ИМОН-ЭЪТИҚОДДА ЯГОНА ХАЛҚМИЗ

Ҳар гал Мустақиллик байрами яқинлашган сари кўз олдимда ўтган асрнинг 80-йилларида халқимиз бошидан кечирган воқеалар жонланаверади. Ахир мустабид тузум юргизган сиёсат бутун мазмун-моҳияти билан халқимизнинг маънавий ҳаётини издан чиқариш, бой тарихимизни сохталаштириб, ўз даврида бутун дунёни юксак ақл-заковати, илм-ирфони билан лол этган улуғ аждодларимиз хотирасини қалбларимиздан абадий ўчиришга қаратилган эмасмиди?

Эсимда: муқаддас қадамжолар у ёқда турсин, ҳатто неча минг йиллик маънавий қадриятларимиз, урф-одат, ўзбекона удумлар, ҳайит байрамларимиз ҳам оёқ ости қилинди. Юртимиз мусулмонлари учун муқаддас Каъбатуллоҳни зиёрат этиш ушалмас бир орзу бўлганлиги ҳам ҳақиқат.

Аллоҳга минг бора шукурлар бўлсинки, Мустақиллик – халқимизга ўзлигини қайтариб берди, миллат шаъни, ғурури, ҳатто бой маънавиятимиз қайта  тикланди. Халқимизга қайтган ЭРК ва ОЗОДлик назаримда қақраб ётган чўлга оби ҳаёт янглиғ жон бахш этди. ҲУРлик йўлини танлаган юрт гуллаб-яшнади, кўнгиллар тозарди, ҳидоят сари талпинди.

Мустақиллик – халқимизга диний бағрикенглик муҳитини яратди, виждон эркинлигини берди. Юртимиз мусулмонлари Аллоҳга чексиз ҳамдлар билан рушду ҳидоят сари интилдилар ва не бахтки, ҳар йили юзлаб ватандошларимиз ҳаж ва умра зиёратларини адо этиб келишмоқда. Улар сафида туманимиздан ҳам ҳар йили ўнлаб мусулмонлар ана шундай бахтга мушарраф бўлишаётгани биз – аҳли суннаъ вал жамоат учун давлатимизнинг беқиёс ғамхўрлигидир.

Шуни алоҳида таъкидлаш жоизки, то Мустақилликка эришгунча туманимиздан фақат бир киши – Юсуф Эшон ҳожи бобо ҳазратлари муқаддас Каъба зиёратини адо этган бўлсалар, Мустақиллик даврида туманимиздан ўнлаб кишилар ҳожилик мартабасига эришдилар.

Аллоҳга минг-минг шукурки, туманимизда мусулмонлар учун яратилган шароитлар, имкониятлар ҳавас қилса арзигулик: барча овулларда масжидлар қайта таъмирдан чиқарилиб, айримлари янгидан қурилди. 500 нафар киши бемалол ибодат қилиши учун мўлжалланган кенг ва ёруғ айвонга ва шинам ҳовлига эга "Юсуф Эшон бобо” жомъе масжиди эса шарқона усулда янгидан қурилиб, туманимиз мусулмонлари ихтиёрига берилди.

Буларнинг барчаси биз мусулмонларнинг эмин-эркин диний арконларни, ибодатларни адо этишимиз учун давлатимиз томонидан кўрсатилаётган беқиёс ғамхўрликнинг ифодасидир.

Дунёнинг кўплаб мамлакатларида, айниқса қўшни давлат Афғонистон ерида ҳар лаҳза нотинч, мусулмонлар бошига ҳар хил кулфатлар ёғилиб, қонли можаролар юз бераётган таҳликага тўла замонда бизнинг мамлакатимиз мусулмонлари ўз оиласи бағрида эл-юрт ободлиги, осойишталигидан баҳраманд, осуда ҳаёт кечиришмоқда.

Фарзандларимизнинг ўқиб, илм олишлари, касб-ҳунарли бўлишлари учун мамлакатимизда ғамхўрликнинг чеки-чегараси йўқ. Оддийгина мен яшаётган маҳалла ёшлари ўқийман, ишлайман, ҳунар ўрганаман, деса, барча шароитлар муҳайё: қандолатчилик, нонвойлик цехлари, ҳунармандчилик устахоналарида маҳалламиз ёшлари, келинлари фаолият юритишмоқда. Ҳайит кунлари, байрамлар, турли мавзудаги тарбиявий тадбирларни ҳам-жиҳатликда ўтказиш, кўча ва ҳовлиларни ободонлаштириш, ҳашар уюштириш маҳалламизда одат тусига кирган. Бундай тадбирларда ўндан ортиқ миллат вакиллари бир оила фарзандларидай хурсандчилик қилиб, бир-бирларига чин кўнгилдан ҳадялар беришади.

Аллоҳга чексиз ҳамдлар ила айтаманки, ҳеч бир замонда халқимиз учун бундайин диний бағрикенглик, эркинлик, тенглик ва ҳамжиҳатлик бўлган эмас. Диний байрамлар ҳар бир оилада, бутун мамлакатда шод-у хуррамлик билан нишонланиб, барча миллат вакилларидан иборат аҳли суннаъ вал жамоат битта масжидда, ёнма-ён туриб диний ибодатларни адо этишларининг ўзи имон-эътиқодларнинг ягоналигидан, қалблар муштараклигидан, виждоннинг покизалигидан далолат эмасми! Токи, юртимиз мусулмонлари қалбида ана шу эзгу туйғулар зоҳир экан, ҳар киши покиза виждон, покиза қалб соҳиби, имон-эътиқодда собит экан, иншооллоҳ, Ўзбекистон деган она Ватанимиз ҳамиша Аллоҳнинг улуғ назаридадир. Муҳтарам Президентимиз қайта-қайта таъкидлаганлари каби: "Аллоҳ ҳар биримизнинг дилимизда, қалбимизда” экан, мамлакатимиз ҳам, халқимиз ҳам, эрк ва озодлик, саодат йўлидадир. Бу йўлни танлаган миллатнинг эса келажаги янада порлоқ, обод бўлиб бораверади.

Гулора ҳожи ПОЛВОНОВА,

"Дўстлик” маҳалласи.