Амударё туманида навбатдаги сайёр қабул: Аҳоли муаммолари жойида ўрганилди

Давлатимиз раҳбари томонидан илгари сурилган инсон қадрини улуғлаш тамойили асосида жойларда аҳоли муаммоларини ўрганиш, уларнинг дарду ташвишларига қулоқ тутиш ва ҳар бир масалага маҳалланинг ўзида аниқ ечим топиш мақсадида тизимли ишлар олиб борилмоқда. Ана шундай эзгу саъй-ҳаракатларнинг амалий ифодаси сифатида 29 июль куни Амударё тумани ҳокими Собир Хўжаметов раҳбарлигида тумандаги Боғ маҳалла фуқаролар йиғинида навбатдаги кенгайтирилган сайёр қабул ташкил этилди.

Очиқ мулоқотда туман ҳокимининг ўринбосарлари, тегишли идора ва ташкилотлар раҳбарлари, шунингдек, маҳалла фаоллари ва кенг жамоатчилик вакиллари иштирок этди. Тадбирдан кўзланган асосий мақсад – фуқаролар ва тадбиркорларни қийнаб келаётган энг долзарб масалаларни тинглаш, мурожаатлар билан ишлаш тизимини янада такомиллаштириш ҳамда ҳудудда тўпланиб қолган ижтимоий-иқтисодий муаммоларни тезкорлик билан жойида бартараф этишдан иборат бўлди.

Қабул давомида аҳолининг мурожаатлари масъуллар томонидан тингланди. Ушбу сайёр қабулда жами 14 нафар жисмоний шахс томонидан турли йўналишларга оид 15 та масала ўртага ташланди ва уларнинг барчаси ижросини таъминлаш мақсадида алоҳида назоратга олинди.

Келиб тушган мурожаатлар асосан ҳудуд инфратузилмасини яхшилаш, ижтимоий соҳа объектларини янгилаш ва аҳолининг кундалик турмуш шароитларини яхшилаш йўналишларида бўлди. Хусусан, маҳалла аҳли томонидан ёш авлод таълим-тарбияси учун муҳим бўлган ҳудуддаги 13-сонли умумтаълим мактаби ҳамда мактабгача таълим ташкилоти учун замонавий янги бинолар қуришда амалий ёрдам сўралди. Шунингдек, кундалик ҳаётда энг кўп учрайдиган муаммолар қаторида электр энергияси таъминотини яхшилаш мақсадида эскирган симёғочларни янгисига алмаштириш, аҳолини яқинлашиб келаётган қиш мавсумида арзонлаштирилган кўмир билан таъминлаш ҳамда маиший эҳтиёжлар учун суюлтирилган газ баллонларини ўз вақтида узлуксиз тўлдириб бериш масалалари фуқаролар томонидан кун тартибига чиқарилди.

Бундан ташқари, фуқаролар томонидан ички кўчалар ҳолатини яхшилаш, жумладан, "Ташаббусли бюджет"да ғолиб бўлган лойиҳа доирасида йўлларни таъмирлаш ва асфальт ётқизиш ишларини тезлаштириш бўйича мурожаатлар келиб тушди. Шу билан бирга, маҳаллада санитария ва экологик ҳолатни яхшилаш мақсадида маиший чиқиндиларни графиклар асосида ўз вақтида олиб чиқиб кетиш, шунингдек, ҳудудда кўпайиб кетган дайди итлар ва ёввойи ҳайвонларни йўқ қилиш орқали аҳоли, айниқса, ёш болалар хавфсизлигини таъминлаш каби долзарб масалалар ҳам кўтарилди.

Шунингдек, қабул давомида фуқаролар ўзларининг яшаш шароитларини яхшилаш мақсадида турар-жойларини таъмирлаш ҳамда тадбиркорлик фаолиятини бошлаш мақсадида имтиёзли кредит маблағлари ажратилишида амалий кўмак сўраб мурожаат қилишди.

Сайёр қабул давомида кўтарилган ҳар бир масала туман ҳокими томонидан атрофлича муҳокама қилиниб, уларни қисқа муддатларда ва ижобий ҳал этиш бўйича тегишли соҳа раҳбарларига аниқ топшириқлар берилди. Вақт ва қўшимча ўрганиш талаб этиладиган мурожаатларнинг ижроси эса туман ҳокимлиги томонидан қатъий назоратга олинди.

Жойларда мунтазам равишда ўтказиб келинаётган бу каби очиқ мулоқотлар халқ билан давлат идоралари ўртасидаги ишончли кўприк вазифасини ўтамоқда ва юртдошларимизнинг ҳаётдан рози бўлиб яшашларини таъминлашда муҳим асос бўлиб хизмат қилмоқда.