“ЭЗГУЛИК – ШИОРИМИЗ, МАЪРИФАТ – ҚУРОЛИМИЗ” ШИОРИ ОСТИДА МАЪНАВИЙ-МАЪРИФИЙ ТАДБИР БЎЛИБ ЎТДИ

Маънавий-маърифий ишлар самарадорлигини янада ошириш мақсадида Қорақалпоғистон Республикасининг барча туманлари бўйлаб 13-20 март кунлари мобайнида “Эзгулик – шиоримиз, маърифат – қуролимиз” шиори остида жойларда маънавий-маърифий тадбирлар ташкил этилмоқда. Ана шундай тадбирлардан бири Амударё тумани 9-сонли Болалар мусиқа ва санъат мактабида бўлиб ўтди.

Тарғибот тадбирида туман Мактабгача ва мактаб таълими бўлими бошлиғи Ялғаш Шомуродов, Жўқорғи Кенгес депутати Санобар Хўжамуродова, Маънавият ва маърифат маркази туман бўлими бошлиғи Ислом Маткаримов ҳамда тумандаги умумтаълим мактабларининг маънавий-маърифий ишлар бўйича директор ўринбосарлари иштирок этдилар.

Тадбир иштирокчилари дастлаб мусиқа мактаби ўқувчиларининг ижод маҳсулларидан ташкил этилган кўргазма билан танишдилар. Улар ўқувчилар томонидан дид билан тайёрланган ижод намуналарини катта қизиқиш билан томоша қилиб, ҳар бирига юқори баҳо бердилар.

Тадбирга ташриф буюрган масъуллар юртимиз бўйлаб 13-20 март кунлари мобайнида “Эзгулик – шиоримиз, маърифат – қуролимиз” шиори остида жойларда маънавий-маърифий тадбирлар ўтказилаётгани, жумладан, туманимизда ҳам фаол хотин-қизлар, ибратли оила бекалари, фан, таълим, маданият каби йўналишларда муваффақиятга эришган ёшларни жалб этган ҳолда ташкил этиш лозимлигини таъкидлашди.

Мазкур тадбирларда юртимиз аёлларига ҳурмат-эҳтиром кўрсатиш, уларнинг жамиятдаги ўрнини юксалтиришга алоҳида эътибор қаратиш кераклиги айтилиб, Рамазон ойи ва Наврўз байрами шарофати билан эҳтиёжманд оилалар ҳолидан хабар олиш, умуман, халқимиз ва ёшларимиз онг-у шуурида ватанпарварлик, юртга садоқат туйғуларини янада камол топтириш каби эзгу ишларни амалга ошириш лозимлиги тўғрисида сўз борди.

Таъкидлаб ўтилганидек, мамлакатимизда хотин-қизларимиз учун ҳам муносиб шароитларни яратиб бериш, уларни ҳар томонлама қўллаб-қувватлаш давлат сиёсатининг муҳим йўналишига айланган. Давлатимиз раҳбари ҳам жорий йил 7 март куни Халқаро хотин-қизлар кунига бағишланган тантанали маросимдаги нутқида бунга алоҳида эътибор қаратди. Барча аёлларга мурожаат қилиб, маънавий тарбия ишларини энди мутлақо янгича усулда олиб бориш, “Эзгулик – шиоримиз, маърифат – қуролимиз” деган ғоя асосида бу жараённи аввало оиладан, маҳалладан бошлаш борасида вазифалар белгилаб берилди.

Тадбир давомида сўзга чиққанлар шу хусусда сўз юритиб, мамлакатимизда хотин-қизларимиз учун ҳам муносиб шароитларни яратиб бериш, уларни ҳар томонлама қўллаб-қувватлаш давлат сиёсатининг муҳим йўналишига айланганини эътироф этишди. Аёл-қизларимизнинг ўқиб, олий маълумотли бўлиши, касб-ҳунар эгаллаши оила бахти, фарзандлар камоли учун, шу асосда бутун жамият равнақи учун хизмат қилишини таъкидлашди.

Шунингдек, муҳтарам Президентимизнинг Қорақалпоғистон Республикасини ҳар томонлама ривожлантириш мақсадида илгари сурган ислоҳотлари, Фармон ва Қарорлари мазмун-моҳияти ҳамда уларнинг ижроси юзасидан амалга оширилаётган ишлар хусусида ҳам сўзлаб, уларнинг бугунги кундаги самарасини тилга олиб ўтишди.

Маънавий-маърифий тадбирда концерт дастурлари ҳам намойиш этилиб, самимий суҳбатларга ҳамоҳанг тарзда “Эзгулик – шиоримиз, маърифат – қуролимиз” деган ғояга алоҳида урғу берилди.

О.Худойберганова.