини Амударё туманидаги Фаровон маҳалласи мисолида яққол кўриш мумкин. Бу ерда “Маҳалла еттилиги”, хусусан, ҳоким ёрдамчиси Муқаддас Бекназарова бошчилигида аҳолининг даромад манбаларини кенгайтириш бўйича тизимли ва манзилли ишлар олиб борилмоқда. Фақатгина қоғозлардаги рақамлар эмас, балки аҳолининг реал муаммоларини ичидан ўрганиш ва уларга амалий кўмак бериш маҳалладаги фаолиятнинг асосий мезони этиб белгиланган. Бу борада айниқса ёшлар ва хотин-қизларни қўллаб-қувватлашга алоҳида урғу берилмоқда.

Жорий йилнинг ўтган 6 ойи давомида фуқароларнинг мурожаатлари, тадбиркорлик қилиш истаги ва эҳтиёжлари чуқур таҳлил қилиниб, аниқ манзилли чора-тадбирлар ишлаб чиқилди. Ўз бизнесини бошлаш истагида бўлганларга бизнес-режа тузиш ва ҳужжатларни расмийлаштиришда яқиндан ёрдам кўрсатилди. Натижада 58 нафар фуқарога имтиёзли кредитлар ажратилиб, уларнинг барчаси soliq.uz электрон платформаси орқали расмий рўйхатдан ўтказилди ва доимий бандлиги таъминланди.

Аҳоли, айниқса ёшлар ва хотин-қизларга тикувчилик, чорвачилик, иссиқхона хўжалиги, савдо, паррандачилик ва хизмат кўрсатиш каби сердаромад соҳаларни ривожлантириш бўйича кредит маблағлари ажратилиб, кўплаб оилаларнинг молиявий барқарорлиги таъминланмоқда. Шу билан бирга, бандликни таъминлаш йўналишида аҳолини, айниқса ёшларни касб-ҳунарга ўқитишга ҳам жиддий эътибор қаратилмоқда. Жорий йилнинг ўтган даври мобайнида 31 нафар фуқаро, жумладан, 5 нафар ёшлар турли касб-ҳунар курсларида ўқитилиб, махсус сертификатларга эга бўлди. Шунингдек, аҳоли орасида кооперациянинг афзалликлари ва давлат субсидиялари ҳақида кенг қамровли тарғибот ишлари олиб борилмоқда.

Яратилаётган бундай шарт-шароитлар жойларда янги бизнес субъектларининг пайдо бўлишига мустаҳкам замин яратмоқда. Масалан, Фаровон-3 кўчасида истиқомат қилувчи ёш тадбиркор Жаҳонгир Раҳимбоев давлат кўмагидан унумли фойдаланиб, "JAHONGIR OLTINOY" масъулияти чекланган жамиятини давлат рўйхатидан ўтказди. Аҳоли эҳтиёжидан келиб чиқиб ташкил этилган ушбу ветеринария дорихонаси бугунги кунда чорвадорларга зарур дори воситалари ва озуқа қўшимчаларини узлуксиз етказиб бермоқда. Келгусида тадбиркор ўз хизмат турларини янада кенгайтириб, қўшимча иш ўринлари яратишни мақсад қилган.

Худди шундай, маҳалланинг ташаббускор ёшларидан яна бири Ёрқиной Еримбетова якка тартибдаги тадбиркор сифатида ўз тикувчилик цехини очди. Бугунги кунда самарали фаолият юритаётган ушбу масканда хотин-қизлар учун миллий ва замонавий либослар, тўй либослари бичиб-тикилмоқда. Ёрқинойнинг келажакдаги режалари катта бўлиб, у замонавий ускуналар харид қилиш орқали маҳалладаги ишсиз аёлларни доимий иш билан таъминлашни ният қилган.

Маҳалладаги ижтимоий ҳимояга муҳтож қатламни манзилли қўллаб-қувватлаш тизими ҳам эътиборга молик. Ҳудуддаги жами 998 та оила тўлиқ хатловдан ўтказилиб, уларнинг 54 таси ижтимоий реестрга киритилган. Шулардан 23 таси давлат таъминотидаги, 25 таси камбағал ва 6 таси камбағаллик чегарасидаги оилалардир.

Реестрга киритилган барча оилаларнинг шароитидан келиб чиққан ҳолда индивидуал дастур ишлаб чиқилиб, бугунги кунга қадар 35 нафар фуқаронинг муаммолари ижобий ҳал этилди. Шунингдек, камбағал оилалар аъзоларини молиявий қўллаб-қувватлаш мақсадида 3 нафар фуқарога асбоб-ускуна харид қилиш учун салкам 15 миллион сўм миқдорида ссуда маблағлари ажратиб берилди.

Олиб борилган мана шундай тизимли ва кенг қамровли ишлар натижасида Фаровон маҳалласида камбағаллик даражаси 2,5 фоизга туширилишига эришилди. Бу кўрсаткичлар шунчаки статистика эмас, балки одамларнинг ҳаётдан рози бўлиб, эртанги кунга ишонч билан интилаётганининг амалдаги ифодасидир.

Ҳудудда тадбиркорликни ривожлантириш, янги иш ўринлари яратиш ва аҳоли фаровонлигини юксалтириш борасидаги ишлар келгусида ҳам узлуксиз давом эттирилади.