IMON-EʼTIQODDA YaGONA XALQMIZ

Har gal Mustaqillik bayrami yaqinlashgan sari koʻz oldimda oʻtgan asrning 80-yillarida xalqimiz boshidan kechirgan voqealar jonlanaveradi. Axir mustabid tuzum yurgizgan siyosat butun mazmun-mohiyati bilan xalqimizning maʼnaviy hayotini izdan chiqarish, boy tariximizni soxtalashtirib, oʻz davrida butun dunyoni yuksak aql-zakovati, ilm-irfoni bilan lol etgan ulugʻ ajdodlarimiz xotirasini qalblarimizdan abadiy oʻchirishga qaratilgan emasmidi?

Esimda: muqaddas qadamjolar u yoqda tursin, hatto necha ming yillik maʼnaviy qadriyatlarimiz, urf-odat, oʻzbekona udumlar, hayit bayramlarimiz ham oyoq osti qilindi. Yurtimiz musulmonlari uchun muqaddas Kaʼbatullohni ziyorat etish ushalmas bir orzu boʻlganligi ham haqiqat.

Allohga ming bora shukurlar boʻlsinki, Mustaqillik – xalqimizga oʻzligini qaytarib berdi, millat shaʼni, gʻururi, hatto boy maʼnaviyatimiz qayta  tiklandi. Xalqimizga qaytgan ERK va OZODlik nazarimda qaqrab yotgan choʻlga obi hayot yangligʻ jon baxsh etdi. HURlik yoʻlini tanlagan yurt gullab-yashnadi, koʻngillar tozardi, hidoyat sari talpindi.

Mustaqillik – xalqimizga diniy bagʻrikenglik muhitini yaratdi, vijdon erkinligini berdi. Yurtimiz musulmonlari Allohga cheksiz hamdlar bilan rushdu hidoyat sari intildilar va ne baxtki, har yili yuzlab vatandoshlarimiz haj va umra ziyoratlarini ado etib kelishmoqda. Ular safida tumanimizdan ham har yili oʻnlab musulmonlar ana shunday baxtga musharraf boʻlishayotgani biz – ahli sunnaʼ val jamoat uchun davlatimizning beqiyos gʻamxoʻrligidir.

Shuni alohida taʼkidlash joizki, to Mustaqillikka erishguncha tumanimizdan faqat bir kishi – Yusuf Eshon hoji bobo hazratlari muqaddas Kaʼba ziyoratini ado etgan boʻlsalar, Mustaqillik davrida tumanimizdan oʻnlab kishilar hojilik martabasiga erishdilar.

Allohga ming-ming shukurki, tumanimizda musulmonlar uchun yaratilgan sharoitlar, imkoniyatlar havas qilsa arzigulik: barcha ovullarda masjidlar qayta taʼmirdan chiqarilib, ayrimlari yangidan qurildi. 500 nafar kishi bemalol ibodat qilishi uchun moʻljallangan keng va yorugʻ ayvonga va shinam hovliga ega "Yusuf Eshon bobo” jomʼe masjidi esa sharqona usulda yangidan qurilib, tumanimiz musulmonlari ixtiyoriga berildi.

Bularning barchasi biz musulmonlarning emin-erkin diniy arkonlarni, ibodatlarni ado etishimiz uchun davlatimiz tomonidan koʻrsatilayotgan beqiyos gʻamxoʻrlikning ifodasidir.

Dunyoning koʻplab mamlakatlarida, ayniqsa qoʻshni davlat Afgʻoniston yerida har lahza notinch, musulmonlar boshiga har xil kulfatlar yogʻilib, qonli mojarolar yuz berayotgan tahlikaga toʻla zamonda bizning mamlakatimiz musulmonlari oʻz oilasi bagʻrida el-yurt obodligi, osoyishtaligidan bahramand, osuda hayot kechirishmoqda.

Farzandlarimizning oʻqib, ilm olishlari, kasb-hunarli boʻlishlari uchun mamlakatimizda gʻamxoʻrlikning cheki-chegarasi yoʻq. Oddiygina men yashayotgan mahalla yoshlari oʻqiyman, ishlayman, hunar oʻrganaman, desa, barcha sharoitlar muhayyo: qandolatchilik, nonvoylik tsexlari, hunarmandchilik ustaxonalarida mahallamiz yoshlari, kelinlari faoliyat yuritishmoqda. Hayit kunlari, bayramlar, turli mavzudagi tarbiyaviy tadbirlarni ham-jihatlikda oʻtkazish, koʻcha va hovlilarni obodonlashtirish, hashar uyushtirish mahallamizda odat tusiga kirgan. Bunday tadbirlarda oʻndan ortiq millat vakillari bir oila farzandlariday xursandchilik qilib, bir-birlariga chin koʻngildan hadyalar berishadi.

Allohga cheksiz hamdlar ila aytamanki, hech bir zamonda xalqimiz uchun bundayin diniy bagʻrikenglik, erkinlik, tenglik va hamjihatlik boʻlgan emas. Diniy bayramlar har bir oilada, butun mamlakatda shod-u xurramlik bilan nishonlanib, barcha millat vakillaridan iborat ahli sunnaʼ val jamoat bitta masjidda, yonma-yon turib diniy ibodatlarni ado etishlarining oʻzi imon-eʼtiqodlarning yagonaligidan, qalblar mushtarakligidan, vijdonning pokizaligidan dalolat emasmi! Toki, yurtimiz musulmonlari qalbida ana shu ezgu tuygʻular zohir ekan, har kishi pokiza vijdon, pokiza qalb sohibi, imon-eʼtiqodda sobit ekan, inshoolloh, Oʻzbekiston degan ona Vatanimiz hamisha Allohning ulugʻ nazaridadir. Muhtaram Prezidentimiz qayta-qayta taʼkidlaganlari kabi: "Alloh har birimizning dilimizda, qalbimizda” ekan, mamlakatimiz ham, xalqimiz ham, erk va ozodlik, saodat yoʻlidadir. Bu yoʻlni tanlagan millatning esa kelajagi yanada porloq, obod boʻlib boraveradi.

Gulora hoji POLVONOVA,

"Doʻstlik” mahallasi.