40-SONLI MAKTABDA KONSTITUTsIYa KUNIGA BAGʻIShLANGAN TADBIRLAR OʻTKAZILDI

Yurtimizda Konstituttsiyamiz qabul qilinganligining 29 yilligi keng nishonlanmoqda. Shu munosabat bilan 40-sonli maktabda ham “Konstitutsiya va mening huquqlarim” deb nomlangan rasmlar va maketlar tanlovi, “Konstitutsiya bilimdonlari” bellashuvi va “Ajdodlar merosi – kelajak poydevori” hamda “Konstitutsiya – faxrimiz, gʻururimiz” deb nomlangan kecha tashkil qilindi. “Konstitutsiya va mening huquqlarim” deb nomlangan rasmlar tanlovida 5-sinf oʻquvchilari Dilshoda Yoʻldosheva, Gulinur Yangiboyevalar gʻolib deb topildi. Maketlar tanlovida esa 6-sinf oʻquvchilari Abror Ashirboyev, Iqboljon Abdullayev, Diyorbek Maqsudov, Saidbek Rasulov, Sevinch Safarboyevalar yasagan maketlar eng yaxshi maket deb topilib, gʻoliblar ragʻbatlantirildi.

“Konstitutsiya bilimdonlari” bellashuvida 8-sinf oʻquvchilari tanishtiruv, xotira mashqi, sardorlar bellashuvi, shuningdek, voyaga yetmaganlar orasida huquqbuzarliklarning kelib chiqishi, ularning oldini olish boʻyicha takliflar asosidagi sahna koʻrinishini namoyish qilish kabi 5 shart asosida bellashdi. Nihoyatda qiziqarli oʻtgan bellashuvda 8-V sinfining “Huquqshunoslar” guruhi gʻolib boʻldi va faxriy yorliq bilan taqdirlandi.

Bundan tashqari, maktabda “Konstitutsiya – faxrimiz, gʻururimiz” deb nomlangan tadbirda maktab oʻquvchilari Asosiy qonunimizda koʻrsatilgan moddalarni keng yoritib berishdi va sheʼrlar aytdi. Bayramga bagʻishlab, 7-sinflar oʻrtasida “Ajdodlar merosi – kelajak poydevori” tanlovi ham oʻtkazildi. Tanlovda 7-“A” sinf oʻquvchilarining Jaloliddin Manguberdi guruhi 1-oʻrinni egalladi va faxriy yorliq bilan taqdirlandi.

Tadbirlarda maktab oʻquvchilari katta taassurotlar olishdi va bir muhim maʼlumotlarga ega boʻlishdi.

Umida Karimova, 40-sonli maktabning ijodiy-madaniy masalalar boʻyicha targʻibotchisi.