Илм-маърифат нурини таратаётган маскан: 84-сонли мактаб фаолияти ҳақида

Таълим – ҳар қандай жамият тараққиётининг, миллат келажагининг мустаҳкам пойдеворидир. Бугунги кунда юртимизнинг қайси бир гўшасига борманг, ёш авлодга сифатли билим бериш, уларни баркамол инсонлар этиб тарбиялаш йўлида кенг кўламли ишлар амалга оширилаётганига гувоҳ бўласиз. Ана шундай эзгу мақсадларнинг амалдаги ёрқин ифодасини Амударё тумани мисолида ҳам яққол кўриш мумкин. Туман Мактабгача ва мактаб таълими бўлимига қарашли 84-сонли умумтаълим мактаби гарчи яқинда, яъни 2019 йилнинг сентябрь ойида янгидан ташкил қилинган бўлса-да, қисқа вақт ичида катта ютуқларга эришиб, илм-маърифат нурини таратувчи етакчи масканлардан бирига айланиб улгурди. Айни пайтда мазкур билим даргоҳида жами 17 та синф мавжуд бўлиб, уларда 382 нафар ўқувчи таълим-тарбия олиб келмоқда.

Албатта, ҳар қандай мактабнинг нуфузи ва таълим сифати, энг аввало, унда фаолият юритаётган устозларнинг касбий маҳорати билан белгиланади. Бу борада 84-сонли мактабнинг педагогик жамоаси ўзининг юксак салоҳияти, тинимсиз изланиши ва катта тажрибаси билан алоҳида эътиборга лойиқдир. Билим масканида ўқувчиларга сабоқ бериб келаётган жами 34 нафар педагогдан иборат аҳил жамоанинг 3 нафари олий тоифали, 10 нафари 1-тоифали, 11 нафари 2-тоифали ва яна 11 нафари мутахассис тоифасига эга бўлган ўқитувчилардир. Бу рақамлар замирида устозларнинг машаққатли меҳнати ва таълим сифатини ошириш йўлидаги тинимсиз ҳаракатларининг самараси мужассамдир.

Мактабнинг тарбия фани бўйича олий тоифали ўқитувчиси Ўмирбек Жумамуратов аттестация синовларида 94 балл тўплаб, муваффақиятли иштирок этди ва 70 фоизлик устамага эга бўлди. Бундан ташқари, у “Энг яхши ҳуқуқ фани ўқитувчиси” танловида туманда фахрли 2-ўринни эгаллаб, республика босқичига йўлланмани қўлга киритди.

Бошланғич синфларнинг олий тоифали ўқитувчиси Озода Матниёзова ҳам аттестация жараёнларида 88 балл билан қатнашиб, 70 фоизлик устамага сазовор бўлди. Қолаверса, мактабнинг бошқа фан ўқитувчилари ҳам аттестация синовларида фаол ва муваффақиятли қатнашиб, юқори натижаларни қайд этиб келмоқда.

Бундай ижобий кўрсаткичлар замирида таълим муассасаси раҳбариятининг ҳам муносиб ҳиссаси борлигини таъкидлаш жоиз. Мактаб директори Эркинбой Қурбанбоев таълим тизимидаги самарали меҳнатлари учун “Қорақалпоғистон Республикаси халқ таълими аълочиси” ҳамда “Ўз касбининг фидойиси” кўкрак нишонлари билан тақдирланган. Ўқув ишлари бўйича директор ўринбосари Музаффар Жуманиёзов эса Менежерлик сертификатини қўлга киритишга муваффақ бўлган. Таълим даргоҳининг амалиётчи психологи Нигорахон Сапарованинг хизматлари ҳам муносиб эътироф этилиб, “Ўзбекистон Республикаси халқ таълими аълочиси” кўкрак нишони билан тақдирланган.

