Таниқли шоира ва публицист Муҳтарама Улуғова амударёлик ижодкор ёшлар билан учрашди

Ижод аҳли азалдан сайёр халқ. Нафақат касбий фаолияти, балки шахс сифатидаги мавқеи жиҳатидан ҳам, айниқса, ёзувчи ва шоирларнинг умр йўллари халқнинг эзгу орзу ва умидлари билан чамбарчас туташиб кетган. Шу боис, улар ўз ҳаётларининг асосий қисмини халқ орасида ўтказадилар. Кўнгилларни тебратувчи гўзал шеърлар, инсон қалбини тозартириб, ҳаётдан завқ олиб яшашга ундовчи етук бадиий асарлар уларнинг ижодий сафарларида дунёга келади.

Ўзбекистонда хизмат кўрсатган маданият ходими, "Шуҳрат" медали ва "Меҳнат шуҳрати" орденлари соҳибаси, таниқли шоира ва публицист Муҳтарама Улуғованинг ҳар галги янги чиққан китоблари жуда тез оммалашиб, қўлма-қўл бўлиб кетади, халқимиз томонидан севиб ўқилади. Умрининг 73-баҳорини қаршилаган шоира ҳамон халқ орасида.

Ўзбекистоннинг жаннатмакон, гўзал Фарғона вилоятида, олим-у фузалолар, ҳассос шоир-у ёзувчилар, соҳирқалб санъаткорлар юрти – Марғилон шаҳрида 1952 йилда таваллуд топган Муҳтарама Улуғова қарийб 60 йилдан бери ижод майдонида.

Унинг турли йилларда чоп этилган "Бойчечакнинг тушлари", "Муҳаббатга тўймасман сира", "Эй, дилим!" шеърий тўпламлари, Ўзбекистон халқ шоири, устози Зулфияхонимга бағишланган "Муҳаббат саройида мангу қолганлар", "Баҳор келди сени сўроқлаб" каби бадиий публицистик китоблари барча ёш тоифасидаги китобхонларнинг кўнгил мулкига айланган. Муҳтарамахоним ҳам устози Зулфияхоним каби табиат ва баҳор шайдоси.

Унинг ижодий сафарлари айнан шу фаслдан бошланишида ҳам ажиб рамзий маъно бор: қийғос гулга кирган чаман боғлар бағридан, кўксида бойчечаклар, лолақизғалдоқлар маржондай тизилган қир-у адирлардан, баҳорда бир бора яшнаб, кўзларни оладиган юртнинг чўл-у саҳроларидан битмас-туганмас завқ, илҳом олади.

Шоиранинг бу галги ижодий сафари Қорақалпоқ заминининг гўзал Амударё соҳилларидан бошланди. Амударё устига қурилган муҳташам Дўстлик кўпригида шоирани Ўзбекистон Ёзувчилар Уюшмаси аъзоси, Қорақалпоғистонда хизмат кўрсатган маданият ходими, "Баркамол авлод" болалар мактаби директори, шоира Хонимжон Ражабова, Амударё тумани ҳокимининг ўринбосари, оила ва хотин-қизлар бўлими бошлиғи Гўзал Сабуровалар кутиб олишди.

Шу куни туманимизнинг фахрий меҳмони Муҳтарама Улуғова билан "Баркамол авлод" болалар мактаби ўқувчи-ёшларининг учрашуви бўлиб ўтди. Учрашувда мазкур мактабнинг ижодкор ёшлари, шунингдек, Амударё туман Ички ишлар бўлими ходимлари, Манғит шаҳрининг Олмазор маҳалласи еттилиги аъзолари иштирок этишди.

Учрашувда Муҳтарама Улуғова "Баркамол авлод" болалар мактабининг ҳаваскор-ижодкор ўқувчилари, "Ёш журналист ва нотиқ" тўгараги аъзолари билан адабий суҳбат ўтказиб, ёш ижодкорларга ўзининг самимий тилакларини билдирди. Айниқса, шоиранинг ижод машаққатларини юксак маънавият ва илм орқали енгиб ўтиш, ижодий камолот сари интилиш борасидаги қизиқарли суҳбатлари, маслаҳат ва тавсиялари ёшларга манзур бўлди.

Ўз навбатида фахрий меҳмон учрашув ташкилотчиларига чин дилдан миннатдорчилик билдириб, янги шеърларидан ўқиб берди.

Шеърхонлик ва мароқли суҳбатлар тарзида ўтган учрашув тадбири иштирокчилар, айниқса, адабиёт ва шеъриятга ихлосманд ўқувчи-ёшлар учун ёрқин таассуротлар бахш этди.

РОБИЯ ЙЎЛДОШЕВА.