Маҳаллалар инфратузилмасини яхшилаш йўлида

Президентимиз томонидан шу йилнинг 31 августида имзолаган “Қорақалпоғистон Реcпубликасида тадбиркорлик, инновацион технологиялар ва инфратузилмаларни жадал суръатларда ривожлантириш орқали аҳоли фаровонлигини оширишнинг қўшимча чора-тадбирлари тўғрисида”ги фармони билан Қорақалпоғистонни ривожлантиришнинг янги дастури белгилаб берилди. Ушбу фармонлар асосида Республикамизда кенг кўламли инвистицион лойиҳалар амалга оширилиб, қурилиш ишлари олиб борилмоқда, янгидан янги тадбиркорлик субъектлари ишга туширилмоқда.

Президентимиз республикадаги маҳаллалар инфратузилмасини янада яхшилаш, аҳолининг турмуш шароитини юқори даражага кўтариш мақсадида аниқ белгиланган чора-тадбирларни белгилаб бердилар.

Шу мақсадда 2022 йил 6 сентябрь куни Ўзбекистон Республикаси Вазирлар Маҳкамасининг “Қорақалпоғистон Республикаси ҳудудларини ижтимоий-иқтисодий ривожлантириш, қулай бизнес муҳитини яратиш, инновацион технологияларини жорий этиш ва инфратузилмалар билан таъминланганлик даражасини янада яхшилаш орқали аҳоли фаровонлигини оширишнинг қўшимча чора-тадбирлари тўғрисида”ги қарори қабул қилинди.

Ушбу қарор ижросини таъминлаш мақсадида Амударё туманида жами 24 км узунликдаги ички хўжалик йўлларини таъмирлаш режалаштирилган бўлсада, туман Ободонлаштириш бошқармаси қўшимча равишда яна 13 км йўлни ортиғи билан таъмирлашни режа қилган. Аниқроқ айтганда, эндиликда туманда жами 37 км ички хўжалик йўллари таъмирланади. Бунинг учун давлат бюджетидан 2 млрд. 964 млн сўм маблағ ажратилган.

Айтиш керакки, Ўзбекистон Республикаси Вазирлар Маҳкамаси томонидан ушбу қарорнинг қабул қилиниши орқали Қорақалпоғистондаги маҳаллалар инфратузилмасини ривожлантиришнинг асосий параметрлари ва молиявий масалалари ечиб берилди. Аҳоли эса ушбу қарорларнинг ижросига амалда гувоҳ бўлиб, мамлакатимизда “Инсон қадри учун” тамойили асаосида амалга оширилаётган ислоҳотлар бардавомлигига тўлиқ ишонч ҳосил қилмоқда.

Манғит шаҳрининг Ойбек номли маҳалласида қарор асосида олиб борилаётган ишлар қизғин суръатларда давом этмоқда. Ушбу маҳалла аҳолисининг кайфиятига ички хўжалик йўлларининг таъмирталаб аҳволга келиб қолганлиги салбий таъсир кўрсатар эди, албатта. Ёзда чанг, қишда лойга беланадиган бу йўллар ҳар қандай инсоннинг таъбини ҳира қиларди.

Эндиликда эса маҳалла аҳлида йўл билан боғлиқ бу каби муаммолар бўлмайди. Маҳалланинг 4,5 км узунликдаги тупроқ йўлларига тош ётқизиш ишлари бошлаб юборилди.

Шунингдек, Ойбек номли маҳалладан ташқари Дурунки маҳалласидаги 5,2 км узунликдаги йўллар ҳам таъмирланиб, тош ётқизиш ишлари олиб борилмоқда. Ушбу маҳалла аҳлининг ҳам ўз маҳаллаларида амалга оширилаётган бу каби ҳайрли ва эзгу ишдан ниҳоятда мамнун эканликларини юз ифодаларидан сезиш қийин эмас.

Юрт ривожи йўлидаги бу каби ҳайрли ишлар Қорақалпоғистоннинг барча ҳудудларида, жумладан туманимизда ҳам давом этади. Зеро, инсонларни ўтаётган ҳар бир кунидан рози бўлиб яшашларига шароит яратиш давлатимиз сиёсатининг бош мақсадидир.

Туман ҳокимлигининг Ахборот хизмати.