Дўрман ва Қиличбойда "Аёл – қадриятлар давомчиси" шиори остида маънавий-маърифий тадбирлар ўтказилди

Амударё тумани Оила ва хотин-қизлар бўлими ташаббуси билан “Оқила аёллар” ҳаракати ташкил топганига 2 йил тўлганлиги муносабати билан жойларда “Аёл – қадриятлар давомчиси” шиори  остида маънавий-маърифий тадбирлар ўтказилмоқда. Туманнинг Дўрман овулида ҳам шу каби тадбир ташкил қилинди.

Тадбирда овул фуқаролар йиғинида ташкил қилинган “Оқила аёллар” ҳаракати аъзолари, овулда яшовчи фаол хотин-қизлар ҳамда нуроний онахонлар иштирок этди.

Дарҳақиқат, аёллар жамиятнинг асосий таянчи ҳисобланади ва уларнинг роли ҳар бир миллатнинг маданий ва маънавий меросини сақлашда муҳимдир. Улар нафақат оила давомчилари сифатида, балки миллий қадриятларни асраб-авайлаш ва уларни келажак авлодларга етказишда ҳал қилувчи роль ўйнайдилар.

Жамиятда аёлларнинг ўрни ва аҳамияти ҳақида гапирганда, уларнинг таълим олиши, касбий фаолиятда иштирок этиши ва жамиятнинг турли соҳаларида етакчилик қилиши муҳим аҳмиятга эга. Бу орқали аёллар ўзларининг билим ва кўникмаларини ривожлантириб, жамиятнинг ижтимоий-иқтисодий тараққиётига ҳисса қўшадилар.

Шунингдек, аёлларнинг маънавий ва маданий қадриятларни ўрганиши ва бу қадриятларни ёшларга ўргатиши, уларни миллий ва умуминсоний қадриятлар асосида тарбиялаши жамиятнинг барқарор ривожланиши учун ниҳоятда зарурдир. “Аёл – қадриятлар давомчиси” шиори  остида ўтказилган маънавий-маърифий тадбирда сўзга чиққанлар шу масалада ўз фикр-мулоҳазаларини баён этдилар.

Айтиш жоизки, жамиятда янги маънавий макон яратишда хотин-қизларнинг фаоллигини қўллаб-қувватлаш, фарзанд тарбияси, оила, хотин-қизлар маънавиятини юксалтиришда жамоатчиликка, энг аввало, ёшларга тарбиявий таъсир кўрсата оладиган обрў-эътиборли ва катта ҳаётий тажрибага эга бўлган, фаол ва ташаббускор аёлларнинг саъй-ҳаракатларини бирлаштириш учун зарур шарт-шароитлар яратиш мақсадида 2022 йил 8 август куни Вазирлар Маҳкамасининг “Оқила аёллар” ҳаракати фаолиятини ташкил этиш чора-тадбирлари тўғрисида”ги қарори қабул қилинган эди.

Ушбу қарор билан тасдиқланган “Оқила аёллар” ҳаракати тўғрисида”ги намунавий низомга кўра ҳаракатнинг асосий вазифалари жамиятда янги маънавий макон яратиш, эзгу ғоялар, миллий қадриятлар, урф-одатлар, муқаддас анъаналарни сингдиришга қаратилган тизимли тарғибот-ташвиқот ишларини олиб бориш, маҳаллаларда оилаларни мустаҳкамлаш, фарзанд тарбиясида ота-онанинг масъулиятини, ибратли ота-она бўлишнинг аҳамияти, маърифатли жамиятни қуришда маърифатли оналарнинг ролини кенг тарғиб қилишдир.

Шунингдек, аёллар, айниқса, ёш қизларда оилага ва Ватанга садоқат, фидойилик, ташаббускорлик туйғуларини сингдириш, “одобли қиз” ва “маърифатли она” қиёфасини шакллантиришга қаратилган чора-тадбирларни амалга ошириш, фарзанд, айниқса, қизлар тарбияси, оила, оналар маънавиятини юксалтириш, оилаларда китобхонлик, мутолаа маданиятини тарғиб этиш, ўзаро меҳр-оқибат ва ҳамжиҳатликни шакллантириш ҳам ҳаракатнинг асосий вазифалари сирасига киради.

Ҳар бир овул ва маҳалладаги ҳаракат аъзолари ушбу вазифалар билан биргаликда ёшлар ўртасида оилавий-ҳуқуқий муносабатлар, оилавий ҳаёт психологияси, оила иқтисоди ва бюджети, репродуктив саломатлик асослари, маънавий-ахлоқий қадриятларга нисбатан ҳурмат руҳида бўлиш масалаларини ҳамда “Оила — муқаддас” тушунчасини кенг тарғиб қилиш, хотин-қизларнинг мамлакатда амалга оширилаётган ислоҳотларга дахлдорлик ҳиссини ошириш, уларга қабул қилинаётган қонунчилик ҳужжатларининг мазмун-моҳиятини халқчил тилда тушунтириш ишларига ҳам муносиб ҳисса қўшиб келмоқдалар.

Туманнинг Қиличбой овулида ҳам шу каби тадбир ташкил қлиинди. Тадбирда ҳудуддаги маданият маркази, мактабгача таълим ташкилотлари тарбияланувчилари ҳамда мактаблар ўқувчилари ижросида Ватан, оналик ва болалик туйғулари, тинч ва осойишта юртда бахтиёр яшаш завқи тараннум қилинган қўшиқлар куйланиб, рақслар ижро қилинди.

Кўргазмаларда эса ота-боболаримиздан, момо-бувиларимиздан мерос бўлиб келаётган қадимий урф-одат ва анъаналаримиз акс эттирилиб, йиғилганларга намойиш қилинди.

Юқоридаги Низомга асосан туман оила ва хотин-қизлар бўлими ҳам маҳалла даражасида ҳаракат фаолиятини мувофиқлаштириб, мавжуд муаммоларни бартараф этиш ва иш самарадорлигини ошириш чораларини кўриб келмоқда. Бўлим масъуллари маҳаллалардаги вакилларга ҳаракатни самарали ташкил этиш билан боғлиқ методик тавсиялар бериб, маҳаллалардаги фаол ва ташаббускор аёллар учун ўқув курслари, давра суҳбатлари ва ижобий тажрибаларни оммалаштириш бўйича бошқа тадбирларни ташкил этиб келмоқда.

Қиличбой овулида 15 нафар фаол ва ташаббускор аёллардан ташкил топган ҳаракат фаолиятини ҳам самарали дея баҳолаш мумкин. Ҳаракат аъзолари маҳаллада “хонадонбай” манзилли чора-тадбирларни ишлаб чиқиб, маҳаллада оила вакиллари ва хотин-қизлар ўртасида очиқ мулоқотлар, давра суҳбатлари ва бошқа тадбирларни ўтказишда фаоллик кўрсатмоқда. Бундан ташқари, ҳаракатнинг асосий вазифалари бўйича маҳаллаларда мавжуд муаммоларни бартараф этиш ва иш самарадорлигини ошириш бўйича таклифлар тайёрлаб, тегишли жойларга тақдим қилиб келмоқда.

“Аёл – қадриятлар давомчиси” шиори  остида ўтказилган маънавий-маърифий тадбир жамиятдаги ижтимоий-маънавий муҳит барқарорлигини мустаҳкамлаш йўлида яна бир муҳим қадам бўлди, дейиш мумкин. Бу каби тадбирлар туманнинг бошқа овул ва маҳаллаларида ҳам давом этади.