Ayoqchi mahallasidagi “yettilik” yurt farovonligi yoʻlida

Mamlakatimizda amalga oshirilayotgan islohotlar jarayonida mahalla instituti faoliyati yangicha mazmun kasb etmoqda. Davlat rahbarining tashabbusi bilan joriy etilgan “Mahalla yettiligi” tizimi mahallalarda ijtimoiy barqarorlikni taʼminlash, aholining turmush darajasini oshirish, tadbirkorlikni rivojlantirishga xizmat qilmoqda.

Amudaryo tumanining markazdan olis hududida joylashgan Ayoqchi mahallasida aholi asosan dehqonchilik, chorvachilik, parrandachilik kabi sohalar bilan shugʻullanib keladi. Hududda “Mahalla yettiligi” faoliyati natijasida kichik biznes va tadbirkorlikning oʻsishi kuzatilmoqda. Mahalla raisi boshchiligida barcha xodimlar mahalladoshlarini ishbilarmonlikka undab, ularni har tomonlama qoʻllab-quvvatlab kelmoqda.

Yosh tadbirkor Yulduz Ismoilova koʻp yillardan buyon tikuvchilik bilan shugʻullanib keladi. Soʻnggi yillarda ish koʻlamini kengaytirib, mustaqil tsex faoliyatini yoʻlga qoʻygan. Hozirda buyurtma asosida koʻrpa, toʻshak, yostiq, koʻrpacha kabi har bir xonadonga zarur boʻlgan mahsulotlar tayyorlaydi. Zamonaviy tikuv uskunalari faoliyatga jalb etilganidan soʻng ish samaradorligi ancha oshdi. Tadbirkorga mahalladagi masʼullar, jumladan, xotin-qizlar faoli Nargiza Ahmedova tomonidan zarur yordamlar koʻrsatilyapti.

Ayoqchi mahallasining deyarli har bir xonadonida chorvachilik va parrandachilik faoliyati yoʻlga qoʻyilgan. Ilhom Matjonov xonadonida ham chorvachilik oila uchun barqaror daromad manbaiga aylangan. Chorvadorning aytishicha, oʻz vaqtida parvarishlangan va toʻgʻri ozuqa bilan taʼminlangan chorva tez oʻsadi va yaxshi foyda beradi. Mamlakatimizda goʻsht mahsulotlarining katta qismi aynan yakka tartibda parvarishlanayotgan chorva hissasiga toʻgʻri keladi. Bu esa bozorda goʻsht narxining barqaror boʻlishiga xizmat qilmoqda.

Guliston Yoʻldosheva esa mahalladagi 69-sonli umumtaʼlim maktabida oʻqituvchi boʻlib ishlash bilan bir qatorda xonadonida parranda yetishtirishni ham yoʻlga qoʻygan. Aprel-may oylarida tuxumlardan chiqqan joʻjalar alohida parvarish qilinadi. Ularni parvarishlash oson emas aslida. Joʻjalar turli kasalliklar va zararkunanda hasharotlarga qarshi muntazam ravishda emlanishi, zarur vitaminlar bilan taʼminlanishi lozim, deydi qahramonimiz.

Yoshlarga yer ajratish orqali ularning bandligini taʼminlashda ham ijobiy natijalar koʻzga tashlanmoqda. Yer – dehqon uchun daromad, mahalla farovonligi, bozorlarimizga esa mahsulot manbai. Mahallada yashovchi Shohrux Matkarimovga ham yer ajratilgan. U mavsumga mos tarzda ekin ekib, yaxshi daromadga ega boʻlmoqda. Ayni kunda dalasidagi tarvuz palaklari hosilga kirib, yetilib ulgurgan. Sara hosilning esa bozori chaqqon boʻladi, xaridorlar dalaning oʻzidan ham olib ketishadi. 1 ta tarvuz oʻrtacha 10 kilogramm tosh bosadi.

Shohrux Matkarimov faqat tarvuzdan tashqari mavsumga mos boshqa poliz va sabzavot mahsulotlarini ham yetishtirib kelmoqda. Mehnat va bozor ehtiyojini hisobga olgan holda tashkil etilgan faoliyat samara berishi shubhasiz. Yoshlar yetakchisi Zafarjon Oʻrazmetov boshchiligida gʻalladan boʻshagan yerlar ham takroriy ekin uchun yoshlarga berilyapti.

Ayoqchi mahallasida shlakoblok va gʻisht ishlab chiqarish faoliyati ham yoʻlga qoʻyilgan. Tadbirkor Gʻulomjon Rahimov tashabbusi bilan tashkil etilgan tsexda mahallaning yoshlari ish bilan band. Ular bu yerda daromad topish bilan birga, kasb-hunar ham oʻrganmoqda. Mamlakatimizda kech bahordan kuzgacha qurilish ishlari avj oladi. Ayniqsa, hovli atrofini devor bilan oʻrashda shlakoblok mahsulotlariga talab yuqori.

Ayoqchi mahallasining bugungi qiyofasi — mamlakatda amalga oshirilayotgan keng koʻlamli islohotlar, “Mahalla yettiligi” tizimi va aholi mehnati samarasini oʻzida aks ettiradi. Har bir ovul va mahallaning taraqqiyoti, farovonligi, tinch va obod hayoti unda yashovchi yurtdoshlarimizning jonkuyar saʼy-harakatlariga bogʻliq. Mahalla ahli bir maqsad – yurtni rivojlantirish uchun mehnat qilsa, bu yerda albatta rivojlanish boʻladi.

Shohzod Qurbonboyev.