Амударёлик шоира Зулфия Оллоёрованинг 60 йиллик юбилейи кенг нишонланди

Халқимизнинг кўнгилларни тўлқинлантириб юборувчи анъаналари, бири-бирига билдирадиган эзгу тилаклари кўп. Дуога қўл очган кексалар: “Орзу-ниятларинг амалга ошсин, мурод-мақсадларингга етгин”, дея тилак билдиришлари бежизга эмас. Чунки инсоннинг инсонга яхшиликлар тилаши унинг нафақат руҳий ҳолатида кўтаринки кайфият уйғотади, балки орзулари рўёби учун қанот ҳам бағишлайди. Бу тилаклар анъанавий тарзда инсонларнинг энг яхши, қувончли кунларида такрор-такрор жаранглайди. Амударёлик шоира Зулфия Оллоёрова учун 2024 йилнинг октябрь ойи ана шундай гўзал тилаклар билан ҳаётига файз бағишлади. Айнан ана шу куни у умрининг 60 баҳорини қаршилади.

Зулфия Оллоёрова 1964 йилнинг 25 октябрь санасида оддий деҳқон оиласида дунёга келди. Табиатан меҳнаткаш ва китобсевар бўлган отаси Ҳайитбой Оллоёров билан онаси Бибисора оналар илк фарзанди бўлган қизалоққа буюк оташнафас шоира Зулфияхоним ижодига меҳрлари баландлигидан, қолаверса, қизимиз шоира бўлсин, деган орзу билан Зулфия деб ном бердилар.

Ота-она орзусими, чин кўнгилдан қилган дуоларими, Зулфия улғайгани сари ижодга мойил, шоиртабиат қиз бўлиб вояга етди. Айниқса, узун қиш тунларида отаси Ҳайитбой отанинг бири-биридан қизиқарли эртак ва ривоятлари, оиладаги 5 нафар қизларнинг бири олиб, бири қўйиб шеърхонлик қилишлари унинг фикри чархланиб, ижод майдонига дадил кириб келиши учун замин яратди. Кўпчилик шоир ва ёзувчиларни катта шаҳарлар тарбиялаб, камолга етказади, деган фикрни билдиришади. Аслида эса ҳақиқий ижодкор учун манзил ва маконнинг аҳамияти йўқ. Бунга Зулфия Оллоёрованинг ҳаёти ва ижодий фаолияти яққол мисол. Зулфия, аввало, ўзининг ҳаёт синовларига бардоши, сабр-у матонати билан бошқалардан фарқ қилади.

Илк меҳнат фаолиятини Манғит шаҳридаги халқ истеъмол моллари ишлаб чиқариш корхонасида оддий ишчи бўлиб ишлашдан бошлаган Зулфия Оллоёрова кеч бўлса-да ўз билимини бойитиш мақсадида Амударё агробизнес касб-ҳунар коллежида бошланғич таълим ўқитувчиси йўналишида таҳсил олди. Бахтли-саодатли турмушига кўз тегдими, умр йўлдоши Холбой Ортиқов 31 ёшида вафот этиб, икки нафар фарзанди билан ҳаётининг қолган қисмини ёлғизлик ўз домига тортганида ҳам у қаламини қўлидан қўймади.

Ижодини, орзуларини тушунадиган, уни доимо қўллаб-қувватлайдиган азиз инсонидан эрта айрилган Зулфия бор меҳрини фарзандларига берди, гоҳ ярим тунларда, болалари ширин уйқуга кетган паллаларда, гоҳ ўзи ишлайдиган корхонада тушлик қилган дамларида дардларини пинҳон тутиб, эзгу орзуларини қаламга олди. “Зебо” тахаллуси билан шеърлар ёзди, билимини бойитиш мақсадида мумтоз адабиёт намуналарини тинмай мутолаа қилди.

Ўқиб-ўрганишдан, изланишдан асло чарчамаган Зулфиянинг интилишларини зимдан кузатадиган отаси эса ҳар доим “шоира қизим, Зулфия қизим”, деб кўнглини кўтариб қўйишлари унга ҳақиқий илҳом лаҳзаларини ато этди.

Вақт – ҳамма нарсага, айниқса, инсонинг дилини ўртаган дардларига малҳам, дейдилар. Фарзандлари улғайган сари Зулфия Оллоёрованинг ижодий фаолияти ҳам такомилга етиб борди. Айниқса, “Баркамол авлод” болалар мактабида, тўгарак раҳбари сифатида ишлаган даври Зулфия учун ҳақиқий ижод дамларини ато этди. Бу ерда ижоддаги илк устози, Қорақалпоғистон Республикасида хизмат кўрсатган маданият ходими, мазкур мактабнинг директори, таниқли шоира ва журналист Хонимжон Ражабовадан шеърий талаблар юзасидан олган маслаҳатлари, деярли ҳар куни ўтказиладиган адабий суҳбатлар унинг ижодида кескин бурилиш ясади.

Устозининг қўллаб-қувватлаши, беғараз ёрдами билан 2008-2010 йиллар оралиғида “Муҳаррир” нашриётида кетма-кет учта шеърий тўпламлари – “Уфққа қоқилган ишқ”, “Дунёлиқда дунё ранглари”, “Кўнгилнинг чор нағмаси” китоблари нашр этилди. 2013 йилда эса “Сүйемен ақ булттай пәклик жoлын” номли шеърлар тўплами “Қарақалпақстан” нашриётида, қорақалпоқ тилида нашрдан чиқди.

Зулфия Оллоёрова жорий йил 25 октябрда табаррук 60 ёшга тўлди. Ҳаётини миллий-маънавий қадриятларни мустаҳкамлаш, ёш авлодни ватанпарварлик руҳида тарбиялашдек эзгу ишга бағишлаган шоирани қувончли кунида муборакбод этиш учун устоз ва шогирдлари, яқин дўстлари шу куни Амударё туман маданият марказининг тантаналар саройига ташриф буюришди.

Амударё туман ҳокимлиги томонидан ташкил этилган юбилей кечасида туман ҳокими ўринбосари Нодирбек Камолов шоирани қутлуғ 60 йиллик юбилейи билан табриклади ва Махпират номидаги Ўрта Осиё халқлари тарихи институти қошидаги Турон Фанлар Академияси нодавлат нотижорат ташкилотининг Абдулла Қодирий номидаги кўкрак нишонини Зулфия Оллаёровага тантанали равишда топширди.

Шу куни устозлари, шогирдлари меҳридан кўнгли обод шоирани тадбир иштирокчилари турфа гулдасталар, гўзал ва эзгу тилаклар билан самимий муборакбод этдилар ва шоирага янада жўшқин ижод ёр бўлишини тиладилар.

Робия Йўлдошева