Taniqli shoira va publitsist Muhtarama Ulugʻova amudaryolik ijodkor yoshlar bilan uchrashdi

Ijod ahli azaldan sayyor xalq. Nafaqat kasbiy faoliyati, balki shaxs sifatidagi mavqei jihatidan ham, ayniqsa, yozuvchi va shoirlarning umr yoʻllari xalqning ezgu orzu va umidlari bilan chambarchas tutashib ketgan. Shu bois, ular oʻz hayotlarining asosiy qismini xalq orasida oʻtkazadilar. Koʻngillarni tebratuvchi goʻzal sheʼrlar, inson qalbini tozartirib, hayotdan zavq olib yashashga undovchi yetuk badiiy asarlar ularning ijodiy safarlarida dunyoga keladi.

Oʻzbekistonda xizmat koʻrsatgan madaniyat xodimi, "Shuhrat" medali va "Mehnat shuhrati" ordenlari sohibasi, taniqli shoira va publitsist Muhtarama Ulugʻovaning har galgi yangi chiqqan kitoblari juda tez ommalashib, qoʻlma-qoʻl boʻlib ketadi, xalqimiz tomonidan sevib oʻqiladi. Umrining 73-bahorini qarshilagan shoira hamon xalq orasida.

Oʻzbekistonning jannatmakon, goʻzal Fargʻona viloyatida, olim-u fuzalolar, hassos shoir-u yozuvchilar, sohirqalb sanʼatkorlar yurti – Margʻilon shahrida 1952-yilda tavallud topgan Muhtarama Ulugʻova qariyb 60-yildan beri ijod maydonida.

Uning turli yillarda chop etilgan "Boychechakning tushlari", "Muhabbatga toʻymasman sira", "Ey, dilim!" sheʼriy toʻplamlari, Oʻzbekiston xalq shoiri, ustozi Zulfiyaxonimga bagʻishlangan "Muhabbat saroyida mangu qolganlar", "Bahor keldi seni soʻroqlab" kabi badiiy publitsistik kitoblari barcha yosh toifasidagi kitobxonlarning koʻngil mulkiga aylangan. Muhtaramaxonim ham ustozi Zulfiyaxonim kabi tabiat va bahor shaydosi.

Uning ijodiy safarlari aynan shu fasldan boshlanishida ham ajib ramziy maʼno bor: qiygʻos gulga kirgan chaman bogʻlar bagʻridan, koʻksida boychechaklar, lolaqizgʻaldoqlar marjonday tizilgan qir-u adirlardan, bahorda bir bora yashnab, koʻzlarni oladigan yurtning choʻl-u sahrolaridan bitmas-tuganmas zavq, ilhom oladi.

Shoiraning bu galgi ijodiy safari Qoraqalpoq zaminining goʻzal Amudaryo sohillaridan boshlandi. Amudaryo ustiga qurilgan muhtasham Doʻstlik koʻprigida shoirani Oʻzbekiston Yozuvchilar Uyushmasi aʼzosi, Qoraqalpogʻistonda xizmat koʻrsatgan madaniyat xodimi, "Barkamol avlod" bolalar maktabi direktori, shoira Xonimjon Rajabova, Amudaryo tumani hokimining oʻrinbosari, oila va xotin-qizlar boʻlimi boshligʻi Goʻzal Saburovalar kutib olishdi.

Shu kuni tumanimizning faxriy mehmoni Muhtarama Ulugʻova bilan "Barkamol avlod" bolalar maktabi oʻquvchi-yoshlarining uchrashuvi boʻlib oʻtdi. Uchrashuvda mazkur maktabning ijodkor yoshlari, shuningdek, Amudaryo tuman Ichki ishlar boʻlimi xodimlari, Mangʻit shahrining Olmazor mahallasi yettiligi aʼzolari ishtirok etishdi.

Uchrashuvda Muhtarama Ulugʻova "Barkamol avlod" bolalar maktabining havaskor-ijodkor oʻquvchilari, "Yosh jurnalist va notiq" toʻgaragi aʼzolari bilan adabiy suhbat oʻtkazib, yosh ijodkorlarga oʻzining samimiy tilaklarini bildirdi. Ayniqsa, shoiraning ijod mashaqqatlarini yuksak maʼnaviyat va ilm orqali yengib oʻtish, ijodiy kamolot sari intilish borasidagi qiziqarli suhbatlari, maslahat va tavsiyalari yoshlarga manzur boʻldi.

Oʻz navbatida faxriy mehmon uchrashuv tashkilotchilariga chin dildan minnatdorchilik bildirib, yangi sheʼrlaridan oʻqib berdi.

Sheʼrxonlik va maroqli suhbatlar tarzida oʻtgan uchrashuv tadbiri ishtirokchilar, ayniqsa, adabiyot va sheʼriyatga ixlosmand oʻquvchi-yoshlar uchun yorqin taassurotlar baxsh etdi.

ROBIYa YOʻLDOShEVA.