Амударё туманида ғўза парваришига бағишланган кўргазмали дала семинари ўтказилди
Қишлоқ хўжалиги мамлакат иқтисодиётининг энг муҳим ва етакчи тармоқларидан бири ҳисобланади. Айниқса, пахтачилик соҳаси минтақалар тараққиёти ҳамда аҳоли фаровонлигини таъминлашда катта аҳамиятга эга. Бугунги кунда далаларда етиштирилаётган ҳосилнинг сифати ва салмоғи бевосита деҳқонларнинг бой тажрибаси, замонавий илм-фан ютуқларидан унумли фойдаланиши ҳамда агротехник тадбирларнинг қатъий интизом асосида ташкил этилишига боғлиқ. Иқлим шароитларининг ўзгарувчанлиги ва сув ресурсларини тежаб ишлатиш талаб этилаётган ҳозирги мураккаб даврда мавжуд имкониятлардан, хусусан, ҳар бир қарич ердан ва ҳар бир томчи сувдан оқилона фойдаланиш энг асосий вазифага айланган.
Айнан шу устувор мақсадлардан келиб чиққан ҳолда Амударё туманидаги "Мангитова Азиза" фермер хўжалигида ғўза парваришининг бугунги босқичида амалга оширилиши лозим бўлган долзарб агротехник тадбирларга бағишланган кўргазмали дала семинари ташкил этилди. Ушбу амалий тадбир нафақат тажриба алмашиш майдони, балки мавсумнинг энг масъулиятли палласидаги навбатдаги вазифаларни аниқ белгилаб олиш учун муҳим мулоқот маркази бўлиб хизмат қилди.
Семинарда Амударё тумани ҳокими Собир Хўжаметов, туман ҳокимининг қишлоқ ва сув хўжалиги масалалари бўйича ўринбосари Анвар Юлдашев, Қорақалпоғистон Республикаси Ўсимликлар карантини ва ҳимояси агентлиги Амударё тумани бўлими бошлиғи Акмал Одилбоев, шунингдек, туман Агроинспекция бўлими бошлиғи Сарвар Матёқубовлар иштирок этди. Тадбирда шунингдек қишлоқ хўжалиги соҳаси мутахассислари, кўп йиллик тажрибага эга фермер хўжаликлари раҳбарлари, агрономлар ҳамда тегишли масъул ташкилотлар вакиллари ҳам жам бўлишди. Сўзга чиққан мутасаддилар томонидан бугунги кунда пахтачиликда учраши мумкин бўлган турли хавф-хатарларнинг олдини олиш, экин ривожини таъминлаш ва ҳосилдорликни янада ошириш юзасидан аҳамиятли фикр-мулоҳазалар билдирилди.
Дала семинарида ғўзанинг вегетация даврида юқори ҳосилдорликка эришиш учун ҳал қилувчи аҳамиятга эга бўлган агротехник тадбирларни ўз вақтида бажариш масалаларига эътибор қаратилди. Жумладан, экинларни меъёрида, илмий асосланган тартибда суғориш, ўсимликнинг бақувват ривожланиши учун зарур бўлган минерал озиқлантириш ишларини тизимли йўлга қўйиш, қатор ораларига агротехник қоидалар асосида чуқур ишлов бериш каби муҳим жиҳатлар мутахассислар томонидан атрофлича таҳлил қилинди.
Шу билан бирга, барг орқали озиқлантириш мақсадида суспензия сепиш, келажакда йиғим-терим жараёнини осонлаштириш ва сифатни сақлаб қолиш учун дефолиация жараёнларига ҳозирданоқ пухта тайёргарлик кўриш ҳамда турли хил хавфли зараркунанда ва касалликларга қарши курашишда замонавий, экологик хавфсиз ва самарали усуллардан фойдаланиш бўйича амалий тавсиялар берилди.
Таъкидлаш жоизки, ғўза парваришидаги ҳар бир кун олтинга тенг бўлиб, бу даврдаги кичик эътиборсизлик ёки кечикиш ҳам якуний натижага, яъни умумий ҳосил чўғига ўзининг салбий таъсирини кўрсатиши мумкин. Ҳосилни сақлаб қолиш ва унинг сифатини ошириш йўлидаги барча агротехник тадбирлар ўзаро узвий боғлиқ узлуксиз жараёндир.
Тадбир якунида соҳа мутахассислари томонидан фермерлар, кластер вакиллари ва деҳқонларни қизиқтирган барча долзарб саволларга атрофлича, илмий ва амалий асосланган жавоблар қайтарилди. Очиқ ва самимий мулоқот руҳида ўтган ушбу семинарда мавсумнинг энг масъулиятли ва ҳал қилувчи босқичида барча зарур агротехник тадбирларни белгиланган муддатларда, сифатли ва тўлиқ амалга ошириш келгусида мўл ва сифатли пахта ҳосилини яратишнинг энг асосий омили эканлиги таъкидланди.
Бу каби кўргазмали ва амалий семинарлар нафақат қатнашчиларнинг касбий билимларини бойитиб, уларни янгича ёндашувлар асосида меҳнат қилишга ундайди, балки юртимиз улкан хирмонининг янада юксалишига хизмат қилади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
