ЙЎЛ-ТРАНСПОРТ ҲОДИСАЛАРИНИНГ ОЛДИНИ ОЛИШ МАҚСАДИДА ЙПХ ИНСПЕКТОРЛАРИ ТОМОНИДАН РЕЙД ТАДБИРЛАРИ ЎТКАЗИЛМОҚДА

Амударё тумани ҳудудидаги транспорт йўлларида жамоат хавфсизлигини таъминлаш ва йўл-транспорт ҳодисалари содир этилишининг олдини олишга қаратилган тарғибот ишлари ва профилактика тадбирларини янада кучайтириш мақсадида рейд тадбирлари ўтказилмоқда.

Навбатдаги рейд давомида йўл-патруль хизмати инспекторлари йўлларда ҳаракатланаётган транспорт воситалари томонидан амалдаги “Йўл ҳаракати қоидалари”га қай тарзда риоя қилинаётгани текширилди.

Рейд давомида қатор қоидабузарлик ҳолатлари аниқланиб, шу бўйича 270 та маъмурий баённомалар расмийлаштирилди. Инспекторлар томонидан тегишли ҳужжатларсиз транспорт воситасини бошқарган, одам ташиш қоидаларини бузган ҳамда бошқа турдаги қоидабузарликларга йўл қўйган ҳайдовчиларга нисбатан тегишли чоралар кўрилди. Шунингдек, 96 та автомашиналар жарима майдончасига қўйилиб, қарздорлик бўйича жами 37 млн. сўм ундирилди.

Таъкидлаш жоизки, жорий йил бошидан шу пайтга қадар Амударё тумани ҳудудидаги транспорт йўлларида 3 та йўл-транспорт ҳодисаси содир бўлган. Бундай ҳолатларнинг олдини олиш мақсадида туман Ички ишлар бўлимининг йўл-патруль хизмати бўлинмаси томонидан 2022–2026 йиллар давомида республика ҳудудида амалга оширилиши мўлжалланган “Хавфсиз ва равон йўл” умуммиллий дастури асосида аниқ чора-тадбирлар ишлаб чиқилган бўлиб, ижроси таъминланмоқда.

Режага мувофиқ, туман ҳудудида “Диққат, йўловчи!”, “Диққат, болалар!”, “Диққат, пиёда!” профилактик ва махсус рейд тадбирлари мунтазам равишда ўтказилиб келинмоқда. Рейдлар давомида аҳоли ўртасида ҳам йўл ҳаракати хавфсизлигини таъминлаш, пиёдалар иштирокидаги йўл-транспорт ҳодисаларининг олдини олиш мақсадида йўл ҳаракати қоидаларига риоя этиш бўйича тарғибот ишларини олиб боришга алоҳида эътибор қаратилмоқда.

Серқатнов йўл бўйида жойлашган таълим муассасалари, айниқса, пиёдалар кўп ҳаракатланадиган туман марказидаги бозор ва савдо мажмуалари яқинида пиёдалар ўтиш жойларига йўл ҳаракати хавфсизлиги хизмати ва патруль-пост хизмати, профилактика инспекторлари бириктирилиб, хавфли ҳодисаларнинг олди олинмоқда. Бириктирилган ходимлар ҳаракат хавфсизлигини таъминлаш билан бир қаторда аҳолига пиёдаларнинг йўлларда ҳаракатланиш маданиятини ҳам тушунтириб боришмоқда. Шунингдек, туман марказидаги бозор ва йирик савдо мажмуалари атрофлари, таълим муассасаларига тарнспорт ҳайдовчилари ва пиёдаларга йўл ҳаракати қоидаларини эслатувчи баннерлар ўрнатилиши таъминланиб, тушунтириш-тарғибот ишлари ўтказилишига ҳам алоҳида эътибор қаратилмоқда.

Рейд тадбири давомида йўловчи ва енгил юк турдаги ташувчи транспорт воситалари ҳайдовчилари билан автотураргоҳлардаги ва йўллардаги ҳаракат вақтида пиёдаларга нисбатан ҳушёрликни ошириш юзасидан профилактик суҳбатлар ўтказилди. Ушбу тадбирлар давомида ҳайдовчи ва пиёда йўловчиларга йўл ҳаракати қоидаларини, пиёдалар билан боғлиқ йўл-транспорт ҳодисаларининг аянчли оқибатларини ўзида акс эттирган буклет ва эслатмалар ҳам тарқатилди.

О.Худойберганова.