АТРОФ-ТАБИАТ МУҲИТГА ЗАРАР ЕТКАЗИЛИШИГА ЙЎЛ ҚЎЙИЛМАЙДИ
Мамлакатимизда атроф-муҳитни муҳофаза қилиш, табиий ресурслардан оқилона фойдаланиш, санитария ва экологик ҳолатни яхшилашни таъминлаш соҳасида изчил ишлар олиб борилмоқда. Бу борада, шунингдек, ҳудудда табиатга зарар етказилишининг олдини олиш бўйича Экология, атроф-муҳитни муҳофаза қилиш ва иқлим ўзгариши вазирлигининг Амударё туман бўлими томонидан ҳам тегишли чора-тадбирлар амалга оширилиб келинмоқда.
Бўлим ходимлари томонидан ноқонуний чиқинди ташлаш, атроф-муҳитни, ичимлик ва оқава сувларни ифлослантириш, йиғилиб қолган чиқиндилар, ўсимлик қолдиқлари, хазонларни ёқиб юбориш, шунингдек, ҳайвонот ва ўсимлик дунёси, сув ва сувдан фойдаланиш тўғрисидаги низом талабларига риоя қилмаслик оқибатида табиатга зарар етказиш ҳолатларининг олдини олиш мақсадида тушунтириш-тарғибот ва рейд тадбирлари йўлга қўйилган.
Жорий йилнинг ўтган 7 ойи давомида ўтказилган экологик рейд тадбирлари давомида жами 67 та ҳуқуқбузарликлар аниқланган. Шунга кўра тегишли тартибда маъмурий баённомалар расмийлаштирилиб, 202 млн. 725 минг сўм миқдоридаги жарималар ундирилган. Ундан ташқари, туманда фаолият юритаётган 157 та корхона-ташкилотларга атроф-муҳитни ифлослантиргани ва белгиланмаган жойларга чиқиндилар ташлагани учун Вазирлар Маҳкамасининг тегишли қарорларига асосан жами 129 млн. 875 минг 271 сўм компенсациялар тўлатилган.
Маълумки, шу йил 31 майда “Экология ва атроф-муҳитни муҳофаза қилиш соҳасини трансформация қилиш ва ваколатли давлат органи фаолиятини ташкил этиш чора-тадбирлари тўғрисида”ги Президент Фармони имзоланди. Унга кўра, Табиат ресурслари вазирлиги Экология, атроф-муҳитни муҳофаза қилиш ва иқлим ўзгариши вазирлиги деб қайта номланди.
Эндиликда соҳада рақамли технологиялар асосида замонавий экологик мониторинг механизмини яратиш, экологик маданиятни янада ошириш, биохилма-хилликни асраш ва чиқиндилар билан боғлиқ ишларни тартибга солиш кабилар борасидаги белгилаб қўйилган вазифалар амалга оширилади. Шунингдек, дарахт, буталарни экиш, яшил ҳудудларни ташкил қилиш ҳамда уларни муҳофаза қилишнинг янги тартибларини жорий қилиш орқали экологик вазият тубдан яхшилашга қаратилган чора-тадбирлар ижросига алоҳида эътибор қаратилади.
Ундан ташқари, жорий йил 1 декабргача туманларда атмосфера ҳавоси ифлосланиши фон мониторингини амалга ошириш учун автоматлашган кичик станциялар ўрнатилади. 2025 йил якунигача республика ҳудуди бўйича атмосфера ҳавосининг табиий ифлосланиши юқори бўлган ҳудудларни прогнозлаш ва аҳолини барвақт огоҳлантириш тизими синов тариқасида жорий этилади. 2024 йил якунигача ҳудудларни экологик баҳолаш бўйича индикаторлар асосида eco-indicator.uz рейтинги шакллантирилади ва ҳар бир ҳудуднинг экологик паспорти эълон қилинади.
2024 йилдан бошлаб, ҳар йили “яшил белбоғ”, “яшил боғ” ва “яшил жамоат парк”лар ҳамда “яшил қопламалар” – ҳимоя ўрмонзорларини барпо этиш ва доимий фойдаланувчига топширилгунга қадар сақлаб туриш, асосий темирйўл ва магистрал автойўллар бўйида дарахт кўчатларини экиш, ҳар бир туман ва шаҳарда 5 гектардан кам бўлмаган майдонларда боғлар барпо этиш кабилар учун 500 миллиард сўм ажратилади.
Туманимизда ҳам 2023 йилнинг баҳор мавсуми давомида “Яшил макон” умуммиллий лойиҳаси ва “Долзарб 40 кунлик” давомида кўчат экиш ишларини самарали ташкил этиш юзасидан самарали ишлар амалга оширилди. Лойиҳа доирасида 770 минг дона манзарали ва мевали дарахт кўчатлари, қаламчалар экиш режалаштирилган бўлса, ўтган давр мобайнида туманимиздаги барча корхона-ташкилотлар, фуқаролар йиғинлари ҳудуди ва аҳоли томорқаларида, шунингдек, автомобиль йўллари бўйларида вергин арчаси, шарқ туяси, япон софораси, катальпа, шумтол, қайрағоч, жийда, тут, заранг, акация, турли хилдаги тераклар ўтқазилди. Шунингдек, сурия атиргули, турли навли узум қаламчалари, ҳўл мевали ва ёнғоқ мевали дарахт кўчатлари ҳам экилди.
Экология ва атроф-муҳит муҳофазаси ниҳоятда муҳим ўрин тутади. Яшаш учун табиатни асрашимиз, табиий ресурсларни оқилона бошқаришимиз, улардан тежамкорлик билан фойдаланишимиз зарур. Чунки, ер шаридаги кўплаб экотизимлар захираси деярли тугаб бораётган, аҳоли сони ўсиб бораётган, иқтисодий тараққиётга эҳтиёж кун сайин ортаётган бугунги вазиятда атроф-муҳитни сақлаш ҳар қачонгидан ҳам долзарб вазифа саналади.
О.Худойберганова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
