Amudaryo tumanida navbatdagi sayyor qabul: Aholi muammolari joyida oʻrganildi

Davlatimiz rahbari tomonidan ilgari surilgan inson qadrini ulugʻlash tamoyili asosida joylarda aholi muammolarini oʻrganish, ularning dardu tashvishlariga quloq tutish va har bir masalaga mahallaning oʻzida aniq yechim topish maqsadida tizimli ishlar olib borilmoqda. Ana shunday ezgu saʼy-harakatlarning amaliy ifodasi sifatida 29-iyul kuni Amudaryo tumani hokimi Sobir Xoʻjametov rahbarligida tumandagi Bogʻ mahalla fuqarolar yigʻinida navbatdagi kengaytirilgan sayyor qabul tashkil etildi.

Ochiq muloqotda tuman hokimining oʻrinbosarlari, tegishli idora va tashkilotlar rahbarlari, shuningdek, mahalla faollari va keng jamoatchilik vakillari ishtirok etdi. Tadbirdan koʻzlangan asosiy maqsad – fuqarolar va tadbirkorlarni qiynab kelayotgan eng dolzarb masalalarni tinglash, murojaatlar bilan ishlash tizimini yanada takomillashtirish hamda hududda toʻplanib qolgan ijtimoiy-iqtisodiy muammolarni tezkorlik bilan joyida bartaraf etishdan iborat boʻldi.

Qabul davomida aholining murojaatlari masʼullar tomonidan tinglandi. Ushbu sayyor qabulda jami 14 nafar jismoniy shaxs tomonidan turli yoʻnalishlarga oid 15 ta masala oʻrtaga tashlandi va ularning barchasi ijrosini taʼminlash maqsadida alohida nazoratga olindi.

Kelib tushgan murojaatlar asosan hudud infratuzilmasini yaxshilash, ijtimoiy soha obʼektlarini yangilash va aholining kundalik turmush sharoitlarini yaxshilash yoʻnalishlarida boʻldi. Xususan, mahalla ahli tomonidan yosh avlod taʼlim-tarbiyasi uchun muhim boʻlgan hududdagi 13-sonli umumtaʼlim maktabi hamda maktabgacha taʼlim tashkiloti uchun zamonaviy yangi binolar qurishda amaliy yordam soʻraldi. Shuningdek, kundalik hayotda eng koʻp uchraydigan muammolar qatorida elektr energiyasi taʼminotini yaxshilash maqsadida eskirgan simyogʻochlarni yangisiga almashtirish, aholini yaqinlashib kelayotgan qish mavsumida arzonlashtirilgan koʻmir bilan taʼminlash hamda maishiy ehtiyojlar uchun suyultirilgan gaz ballonlarini oʻz vaqtida uzluksiz toʻldirib berish masalalari fuqarolar tomonidan kun tartibiga chiqarildi.

Bundan tashqari, fuqarolar tomonidan ichki koʻchalar holatini yaxshilash, jumladan, "Tashabbusli byudjet"da gʻolib boʻlgan loyiha doirasida yoʻllarni taʼmirlash va asfalt yotqizish ishlarini tezlashtirish boʻyicha murojaatlar kelib tushdi. Shu bilan birga, mahallada sanitariya va ekologik holatni yaxshilash maqsadida maishiy chiqindilarni grafiklar asosida oʻz vaqtida olib chiqib ketish, shuningdek, hududda koʻpayib ketgan daydi itlar va yovvoyi hayvonlarni yoʻq qilish orqali aholi, ayniqsa, yosh bolalar xavfsizligini taʼminlash kabi dolzarb masalalar ham koʻtarildi.

Shuningdek, qabul davomida fuqarolar oʻzlarining yashash sharoitlarini yaxshilash maqsadida turar-joylarini taʼmirlash hamda tadbirkorlik faoliyatini boshlash maqsadida imtiyozli kredit mablagʻlari ajratilishida amaliy koʻmak soʻrab murojaat qilishdi.

Sayyor qabul davomida koʻtarilgan har bir masala tuman hokimi tomonidan atroflicha muhokama qilinib, ularni qisqa muddatlarda va ijobiy hal etish boʻyicha tegishli soha rahbarlariga aniq topshiriqlar berildi. Vaqt va qoʻshimcha oʻrganish talab etiladigan murojaatlarning ijrosi esa tuman hokimligi tomonidan qatʼiy nazoratga olindi.

Joylarda muntazam ravishda oʻtkazib kelinayotgan bu kabi ochiq muloqotlar xalq bilan davlat idoralari oʻrtasidagi ishonchli koʻprik vazifasini oʻtamoqda va yurtdoshlarimizning hayotdan rozi boʻlib yashashlarini taʼminlashda muhim asos boʻlib xizmat qilmoqda.