Қишлоқ хўжалиги соҳасини янада ривожлантириш бўйича кўргазмали семинар бўлиб ўтди

5 март куни Амударё туманининг Назархан овулида қишлоқ хўжалиги соҳасини янада ривожлантириш, соҳадаги мавжуд муаммолар ва камчиликларни бартараф этишга бағишланган кўргазмали семинар бўлиб ўтди.

Семинарда Қорақалпоғистон Республикаси Вазирлар Кенгаши Раиси Фарҳод Эрманов, республикадаги барча туман ҳокимлари, секторлар раҳбарлари, қишлоқ хўжалиги масалалари бўйича ҳоким ўринбосарлари, кластер раҳбарлари, фермерлар, деҳқонлар ва томорқа ер эгалари иштирок этишди.

Семинарга ташриф буюрган меҳмонлар мусиқа садолари остида нон-туз билан кутиб олинди. Шунингдек, баҳорни мадҳ этувчи гўзал рақслар ижро этилиб, миллий ўйинларимиз намойиш этилди. Бундан ташқари, миришкор деҳқонларимиз томонидан етиштирилган озиқ-овқат маҳсулотлари, қишлоқ хўжалиги техникалари намойиш этилди.

Семинар аввалида Вазирлар Кенгаши раиси Фарҳод Эрманов чигит экишда эътибор қаратилиши лозим бўлган жиҳатлар, техникалардан самарали ва камхарж усулларда фойдаланиш бўйича маслаҳатлар бериб ўтди.

Шундан сўнг, Назархон овули ҳудудида барпо этилган катта боғда “BENE FRUITS” масъулияти чекланган жамияти раҳбари Айдин Лал меҳмонларга мевали дарахтларни парвариш қилиш, интенсив боғларнинг афзаллиги, бундай турдаги боғларни янада кўпайтириш бўйича ўзининг тавсия ва тушунтиришларини берди ҳамда мевали дарахтларни пайвандлаш усуллари билан батафсил таништириб ўтди. Сўнгра иштирокчилар боғ ҳудудига эзгу ниятлар билан мевали кўчатлар ўтқазишди.

Семинарда қишлоқ хўжалиги соҳасини янада ривожлантириш, интенсив боғларни янада кўпайтириш, озиқ-овқат хавфсизлигини таъминлаш бўйича иштирокчилар билан савол-жавоблар бўлиб ўтди.

“BENE FRUITS” масъулияти чекланган жамияти раҳбари Айдин Лал таъкидлаб ўтганидек, интенсив боғларда дарахтларнинг танаси кичик бўлганлиги учун улар билан ишлаш жуда қулай. Яъни, уларни суғориш, кесиш, шакл бериш, меваларини териш боғбонга асло қийинчилик туғдирмайди. Яна бундай боғларда дарахт танасига ёруғлик тушиши, ҳаво айланиши яхши бўлганлиги учун мевасининг сифати ҳам юқори бўлади. Ундан ташқари, оддий олмали боғнинг бир гектаридан 10-20 тоннагача ҳосил етиштириш мумкин. Пакана ва ярим пакана дарахтлардан эса 50-80 тоннагача ҳосил олса бўлади.

Интенсив боғларда асосан олма кўчатлари экилишининг боиси – олма дарахтининг кўчатлари тез ҳосилга киради, гектарига кўчат сони қалин экилиши сабабли ҳосилдорлик юқори бўлади. Бунда экилаётган олма навлари пайвандтагга пайванд қилиниб, кўчатзорларда кўпайтирилиб, экилади.

Семинарда жорий йилги чигит экиш ишларини қисқа муддатларда ва сифатли тарзда уюшқоқлик билан ўтказиш борасидаги долзарб масалалар ҳам муҳокама қилинди. Қолаверса, чигит экилган майдонлар атрофига ошқовоқ, тарвуз, қовун, шунингдек ток, тут кўчатлари ва бошқа мевали дарахт кўчатларини экиш лозимлиги таъкидлаб ўтилди.

Семинар давомида пахта-тўқимачилик кластерлари раҳбарлари, фермер ва деҳқонлар, томорқа ер эгалари мутахассисларга ўзларини қизиқтирган саволлар билан мутахассисларга мурожаат қилиб, тегишлича жавоблар олишди.

Туман ҳокимлигининг Ахборот хизмати.