“BARKAMOL AVLOD” BOLALAR MAKTABI OʻQUVChILARI TANIQLI ShOIR VA YoZUVChILAR BILAN UChRAShDILAR

Bir sheʼriyat davrasida Alloh rahmat qilsin, hurmatli ustozim, taniqli adabiyotshunos olim, Oʻzbekiston Qahramoni Ozod Sharofiddinov: “... Sheʼr – ijtimoiy hodisa, uning har bir satri yurakda tugʻilib, yurakda ulgʻayadi va sheʼriyatga oshno millionlab qalblarni tarbiyalaydi, insonlar hayotiga joʻshqinlik olib kiradi”, – degan edilar. Haqiqatdan ham, sheʼr oʻqilgan davralarda ruhiy koʻtarinkilik, tinglovchilar qalblarida joʻshqinlik, koʻzlarida mehr, hayotga tashnalik hissi ustuvor boʻladi.

Shundanmi, taniqli ijodkor, Oʻzbekiston Yozuvchilar uyushmasi aʼzosi, Amudaryo tuman Maktabgacha va maktab taʼlimi boʻlimi tasarrufidagi “Barkamol avlod” bolalar maktabi direktori Xonimjon opa Rajabova ham ijodkor-shoira, ham muassasa rahbari sifatida maktabning barcha yoʻnalishlardagi toʻgaraklarida shugʻullanayotgan oʻquvchi-yoshlarning mamlakatimizdagi taniqli ijod ahli bilan uchrashuvlari, davra suhbatlari, biri-biridan joʻshqin sheʼriyat kechalarini tashkillashtirishni xush koʻradi.

Oʻzbekiston yozuvchilar uyushmasi raisi, Oʻzbekiston xalq shoiri Sirojiddin Sayyid, “Oltin qalam” milliy mukofoti sohibasi, Oʻzbekistonda xizmat koʻrsatgan madaniyat xodimi, taniqli shoira Zulfiya Moʻminov, Oʻzbekistonda xizmat koʻrsatgan madaniyat xodimi, joʻshqin publitsist va shoira Muhtarama Ulugʻovalar maktab oʻquvchilari bilan chinakam samimiy va faxriy doʻstlar kabi qadrdonlashib ketishganidan ayonki, ijodkorlar bilan uchrashuvlar nafaqat oʻquvchi-yoshlar, balki pedagogika jamoasi uchun ham haqiqiy maʼnaviyat va maʼrifat maktabidir.

Yoz faslining ilk kunlaridanoq muhtaram Prezidentimiz tashabbusi bilan mamlakatimiz boʻylab keng quloch yoygan “Dolzarb 90 kun” loyihasi doirasida boshlanib ketgan maʼnaviy-maʼrifiy va koʻngilochar tadbirlar “Barkamol avlod” bolalar maktabi oʻquvchilari uchun biri-biridan qiziqarli, yorqin taassurotlarga boy tarzda, joʻshqinlik bilan davom etmoqda.

Maktab oʻquvchilarining qoʻl mehnatlari mahsuli boʻlgan rang-barang gullar, robototexnika toʻgaragi aʼzolarining qiziqishlari va iqtidorlarini oʻzida mujassam etgan ixtirochilik namunalari, biri-biridan yoqimtoy yumshoq oʻyinchoqlar toʻplami, haykaltaroshlik va dizaynerlik namunalari bilan bezatilgan maktab foyesidanoq muassasa tahsilini olayotgan bolalar orasida haqiqiy ijodga moyil barkamol avlod voyaga yetayotganini anglash qiyin emas.

Ijodiy guruhimiz bilan 12-iyun kuni maktabda tashkil etilgan “Biz sheʼriyatga oshnomiz” mavzusidagi uchrashuv jarayonida Amudaryo tuman Maktabgacha va maktab taʼlimi boʻlimi tasarrufidagi umumtaʼlim maktablari oʻquvchilarining yozgi taʼtil kunlari “Barkamol avlod” bolalar maktabi toʻgaraklarida yanada maroqli oʻtayotganining guvohi boʻldik.

Shu kuni maktab oʻquvchilari bilan Oʻzbekiston Yozuvchilar uyushmasi aʼzosi, taniqli shoir va yozuvchi Tursunboy ota Abdullayev hamda Oʻzbekiston Yozuvchilar uyushmasi aʼzosi, Qoraqalpogʻiston Respublikasida xizmat koʻrsatgan jurnalist, shoira Robiya Yoʻldoshevalar dildan, samimiy muloqotda boʻldilar.

Uchrashuvni muassasa rahbari Xonimjon Rajabova ham sheʼriy, ham nasriy nutqi bilan juda goʻzal va yoqimli tarzda olib bordi. U oʻquvchi yoshlarga ilmning xosiyati, kasbga mehr tufayli inson oʻz umri davomida erishadigan yutuqlari haqida oʻz hayot yoʻlidan misollar keltirish orqali ilm va hunar insonni har tomonlama yuksaltiruvchi omil ekanligini alohida taʼkidladi.

Shundan soʻng Tursunboy Abdullayev va Robiya Yoʻldoshevalar oʻquvchi-yoshlarga oʻzlarining ona Vatanni madh etuvchi yangi sheʼrlaridan oʻqib berdilar. Ustoz-shogird anʼanasi, oʻzaro mehr-oqibat, insonparvarlik, kitobxonlik odamning eng goʻzal fazilati ekanligi xususida soʻz yuritishib, bolalarni ana shunday ezgu fazilatlar sohibi boʻlishga daʼvat etdilar.

“Biz sheʼriyatga oshnomiz” uchrashuv tadbiri davomida muassasaning “Yosh jurnalist va notiq” toʻgaragi aʼzolari oʻzlari yozgan sheʼrlaridan namunalar oʻqib berishdi. “Shoʻx bolalar” badiiy havaskorlik jamoasi aʼzolarining chiqishlari esa har bir ishtirokchi uchun quvnoq va joʻshqin kayfiyat bagʻishladi. Samimiy va dildan suhbat, sheʼr-u shuur, vatanparvarlikni madh etuvchi kuy-qoʻshiqlar tadbirga ajib joʻshqinlik, qalblarga quvonch bagʻishladi.

Yozgi taʼtil davrining har bir kunini biri biridan qiziqarli toʻgaraklar mashgʻulotlarida ishtirok etish orqali ajib ijodkorlik muhitida iqtidor va qobiliyatlarini amalda namoyon etib, oʻz hayotlariga maʼno-mazmun bagʻishlab, sheʼriyatga, maʼnaviyatga oshno holda oʻtkazayotgan bolalarga, toʻgʻrisi, chin dildan havas qildik.

Robiya Yoʻldosheva.