Ижтимоий объектларнинг қурилиш жараёни прокурор назоратида
Мамлакатимизда аҳоли фаровонлигини ошириш, фуқаролар учун муносиб турмуш шароитларини яратиш ҳамда ҳудудларнинг меъморий қиёфасини тубдан янгилаш борасида кенг кўламли ислоҳотлар амалга оширилмоқда. Айниқса, таълим ва соғлиқни сақлаш тизимларини замон талаблари даражасида ривожлантириш, ижтимоий соҳа объектларини қуриш ва реконструкция қилиш давлатимиз сиёсатининг устувор йўналишларидан бирига айланган. Бу борада Ўзбекистон Республикаси Президентининг 2025 йил 27 декабрдаги “2026-2028 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида”ги 393-сонли қарори дастуриламал бўлиб хизмат қилмоқда.
Мазкур муҳим ҳужжат ижросини тўлақонли таъминлаш, давлат дастурлари доирасида белгиланган вазифаларнинг ўз вақтида ва юқори сифат билан бажарилишини назорат қилиш мақсадида жойларда ҳуқуқни муҳофаза қилувчи органлар томонидан тизимли ўрганишлар олиб борилмоқда. Хусусан, Амударё тумани прокурори Баҳром Машарипов юқоридаги қарор асосида туманда амалга оширилаётган қурилиш-таъмирлаш ишларининг бориши билан бевосита жойига чиққан ҳолда танишди.
Маълумки, ҳар қандай жамиятнинг эртанги куни ва тараққиёти бевосита ёш авлодга берилаётган таълим-тарбия сифатига боғлиқ. Шу боисдан ҳам, мактабларнинг инфратузилмасини яхшилаш, ўқувчилар учун қўшимча ўринлар яратиш ва илм олиш учун муносиб муҳитни шакллантириш муҳим аҳамият касб этади. Прокуратура органларининг навбатдаги ўрганишлари давомида туманнинг Дарё бўйи маҳалласи ҳудудида жойлашган 65-сонли умумтаълим мактабида олиб борилаётган реконструкция ишларига алоҳида эътибор қаратилди.
Лойиҳага асосан, мазкур билим маскани ҳудудида қўшимча 300 ўринли янги ва замонавий ўқув биноси қад ростламоқда. Туман прокурори ушбу объектдаги қурилиш жараёнларини кўздан кечирар экан, бинонинг пойдеворидан тортиб, томигача бўлган ҳар бир босқичда қурилиш меъёрларига қатъий амал қилиниши лозимлигини таъкидлади. Янги бинонинг фойдаланишга топширилиши маҳалла ёшларининг янада кенг ва ёруғ хоналарда, илғор шарт-шароитларда билим олишларига хизмат қилиши алоҳида қайд этилди.
Шунингдек, инсон саломатлигини асраш, ҳудудлардаги барқарорликни таъминлаш ҳам энг долзарб вазифалардан бири ҳисобланади. Шу мақсадда, Амударё тумани санитария-эпидемиологик осойишталик ва жамоат саломатлиги бўлими биносини реконструкция қилиш ишлари ҳам жадал суръатларда олиб борилмоқда. Мазкур тиббиёт ва назорат масканининг янгиланиши туман аҳолисига кўрсатилаётган хизматлар сифатини оширишга, турли касалликларнинг олдини олишга ва жамоат саломатлигини мустаҳкамлашга замин яратади. Прокурор мазкур объектда ҳам бўлиб, пудратчи ташкилотлар вакиллари ҳамда масъул ходимлар билан иш жараёнини муҳокама қилди. Лойиҳа доирасида бажарилаётган ишларнинг ҳолати, ишлатилаётган қурилиш материалларининг сифати батафсил таҳлил қилинди.
Ўрганишлар якунида туман прокурори Баҳром Машарипов томонидан масъул раҳбарлар ва қурувчи ташкилотлар вакилларига тегишли кўрсатма ва топшириқлар берилди. Хусусан, ҳар икки объектда ҳам қурилиш-таъмирлаш ишларини янада жадаллаштириш, бунинг учун ишчи кучи ва махсус техникаларни янада кўпроқ жалб қилиш зарурлиги таъкидланди. Иш суръатини ошириш қурилиш сифатига асло салбий таъсир кўрсатмаслиги, ҳар бир жараён давлат стандарти талабларига тўла жавоб бериши ва объектлар белгиланган муддатларда фойдаланишга топширилиши шартлиги алоҳида таъкидланди.
Давлат бюджети маблағлари ҳисобидан бунёд этилаётган бу каби иншоотлар халқимизнинг узоғини яқин, оғирини енгил қилишга қаратилган бўлиб, уларнинг сифатли ва мустаҳкам барпо этилиши устидан прокурор назорати бундан буён ҳам қатъий давом эттирилади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