Замонавий таълим тизимида педагогларнинг халқаро ва миллий даражадаги сертификатларга эга бўлиши уларнинг касбий маҳоратини белгиловчи асосий мезонлардан биридир. Бу борада ҳам мактаб жамоаси пешқадам муассасалар сафидан ўрин олган. Жумладан, рус тили ўқитувчиси Одилбек Якубжанов халқаро TRKI сертификати соҳиби бўлса, математика ўқитувчиси Юнусбек Раҳимов халқаро SAT сертификати эгасидир. Шунингдек, математика ўқитувчиси Санъат Бобожонов миллий фан сертификатига эга. Бошланғич синф ўқитувчиларидан Озода Матниёзова, Сабоҳат Юсупова, Феруза Кенжаева ва Гулноза Жумабоевалар ҳам миллий фан сертификатларини қўлга киритганликлари уларнинг ўз касбига бўлган масъулиятидан далолат беради. Инглиз тили ўқитувчиси Мавлуда Отабоева халқаро TKT ҳамда миллий B2 даражасидаги сертификатларига эга бўлиб, ўқувчиларга хорижий тилларни жаҳон стандартлари асосида ўргатиб келмоқда.

Бундай билимли педагогларнинг қўлида таълим олаётган ўқувчилар ҳам юқори натижаларни қўлга киритиб, мактаб шаънини юксакларга кўтармоқдалар. Хусусан, 11-синф ўқувчиси Мадина Раҳимбоева кимё ва биология фанларидан, 10-синф ўқувчиси Севинчой Матниёзова инглиз тили фанидан, 10-синф ўқувчиси Феруза Қодирова эса она тили ва адабиёт фанидан миллий фан сертификатларини қўлга киритишга муваффақ бўлдилар.

Бундан ташқари, ўқувчиларнинг халқаро олимпиадалардаги иштироки ва ғалабалари ҳам алоҳида эътиборга молик. 2-синф ўқувчиси Камола Рустамова халқаро IREN олимпиадасининг республика босқичида муваффақиятли иштирок этиб, фахрли 5-ўринни эгаллади. Шунингдек, нуфузли KENGURU олимпиадасида 3-синф ўқувчиси Сулаймон Пўлатбоев, 2-синф ўқувчилари Камола Рустамова, Одилбек Муратбоев, Маржона Шерифбоева, Азамжон Тоҳиров, Зебузар Жамоладдинова ва Диёрбек Холмуратовлар иштирок этиб, фахрли ўринларни эгаллашди.

Мактабда ўқувчиларнинг нафақат интеллектуал, балки ижодий ва жисмоний қобилиятларини ривожлантиришга ҳам катта эътибор қаратилмоқда. Ёш ижодкорлардан иборат “Турон” мактаб театри жамоаси ҳудудда биринчи ўринни эгаллаб, туман босқичига йўлланмани қўлга киритди ва туманда ҳам фахрли ўринларни эгаллаб қайтди. “Беш ташаббус” доирасида ўтказилган спорт мусобақаларида ҳам ёшлар ўзларининг маҳоратларини намойиш этишмоқда. Шахмат бўйича 7-синф ўқувчиси Умирбек Ўразбоев туманда 3-ўринни эгаллаган бўлса, 4-синф ўқувчиси Сарвар Қадамбоев ва 9-синф ўқувчиси Юнусбек Турсунбоев ҳудуд босқичида 1-ўринни эгаллаб, туман босқичига йўлланма олдилар.

Спортнинг “Қўл жанги” тури бўйича эришилган ютуқлар эса янада қувонрли бўлди. Мактабнинг 7-синф ўқувчиси Маржона Ҳабибуллаева республика босқичида фахрли 1-ўринни эгаллаб, кейинги босқич – Бухоро шаҳрида бўлиб ўтадиган беллашувга йўлланмани қўлга киритди. 11-синф ўқувчиси Дурдона Ибодуллаева эса туманда 1-ўринни эгаллаб, республика босқичига йўлланма олди.

Хулоса ўрнида айтиш мумкинки, бугунги кунда 84-сонли умумтаълим мактаби чинакам маърифат ўчоғига айланган. Юқорида қайд этилган барча ёрқин натижалар, энг аввало, мактаб жамоасининг фидокорона ва ҳалол меҳнати, устозларнинг юқори касбий маҳорати ҳамда ўқувчиларнинг билимга, спортга ва санъатга бўлган чексиз интилишининг яққол исботидир. Бундай мустаҳкам пойдевор ва юксак мақсадлар бор экан, мазкур таълим масканидан келажакда юртимиз равнақига муносиб ҳисса қўшадиган етук ва баркамол авлод етишиб чиқишига ҳеч қандай шубҳа йўқ.