Меҳнат фахрийси, жамоат арбоби Янгибой Ражаповнинг 80 йиллик юбилейи нишонланди

Инсон умрининг ҳақиқий мазмуни ва моҳияти унинг ортидан қолдирган эзгу ишлари, эл-юрт фаровонлиги йўлидаги фидокорона меҳнати, жамиятда топган ҳурмати ва албатта, ўзидан кейинги авлодларга бера олган гўзал тарбияси билан ўлчанади. Бугун Амударё туманининг Қангли овулида жойлашган "Турон" тўйхонасида ана шундай сермазмун ва ибратли ҳаёт йўлини босиб ўтган инсон, меҳнат фахрийси ва жамоат арбоби Янгибой Ражаповнинг 80 йиллик юбилейи муносабати билан тантанали тадбир бўлиб ўтди. Мазкур файзли ва унутилмас кечада қаҳрамонимизнинг оила аъзолари, фарзандлари, невара-чеваралари, яқин дўстлари, қариндошлари ва собиқ касбдошлари жам бўлиб, уни бу табаррук ёши билан самимий қутладилар. Тантанали даврада Янгибой Ражаповнинг энг яқин сафдошлари ва қариндошлари сўзга чиқиб, унинг сермазмун ҳаёт йўли, юксак инсоний фазилатлари ҳақида илиқ ва самимий дил сўзларини изҳор этдилар.

Янгибой Ражапов 1946 йилда дунёга келган. Унинг болалик йиллари Иккинчи жаҳон уруши эндигина тугаган, эл-юрт бошида оғир синовлар турган, қимматчилик ва йўқчилик одамларнинг турмуш тарзида ҳамда руҳиятида ўз изини қолдирган ниҳоятда мураккаб даврга тўғри келди. Урушдан кейинги оғир жароҳатлар аста-секин битиб, ҳаёт ўз изига туша бошлаган паллада, яъни 1952 йилнинг кузида 6 ёшга тўлган Янгибой ўзи туғилиб ўсган Қангли овулидаги Йўлдош Охунбобоев номли 7 йиллик мактабнинг 1-синфига қадам қўйди. Онаси ўз қўллари билан тикиб берган янги кийим ва китоб халтасини кўтариб, илм даргоҳига илк бор қадам қўйган кунини у орадан қанча йиллар ўтса ҳамки, ҳамон чексиз ҳаяжон ва завқ билан хотирлайди. Айнан мана шу тарихий кун унинг бутун келажак ҳаётини, фаолиятининг дебочасини ва мақсадларини белгилаб берган энг муҳим таянч нуқтаси эди.

Мактабда фақат аъло баҳоларга ўқиган қаҳрамонимиз қишлоқдаги 7 йиллик таълимни муваффақиятли тамомлагач, 1959-1963 йиллар давомида уйидан 7-8 километр узоқликда жойлашган мактабга пиёда қатнаб, ўрта маълумот олишга муваффақ бўлди.

Отасининг вафоти ва оилавий шароитнинг оғирлиги сабабли марказий шаҳарларга кетиб олийгоҳда ўқиш имкони бўлмади ва у 1963 йилда жамоа хўжалигида оддий ишчи бўлиб ўз меҳнат фаолиятини бошлади. 2 йиллик машаққатли меҳнатдан сўнг, қатъияти сабабли 1964 йилда Нукус шаҳридаги гидротехникумга ўқишга кириб, 1965 йилда уни аъло баҳоларга тамомлади. Сўнгра 1965-1968 йилларда ҳарбий хизматни ўтаб қайтди.

Янгибой Ражабов 1970-1980 йилларда Ёшлар уюшмаси фаоли сифатида ва бошқа кўплаб масъулиятли лавозимларда самарали ишлади. 1991 йилда юртимиз мустақилликка эришгач, бошқарув тизимида юз берган ўзгаришлар даврида у туман кенгаши раиси, кейинчалик эса Амударё тумани раҳбари этиб тайинланди. Бу даврда Янгибой Ражапов туманнинг иқтисодий салоҳиятини юксалтириш ва аҳоли турмуш фаровонлигини оширишга беқиёс ҳисса қўшди. Унинг эл-юрт олдидаги ҳалол меҳнатлари юксак баҳоланиб, 1978 йилда “Меҳнатдаги ўрнаклиги учун” медали билан тақдирланган. 2022 йилда Маҳаллалар кенгаши томонидан унга “Меҳнат фахрийси” кўкрак нишони топширилди. 2023 йилда фаол жамоатчи ва ёшларга ибрат мактабини яратган инсон сифатида “Ардоқли нуроний” кўкрак нишонига сазовор бўлди.

Янгибой Ражапов нафақат эл-юрт корига яраган раҳбар, балки ниҳоятда оилапарвар ва меҳрибон инсондир. У умр йўлдоши Розия опа билан ҳаётнинг бор қувончу ташвишларини баҳам кўриб, биргаликда эл хизматига камарбаста бўлган фарзандларни тарбиялаб вояга етказдилар.

Катта қизи Феруза ҳамшира бўлиб ишлайди. Катта ўғли Музаффар Нукус давлат педагогика институтида ўқитувчи бўлиб фаолият юритади. Иккинчи ўғли Хайрулла тез тиббий ёрдам бўлимида ишлайди. Қизи Фарида тадбиркор бўлиб элга хизмат қилиб келмоқда. Оламдан ўтган кичик қизи Холида эса ҳамшира эди.

Бугунги кунда Янгибой Ражапов умр йўлдоши Розия опа билан биргаликда пир-у бадавлат отахон ва онахонлар бўлиб, эл-юрти ва шогирдлари ардоғида, фарзандлари эъзозида, шунингдек, суюкли невара ва эвараларининг қувончига шерик бўлиб, файзли ва шукроналикка тўла умр кечирмоқдалар.

Унинг 80 йиллиги шарафига уюштирилган юбилей тантанаси яқинлари ва дўст-ёронларининг эзгу тилаклари, чиройли куй-қўшиқлар билан давом этди. Бундай сермазмун ва шарафли ҳаёт йўли нафақат унинг оила аъзолари, балки бутун жамият, хусусан, бугунги ва келажак ёш авлод учун ҳақиқий матонат, меҳнатсеварлик, ватанпарварлик ҳамда садоқат мактаби бўлиб хизмат қилиши шубҳасиздир.

Фурсатдан фойдаланиб биз ҳам Янгибой ота Ражабовни табаррук 80 ёши билан қутлаб, унга узоқ умр, мустаҳкам саломатлик ва ҳамма ҳавас қилгулик бахт тилаймиз!