Qurilish obʼektlarida favqulodda vaziyatlarning oldini olish maqsadida profilaktik-tushuntirish ishlari olib borilmoqda

Joriy yilning 2-may kuni Amudaryo tumani Favqulodda vaziyatlar boʻlimi xodimlari tomonidan tumanning Qoramon mahallasi hududida yangidan qad koʻtarayotgan maktabgacha taʼlim tashkiloti binosida boʻlib, qurilish obʼektida favqulodda vaziyatlarning oldini olish hamda yongʻin xavfsizligini taʼminlash boʻyicha profilaktik tushuntirish ishlarini olib bordi.

Pudratchi tashkilot – “Mangʻit Invest maksimum” masʼuliyati cheklangan jamiyati ishchilari bilan oʻtkazilgan profilaktik-tushuntirish ishlari davomida qurilish obʼekti binolari oraligʻida yongʻin oʻchirish avtomobillarining erkin harakatlanishi uchun sharoitlar yaratish, yongʻinga qarshi suv xavzalarini meʼyor talablar asosida qurish, obʼekt hududida evakuatsiya yoʻllarining sozligiga, sunʼiy toʻsiqlar bilan toʻsib qoʻyilmaganligiga eʼtibor qaratish lozimligi tushuntirildi.

Ushbu profilaktik tadbirdan koʻzlangan asosiy maqsad qurilish maydonida va kelgusida obʼekt foydalanishga topshirilganidan keyin maktabgacha taʼlim tashkilotida ham favqulodda vaziyatlar sodir boʻlishining oldini olish hamda yongʻin xavfsizligini taʼminlashdir.

Aytish joizki, qurilish maydonlarida favqulodda vaziyatlarning oldini olish va yongʻin xavfsizligini taʼminlash ishchilarning hayoti va sogʻligini himoya qilishning muhim shartlaridan biridir. Buning uchun qurilish kompaniyalari va ish beruvchilar oʻz xodimlarini tegishli xavfsizlik standartlari va amaliyotlari bilan tanishtirishi, shuningdek, ularga zarur xavfsizlik asbob-uskunalarini taqdim etishi lozim.

Oʻzbekiston Respublikasi qonunchiligida, jumladan, Vazirlar Mahkamasining qarorlarida va shaharsozlik normalarida qurilish maydonlarida xavfsizlik choralarini koʻrish boʻyicha aniq koʻrsatmalar belgilab qoʻyilgan. Masalan, yongʻin xavfsizligini taʼminlash maqsadida qurilish maydonlarida yongʻinga qarshi kurashish vositalari mavjud boʻlishi, shuningdek, ishchilar yongʻin xavfsizligi boʻyicha tegishli nazariy va amaliy mashgʻulotlardan oʻtgan boʻlishlari kerak.

Bundan tashqari, qurilish maydonlarida muntazam ravishda xavfsizlik tekshiruvlari oʻtkazilib, xavfsizlik qoidalariga rioya qilinishi kuzatib borilishi zarur. Favqulodda vaziyatlar yuz berganda tezkor choralar koʻrish uchun maxsus rejalar ishlab chiqilishi va barcha ishchilar mazkur rejalar bilan tanishtirilishi lozim.

Amudaryo tumani Favqulodda vaziyatlar boʻlimi xodimlari taʼkidlaganlaridek, bugungi kunda ijtimoiy tarmoqlarda respublikamiz hududida joylashgan baʼzi yirik qurilish obʼektlarda yongʻinlar sodir boʻlayotgani, ushbu yongʻinlar natijasida fuqarolar, yuridik shaxslar hamda davlat va jamoatchilikning mol-mulkiga zarar yetib,  ayrim holatlarda inson oʻlimi kabi noxush holatlar sodir boʻlayotgani koʻplab muhokamalarga sabab boʻlmoqda.

Shu sababli ham tuman hududidagi davlat buyurtmasi asosida, shuningdek, fuqarolar va tadbirkorlar mablagʻlari hisobidan amalga oshirilayotgan yirik qurilish obʼektlarida tuman Favqulodda vaziyatlar boʻlimi xodimlari ishtirokida bu kabi profilaktik tushuntirish ishlari belgilangan jadval asosida muntazam ravishda oʻtkazib kelinmoqda.

Tadbir davomida favqulodda vaziyatlar xizmati xodimlari tomonidan “Mangʻit invest maksimum” masʼuliyati cheklangan jamiyati ishchilariga texnika xavfsizligiga rioya qilish boʻyicha koʻrsatmalar berildi. Ayniqsa, ishchilar elektr tarmogʻidan toʻgʻri foydalanish, obʼekt hududida suyultirilgan gaz balonidan foydalanmaslik boʻyicha ogohlantirildi. Jamiyat rahbariyatiga esa yongʻin bilan bogʻliq favqulodda vaziyatlarning barvaqt oldini olish va ularni bartaraf etish boʻyicha ogʻzaka takliflar berildi.

B.Allabergenov, tuman FVB katta inspektori, kapitan