Қурилиш объектларида фавқулодда вазиятларнинг олдини олиш мақсадида профилактик-тушунтириш ишлари олиб борилмоқда

Жорий йилнинг 2 май куни Амударё тумани Фавқулодда вазиятлар бўлими ходимлари томонидан туманнинг Қорамон маҳалласи ҳудудида янгидан қад кўтараётган мактабгача таълим ташкилоти биносида бўлиб, қурилиш объектида фавқулодда вазиятларнинг олдини олиш ҳамда ёнғин хавфсизлигини таъминлаш бўйича профилактик тушунтириш ишларини олиб борди.

Пудратчи ташкилот – “Манғит Инвест максимум” масъулияти чекланган жамияти ишчилари билан ўтказилган профилактик-тушунтириш ишлари давомида қурилиш объекти бинолари оралиғида ёнғин ўчириш автомобилларининг эркин ҳаракатланиши учун шароитлар яратиш, ёнғинга қарши сув хавзаларини меъёр талаблар асосида қуриш, объект ҳудудида эвакуация йўлларининг созлигига, сунъий тўсиқлар билан тўсиб қўйилмаганлигига эътибор қаратиш лозимлиги тушунтирилди.

Ушбу профилактик тадбирдан кўзланган асосий мақсад қурилиш майдонида ва келгусида объект фойдаланишга топширилганидан кейин мактабгача таълим ташкилотида ҳам фавқулодда вазиятлар содир бўлишининг олдини олиш ҳамда ёнғин хавфсизлигини таъминлашдир.

Айтиш жоизки, қурилиш майдонларида фавқулодда вазиятларнинг олдини олиш ва ёнғин хавфсизлигини таъминлаш ишчиларнинг ҳаёти ва соғлигини ҳимоя қилишнинг муҳим шартларидан биридир. Бунинг учун қурилиш компаниялари ва иш берувчилар ўз ходимларини тегишли хавфсизлик стандартлари ва амалиётлари билан таништириши, шунингдек, уларга зарур хавфсизлик асбоб-ускуналарини тақдим этиши лозим.

Ўзбекистон Республикаси қонунчилигида, жумладан, Вазирлар Маҳкамасининг қарорларида ва шаҳарсозлик нормаларида қурилиш майдонларида хавфсизлик чораларини кўриш бўйича аниқ кўрсатмалар белгилаб қўйилган. Масалан, ёнғин хавфсизлигини таъминлаш мақсадида қурилиш майдонларида ёнғинга қарши курашиш воситалари мавжуд бўлиши, шунингдек, ишчилар ёнғин хавфсизлиги бўйича тегишли назарий ва амалий машғулотлардан ўтган бўлишлари керак.

Бундан ташқари, қурилиш майдонларида мунтазам равишда хавфсизлик текширувлари ўтказилиб, хавфсизлик қоидаларига риоя қилиниши кузатиб борилиши зарур. Фавқулодда вазиятлар юз берганда тезкор чоралар кўриш учун махсус режалар ишлаб чиқилиши ва барча ишчилар мазкур режалар билан таништирилиши лозим.

Амударё тумани Фавқулодда вазиятлар бўлими ходимлари таъкидлаганларидек, бугунги кунда ижтимоий тармоқларда республикамиз ҳудудида жойлашган баъзи йирик қурилиш объектларда ёнғинлар содир бўлаётгани, ушбу ёнғинлар натижасида фуқаролар, юридик шахслар ҳамда давлат ва жамоатчиликнинг мол-мулкига зарар етиб,  айрим ҳолатларда инсон ўлими каби нохуш ҳолатлар содир бўлаётгани кўплаб муҳокамаларга сабаб бўлмоқда.

Шу сабабли ҳам туман ҳудудидаги давлат буюртмаси асосида, шунингдек, фуқаролар ва тадбиркорлар маблағлари ҳисобидан амалга оширилаётган йирик қурилиш объектларида туман Фавқулодда вазиятлар бўлими ходимлари иштирокида бу каби профилактик тушунтириш ишлари белгиланган жадвал асосида мунтазам равишда ўтказиб келинмоқда.

Тадбир давомида фавқулодда вазиятлар хизмати ходимлари томонидан “Манғит инвест максимум” масъулияти чекланган жамияти ишчиларига техника хавфсизлигига риоя қилиш бўйича кўрсатмалар берилди. Айниқса, ишчилар электр тармоғидан тўғри фойдаланиш, объект ҳудудида суюлтирилган газ балонидан фойдаланмаслик бўйича огоҳлантирилди. Жамият раҳбариятига эса ёнғин билан боғлиқ фавқулодда вазиятларнинг барвақт олдини олиш ва уларни бартараф этиш бўйича оғзака таклифлар берилди.

Б.Аллабергенов, туман ФВБ катта инспектори, капитан