Шахсий кузатув: Зарарли одатларнинг ҳаётимизга таъсири
Ҳозирги кунда ичкилик кўпчилик инсонларда учрамоқда. Ичкиликка ружу қўйганлиги сабабли кўплаб оилалар ўртасида ажралишлар келиб чиқмоқда. Оилалар ўртасидаги зиддиятлар, бола тарбиясининг бузилиши ҳам отанинг ичкиликка берилиши оқибатида келиб чиқмоқда.
Мен Бердақ номидаги Қорақалпоқ давлат университетида ўқийман. Ўқишдан чиқиб йўлда кетаётсам, кўп ичиб, ўзини билмай ўтган-кетгандан садақа сўраб ўтирган инсонларни учратаман. Бу инсонлар нафақат ўзини, балки ўзлигини ҳам йўқотган.
Бир куни мен садақа сўраб ўтирган кишилардан бирига пул бердим. Онам бунга норозилик билдирди. Билсам, улар бу пулни уйига эмас, ўзига спирт сотиб олишга сарфлашар экан. Улар ичкиликка шунчалик ружу қўйганки, ҳаёти учун хавфли бўлган спирт ичишгаям борган. Спирт истеъмол қилиш ҳаёт учун хавфли, у ошқозонни куйдириб юборади. Улар на келажак ҳақида, на оила ҳақида ўйлашади.
Оилада эса отанинг тарбияси муҳим. Бола отага қараб улғаяди, сабоқ олади. Агар ота уйига маст ҳолда келса, боланинг руҳиятига катта таъсир кўрсатади. Ота-она ўртасидаги жанжаллар кўпинча ичкиликдан келиб чиқади. Бола бунда оилага меҳрсиз бўлиб улғаяди. Халқ мақолларимизда "Қуш уясида кўрганини қилади", дейишади-ку, бу бежиз эмас.
Ичиш-чекиш нафақат келажагимизга ва соғлигимизга жуда катта таъсир кўрсатади. Кўпчилик инсонлар айнан ичиш-чекишдан ўпка зарарланиши оқибатида вафот этишади. Чекишни фақат катта ёшли инсонларда эмас, балки ҳали вояга етмаган болаларда ҳам учратишимиз мумкин.
14-15 ёшли болаларни кўриб қоламан гоҳида. Менимча, бу ҳолат ҳам оиладаги носоғлом муҳит оқибатида келиб чиқади. Отанинг чекканини кўрган бола келажакда бунга жиддий қарамайди. Унга бу одатий ҳолат бўлиб туюлади.
Тарбия оиладан бошланади. Демак, баркамол инсон тарбиясини оилада соғлом маънавий муҳит яратишдан бошлашимиз керак.
Сабоҳат Хўжабоева,ҚДУ талабаси, таҳририят амалиётчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
