Amudaryo tumanida gʻoʻza parvarishiga bagʻishlangan koʻrgazmali dala seminari oʻtkazildi

Qishloq xoʻjaligi mamlakat iqtisodiyotining eng muhim va yetakchi tarmoqlaridan biri hisoblanadi. Ayniqsa, paxtachilik sohasi mintaqalar taraqqiyoti hamda aholi farovonligini taʼminlashda katta ahamiyatga ega. Bugungi kunda dalalarda yetishtirilayotgan hosilning sifati va salmogʻi bevosita dehqonlarning boy tajribasi, zamonaviy ilm-fan yutuqlaridan unumli foydalanishi hamda agrotexnik tadbirlarning qatʼiy intizom asosida tashkil etilishiga bogʻliq. Iqlim sharoitlarining oʻzgaruvchanligi va suv resurslarini tejab ishlatish talab etilayotgan hozirgi murakkab davrda mavjud imkoniyatlardan, xususan, har bir qarich yerdan va har bir tomchi suvdan oqilona foydalanish eng asosiy vazifaga aylangan.

Aynan shu ustuvor maqsadlardan kelib chiqqan holda Amudaryo tumanidagi "Mangitova Aziza" fermer xoʻjaligida gʻoʻza parvarishining bugungi bosqichida amalga oshirilishi lozim boʻlgan dolzarb agrotexnik tadbirlarga bagʻishlangan koʻrgazmali dala seminari tashkil etildi. Ushbu amaliy tadbir nafaqat tajriba almashish maydoni, balki mavsumning eng masʼuliyatli pallasidagi navbatdagi vazifalarni aniq belgilab olish uchun muhim muloqot markazi boʻlib xizmat qildi.

Seminarda Amudaryo tumani hokimi Sobir Xoʻjametov, tuman hokimining qishloq va suv xoʻjaligi masalalari boʻyicha oʻrinbosari Anvar Yuldashev, Qoraqalpogʻiston Respublikasi Oʻsimliklar karantini va himoyasi agentligi Amudaryo tumani boʻlimi boshligʻi Akmal Odilboyev, shuningdek, tuman Agroinspektsiya boʻlimi boshligʻi Sarvar Matyoqubovlar ishtirok etdi. Tadbirda shuningdek qishloq xoʻjaligi sohasi mutaxassislari, koʻp yillik tajribaga ega fermer xoʻjaliklari rahbarlari, agronomlar hamda tegishli masʼul tashkilotlar vakillari ham jam boʻlishdi. Soʻzga chiqqan mutasaddilar tomonidan bugungi kunda paxtachilikda uchrashi mumkin boʻlgan turli xavf-xatarlarning oldini olish, ekin rivojini taʼminlash va hosildorlikni yanada oshirish yuzasidan ahamiyatli fikr-mulohazalar bildirildi.

Dala seminarida gʻoʻzaning vegetatsiya davrida yuqori hosildorlikka erishish uchun hal qiluvchi ahamiyatga ega boʻlgan agrotexnik tadbirlarni oʻz vaqtida bajarish masalalariga eʼtibor qaratildi. Jumladan, ekinlarni meʼyorida, ilmiy asoslangan tartibda sugʻorish, oʻsimlikning baquvvat rivojlanishi uchun zarur boʻlgan mineral oziqlantirish ishlarini tizimli yoʻlga qoʻyish, qator oralariga agrotexnik qoidalar asosida chuqur ishlov berish kabi muhim jihatlar mutaxassislar tomonidan atroflicha tahlil qilindi.

Shu bilan birga, barg orqali oziqlantirish maqsadida suspenziya sepish, kelajakda yigʻim-terim jarayonini osonlashtirish va sifatni saqlab qolish uchun defoliatsiya jarayonlariga hozirdanoq puxta tayyorgarlik koʻrish hamda turli xil xavfli zararkunanda va kasalliklarga qarshi kurashishda zamonaviy, ekologik xavfsiz va samarali usullardan foydalanish boʻyicha amaliy tavsiyalar berildi.

Taʼkidlash joizki, gʻoʻza parvarishidagi har bir kun oltinga teng boʻlib, bu davrdagi kichik eʼtiborsizlik yoki kechikish ham yakuniy natijaga, yaʼni umumiy hosil choʻgʻiga oʻzining salbiy taʼsirini koʻrsatishi mumkin. Hosilni saqlab qolish va uning sifatini oshirish yoʻlidagi barcha agrotexnik tadbirlar oʻzaro uzviy bogʻliq uzluksiz jarayondir.

Tadbir yakunida soha mutaxassislari tomonidan fermerlar, klaster vakillari va dehqonlarni qiziqtirgan barcha dolzarb savollarga atroflicha, ilmiy va amaliy asoslangan javoblar qaytarildi. Ochiq va samimiy muloqot ruhida oʻtgan ushbu seminarda mavsumning eng masʼuliyatli va hal qiluvchi bosqichida barcha zarur agrotexnik tadbirlarni belgilangan muddatlarda, sifatli va toʻliq amalga oshirish kelgusida moʻl va sifatli paxta hosilini yaratishning eng asosiy omili ekanligi taʼkidlandi.

Bu kabi koʻrgazmali va amaliy seminarlar nafaqat qatnashchilarning kasbiy bilimlarini boyitib, ularni yangicha yondashuvlar asosida mehnat qilishga undaydi, balki yurtimiz ulkan xirmonining yanada yuksalishiga xizmat qiladi.