ТЎЙЛАРИМИЗ ИХЧАМЛАШДИ, АММО МУАММОЛАРИМИЗ КЎП
Хонадонларимизга тўйга айтилса, қувониб кетамиз. Кўнглимиз ёришади. Ич-ичимиздан: «Илоҳим, тўйлар кўп бўлсин», - дея тилак тилаймиз. Чунки ўзбекнинг тўйлари худди тантанали байрамдай ўтади. Узоқ вақт бир-бирлари билан кўришолмай юрган қавм-қариндошлар, дўст-у қадрдонлар тўй баҳона дийдорлашадилар, бир-бирларининг қувончига шерик бўлишиб, муборакбод этишади.
Бизнинг «Хизр эли» овулимизда келин ва суннат тўйлари, оилавий маросимлар, туғилган кун ва шунга ўхшаш тадбирлар маҳалла фаолларидан иборат тўй ўтказиш бўйича махсус комиссиянинг таклиф ва тавсиялари асосида ўтказилади. Иложи борича тўйларимизни тартиб-интизомли, ихчам ва маданиятли, исрофгарчиликларсиз ўтказишга ҳаракат қиламиз. Айниқса, келин тўйларини ўтказиш билан боғлиқ муаммолар аста-секин ўз ечимини топмоқда. Яъни, маҳалламизда "палатка” қуриб қиз йиғин ўтказиш, эртасига қиз узатиш тўйи қилиш бир мунча ихчамлаштирилди. Қиз йиғин тўйхонада ёки уй ичкарисида ўтказиладиган, бу маросимда фақат таклиф қилинганлар иштирок этадиган бўлишди. Эртасига қизнинг ота-онасиникида дастурхон ёзиб, одам йиғилмай, бир-икки қариндош ва қизнинг дугоналари келинни куёвникига узатиб кетишади. Аввалгидай бугун қиз йиғин, эртага тўй, деб сарф-харажатлар қилишга барҳам берилди. Куёв томонида ўтказиладиган тўй ҳам анча ихчамлаштирилди. Кеч-қурунги никоҳ тўйи базми 2,5-3 соатдан ошмайдиган бўлди. Яъни кечқурун соат 18 дан 21 гача қилиб белгиланди.
Халқимизда: «Синалмаган отнинг сиртидан ўтма» деган ибратли мақол бор. Телефон воситасида танишиб, турмуш қурган ёшлар салгина вақтдан сўнг ажрашиб кетаётганлари қанча? Маҳалламизда бундай нохуш ҳолатларнинг олдини олиш мақсадида икки ёш яшайдиган овул ва маҳаллаларнинг катхудолари билан гаплашишга, муаммони ижобий ҳал этишга жиддий эътибор бериляпти. Баъзан қиз ёки йигит яшайдиган маҳалла, ҳатто қўшни туманларга чиқиб, масалага ойдинлик киритишимизга тўғри келади. Шундай вазиятларда куёв бўлмиш аввал ҳам уйланган, баъзан эса оиласидан ажрашмай туриб, ёш қизларнинг бошини айлантириб юрган бўлади. Ёшларимизнинг ҳаётга, муқаддас оила қуришга лоқайд ва енгил қараши натижасида жамиятда нотинч оилалар сафи ошиб бораверади.
Бизнинг «Хизр эли» МФЙда эса оила қураётган ёшлар билан алоҳида суҳбатлар ўтказилиб, уларнинг оилавий ҳаётга нечоғлик тайёр ёки тайёр эмаслигига жиддий эътибор берилади. Шу сабабли маҳалламизда ажримлар, оилаларда нотинчликлар йўқ.
Лекин гуруч курмаксиз бўлмагани каби келин кўйлак, тўй сайридаги машиналар борасида анча тортишувлар бўлиб туради. Келин бўлмиш қизларимиз елкалари очиқ кўйлакларни 2-3 соат кийиш учун оиласининг бир ойлик ризқини гўзаллик салонларига олиб бориб беришади. Ўзи тушаётган хонадонга бу қанчалик жабр бўлишини ўйлаб ҳам ўтиришмайди. Куёв йигитларимиз эса бўлгуси умр йўлдошларининг ярим очиқ баданларини ўзга нигоҳлардан қизғанишни ҳам билишмайди. Ёки йигитларимиз шунчалик ориятсизми, деб ўйланиб қолади одам.
Халқимизда: «ёзган дастурхонинг қиёфангни, маъраканг - эл-юртга муносабатингни белгилайди», - деган ҳикмат бор. Чиройли ва камтарона ясатилган дастурхон атрофида меҳмонлар бемалол, қисиниб-қимтинмай ўтиришади, ҳузур қилиб еб-ичишади. Ҳаддан ташқари башанг дастурхон ҳам, ҳашаматли маърака ҳам меҳмонларда ноқулайлик туғдиради. Буни кўп бора кузатганмиз. Кам харажатли оилаларнинг соҳиблари ўзларини ғариб ҳис этишади, диллари оғрийди. Шу боис, маҳалламизда ўтказилаётган тўйларда ортиқча тўкин-сочинликка барҳам берилди. Бойликни тўйда кўз-кўзлаб, кам-харжроқ қўни-қўшни ва овулдошни ноқулай аҳволга солиб, данғиллама тўй қилиш шартми?
Муқаддас ҳадисларида: «Аллоҳнинг барча бандалари тенгдир, бири-биридан зиёда эмасдир. Агар кимдаки битта нон ортиқ бўлса, уни умумга мақтанмасин, балки ўзгалар билан баҳам кўрсин. Шу ортиқча нонни яратган Эгам сизга синов учун бергандир», - дейилади.
Демак, халқ билан ҳамжиҳат, аҳил-иноқ бўлиб яшаш, дабдаба-ю ҳашамдан ўзини тийиш ҳам саодат, ҳам Аллоҳ йўлида ибратдир.
Илоҳим, халқимизда тўйлар, яхши кунлар кўп бўлсин, меҳр-оқибат ва ҳамжиҳатликдан айирмасин. Оилаларимиз тинч, хонадонларимиз файзли бўлсин.
Элдошбой ЖУМАМУРОДОВ,
«Хизр эли» маҳалла фуқаролар йиғини раиси.
(Фото - http://kelin-kuyov.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
