Эл ардоғидаги шоира

Ўзбекистон Республикаси Президентининг 2014 йил 31 октябрдаги "Ўзбекистон халқ шоири Зулфия таваллудининг 100 йиллигини нишонлаш тўғрисида”ги қарори бутун мамлакатимизда бўлгани каби туманимизда ҳам кенг жамоатчилик, адабиёт ихлосмандлари, сўз қадрини билган инсонлар томонидан аёл зотига, адабиётимизга юксак эҳтиром намунаси сифатида мамнуният билан кутиб олинди.

Ўзбекистон халқ шоири Зулфиянинг Ватанга муҳаббат, вафо ва садоқат каби олийжаноб фазилатларни тараннум этган асарлари, ибратли ҳаёти ва фаолияти билан миллий адабиётимиз ривожига, халқимиз маънавиятини юксалтиришга қўшган улкан ҳиссасини ўсиб келаётган ёш авлод онг-у шуурига етказиш, Зулфияхоним ижоди ва ҳаётини ёшлар ўртасида янада кенг тарғиб этиш мақсадида туман ҳокимлигининг чора-тадбирлар режаси ишлаб чиқилди. Туманимиздаги барча таълим муассасаларида, овул ва маҳаллаларда Зулфия ҳаёти ва ижодига бағишланган давра суҳбатлари, ижодий учрашувлар, адабий-бадиий кечалар ўтказилмоқда. Умумтаълим мактаблари, академик лицей ва касб-ҳунар коллежларида "Зулфияхоним қизлари” деб номланган адабий тўгараклар ишлаб турибди.

Президентимизнинг 1999 йил 10 июндаги Қарори билан Зулфия номидаги Давлат мукофоти таъсис этилди. Мамлакатимизда ҳар йили ушбу мукофот учун 14 ёшдан 22 ёшгача бўлган истеъдодли қизлар ўртасида танлов ўтказилиб, энг иқтидорли қизлар ушбу мукофотга сазовор бўлишмоқда. Бу танлов истеъдодли қизларни ҳар томонлама рағбатлантириб, ўз иқтидорларини намоён қилиши учун кенг имконият эшикларини очмоқда. Туманимизда ҳам Зулфия ижодига ҳавас қилиб, шеърият йўлини танлаган, таълим, спорт, санъат, маданият соҳасида ўзларининг иқтидорларини намоён этишга интилган қизлар сони йил сайин ортиб бормоқда.

Юртбошимизнинг ушбу қарори яна шуниси билан аҳамиятлики, унда ўзбек аёлининг маънавияти улуғланган, десак ҳеч муболаға бўлмайди.

"Юксак маънавият – енгилмас куч” асарида: "Нафақат ўз шеърлари, балки бутун ҳаёти билан ўзбек аёлининг маънавий қиёфасини намоён этган атоқли шоирамиз Зулфияхонимни ҳам мен ана шундай фидойи инсонлар қаторига қўшган бўлардим. Унинг жаҳон минбарларидан янграган шеърлари Шарқ аёлининг ақлу закоси, фазлу камолининг ёрқин ифодаси сифатида миллионлаб шеърият мухлисларига одамийлик, муҳаббат ва садоқатдан сабоқ берган, десак муболаға бўлмайди. Аслида, бу дунёда айрилиқ ва ҳижрон азоби барчанинг ҳам бошида бор. Аммо ғам-андуҳ ва ҳасратларни матонат билан енгиб, тоғдек бардоши билан вафо ва садоқат рамзига айланган Зулфия опа сингари аёллар ҳар қандай юксак ҳурмат ва эҳтиромга муносибдир” деб ёзади Президентимиз Ислом Каримов.

Мустақиллик йилларида юртимизда аёлга, онага юксак эътибор ва эҳтиром кўрсатилмоқда. Буни Мустақиллик майдонидаги Бахтиёр Она, Хотира хиёбонидаги мотамсаро Она, Ватанга қасамёд ҳайкалида фарзандининг ой бориб, омон қайтишини тилаб дуога қўл очган мўътабар она сиймосида кўришимиз мумкин. Бу эҳтиром шоира Зулфия хотирасига ўрнатилган муҳташам ҳайкалда янада юксакроқ намоён бўлади.

Ўзбекистон Хотин-қизлар қўмитаси ташаббуси билан бутун мамлакатимизда бўлгани каби туманимиздаги барча умумтаълим мактаблари, академик лицей ва касб-ҳунар коллежларида9-14 февраль кунлари "Ораста қизлар” тўгаракларида "12 йиллик мажбурий таълим – биз қизлар учун ўта муҳим ва зарур” деб номланган ҳафталик доирасида ўқувчи-қизлар томонидан Зулфия ижодидан намуналар ўқилди. Шоира Зулфияўлмас ижоди ва ўчмас ҳаёти билан тарихимизнинг ажралмас қисми сифатида бугун халқимиз, шу жумладан ёшлар қалбида мангу яшайверади.

Шоира меросиниўрганиб ўсган қизлар жамиятда, шу жумладан оила ва маҳаллада ўз ўрнини топиб, ўзаро ҳурмат ва ҳамжиҳатликни мустаҳкамлашга, вафо ва садоқат, меҳр-оқибат, шафқат ва мурувват туйғуларининг қадрига етиб яшашга ҳисса қўшадилар, албатта.

Марям АҲМЕДОВА, туман ҳокими ўринбосари, Хотин-қизлар қўмитаси раиси.