Mehnat faxriysi, jamoat arbobi Yangiboy Rajapovning 80 yillik yubileyi nishonlandi

Inson umrining haqiqiy mazmuni va mohiyati uning ortidan qoldirgan ezgu ishlari, el-yurt farovonligi yoʻlidagi fidokorona mehnati, jamiyatda topgan hurmati va albatta, oʻzidan keyingi avlodlarga bera olgan goʻzal tarbiyasi bilan oʻlchanadi. Bugun Amudaryo tumanining Qangli ovulida joylashgan "Turon" toʻyxonasida ana shunday sermazmun va ibratli hayot yoʻlini bosib oʻtgan inson, mehnat faxriysi va jamoat arbobi Yangiboy Rajapovning 80 yillik yubileyi munosabati bilan tantanali tadbir boʻlib oʻtdi. Mazkur fayzli va unutilmas kechada qahramonimizning oila aʼzolari, farzandlari, nevara-chevaralari, yaqin doʻstlari, qarindoshlari va sobiq kasbdoshlari jam boʻlib, uni bu tabarruk yoshi bilan samimiy qutladilar. Tantanali davrada Yangiboy Rajapovning eng yaqin safdoshlari va qarindoshlari soʻzga chiqib, uning sermazmun hayot yoʻli, yuksak insoniy fazilatlari haqida iliq va samimiy dil soʻzlarini izhor etdilar.

Yangiboy Rajapov 1946-yilda dunyoga kelgan. Uning bolalik yillari Ikkinchi jahon urushi endigina tugagan, el-yurt boshida ogʻir sinovlar turgan, qimmatchilik va yoʻqchilik odamlarning turmush tarzida hamda ruhiyatida oʻz izini qoldirgan nihoyatda murakkab davrga toʻgʻri keldi. Urushdan keyingi ogʻir jarohatlar asta-sekin bitib, hayot oʻz iziga tusha boshlagan pallada, yaʼni 1952-yilning kuzida 6 yoshga toʻlgan Yangiboy oʻzi tugʻilib oʻsgan Qangli ovulidagi Yoʻldosh Oxunboboyev nomli 7 yillik maktabning 1-sinfiga qadam qoʻydi. Onasi oʻz qoʻllari bilan tikib bergan yangi kiyim va kitob xaltasini koʻtarib, ilm dargohiga ilk bor qadam qoʻygan kunini u oradan qancha yillar oʻtsa hamki, hamon cheksiz hayajon va zavq bilan xotirlaydi. Aynan mana shu tarixiy kun uning butun kelajak hayotini, faoliyatining debochasini va maqsadlarini belgilab bergan eng muhim tayanch nuqtasi edi.

Maktabda faqat aʼlo baholarga oʻqigan qahramonimiz qishloqdagi 7 yillik taʼlimni muvaffaqiyatli tamomlagach, 1959-1963-yillar davomida uyidan 7-8 kilometr uzoqlikda joylashgan maktabga piyoda qatnab, oʻrta maʼlumot olishga muvaffaq boʻldi.

Otasining vafoti va oilaviy sharoitning ogʻirligi sababli markaziy shaharlarga ketib oliygohda oʻqish imkoni boʻlmadi va u 1963-yilda jamoa xoʻjaligida oddiy ishchi boʻlib oʻz mehnat faoliyatini boshladi. 2 yillik mashaqqatli mehnatdan soʻng, qatʼiyati sababli 1964-yilda Nukus shahridagi gidrotexnikumga oʻqishga kirib, 1965-yilda uni aʼlo baholarga tamomladi. Soʻngra 1965-1968-yillarda harbiy xizmatni oʻtab qaytdi.

Yangiboy Rajabov 1970-1980-yillarda Yoshlar uyushmasi faoli sifatida va boshqa koʻplab masʼuliyatli lavozimlarda samarali ishladi. 1991-yilda yurtimiz mustaqillikka erishgach, boshqaruv tizimida yuz bergan oʻzgarishlar davrida u tuman kengashi raisi, keyinchalik esa Amudaryo tumani rahbari etib tayinlandi. Bu davrda Yangiboy Rajapov tumanning iqtisodiy salohiyatini yuksaltirish va aholi turmush farovonligini oshirishga beqiyos hissa qoʻshdi. Uning el-yurt oldidagi halol mehnatlari yuksak baholanib, 1978-yilda “Mehnatdagi oʻrnakligi uchun” medali bilan taqdirlangan. 2022-yilda Mahallalar kengashi tomonidan unga “Mehnat faxriysi” koʻkrak nishoni topshirildi. 2023-yilda faol jamoatchi va yoshlarga ibrat maktabini yaratgan inson sifatida “Ardoqli nuroniy” koʻkrak nishoniga sazovor boʻldi.

Yangiboy Rajapov nafaqat el-yurt koriga yaragan rahbar, balki nihoyatda oilaparvar va mehribon insondir. U umr yoʻldoshi Roziya opa bilan hayotning bor quvonchu tashvishlarini baham koʻrib, birgalikda el xizmatiga kamarbasta boʻlgan farzandlarni tarbiyalab voyaga yetkazdilar.

Katta qizi Feruza hamshira boʻlib ishlaydi. Katta oʻgʻli Muzaffar Nukus davlat pedagogika institutida oʻqituvchi boʻlib faoliyat yuritadi. Ikkinchi oʻgʻli Xayrulla tez tibbiy yordam boʻlimida ishlaydi. Qizi Farida tadbirkor boʻlib elga xizmat qilib kelmoqda. Olamdan oʻtgan kichik qizi Xolida esa hamshira edi.

Bugungi kunda Yangiboy Rajapov umr yoʻldoshi Roziya opa bilan birgalikda pir-u badavlat otaxon va onaxonlar boʻlib, el-yurti va shogirdlari ardogʻida, farzandlari eʼzozida, shuningdek, suyukli nevara va evaralarining quvonchiga sherik boʻlib, fayzli va shukronalikka toʻla umr kechirmoqdalar.

Uning 80 yilligi sharafiga uyushtirilgan yubiley tantanasi yaqinlari va doʻst-yoronlarining ezgu tilaklari, chiroyli kuy-qoʻshiqlar bilan davom etdi. Bunday sermazmun va sharafli hayot yoʻli nafaqat uning oila aʼzolari, balki butun jamiyat, xususan, bugungi va kelajak yosh avlod uchun haqiqiy matonat, mehnatsevarlik, vatanparvarlik hamda sadoqat maktabi boʻlib xizmat qilishi shubhasizdir.

Fursatdan foydalanib biz ham Yangiboy ota Rajabovni tabarruk 80 yoshi bilan qutlab, unga uzoq umr, mustahkam salomatlik va hamma havas qilgulik baxt tilaymiz!