Qishloq xoʻjaligi sohasini yanada rivojlantirish boʻyicha koʻrgazmali seminar boʻlib oʻtdi

5-mart kuni Amudaryo tumanining Nazarxan ovulida qishloq xoʻjaligi sohasini yanada rivojlantirish, sohadagi mavjud muammolar va kamchiliklarni bartaraf etishga bagʻishlangan koʻrgazmali seminar boʻlib oʻtdi.

Seminarda Qoraqalpogʻiston Respublikasi Vazirlar Kengashi Raisi Farhod Ermanov, respublikadagi barcha tuman hokimlari, sektorlar rahbarlari, qishloq xoʻjaligi masalalari boʻyicha hokim oʻrinbosarlari, klaster rahbarlari, fermerlar, dehqonlar va tomorqa yer egalari ishtirok etishdi.

Seminarga tashrif buyurgan mehmonlar musiqa sadolari ostida non-tuz bilan kutib olindi. Shuningdek, bahorni madh etuvchi goʻzal raqslar ijro etilib, milliy oʻyinlarimiz namoyish etildi. Bundan tashqari, mirishkor dehqonlarimiz tomonidan yetishtirilgan oziq-ovqat mahsulotlari, qishloq xoʻjaligi texnikalari namoyish etildi.

Seminar avvalida Vazirlar Kengashi raisi Farhod Ermanov chigit ekishda eʼtibor qaratilishi lozim boʻlgan jihatlar, texnikalardan samarali va kamxarj usullarda foydalanish boʻyicha maslahatlar berib oʻtdi.

Shundan soʻng, Nazarxon ovuli hududida barpo etilgan katta bogʻda “BENE FRUITS” masʼuliyati cheklangan jamiyati rahbari Aydin Lal mehmonlarga mevali daraxtlarni parvarish qilish, intensiv bogʻlarning afzalligi, bunday turdagi bogʻlarni yanada koʻpaytirish boʻyicha oʻzining tavsiya va tushuntirishlarini berdi hamda mevali daraxtlarni payvandlash usullari bilan batafsil tanishtirib oʻtdi. Soʻngra ishtirokchilar bogʻ hududiga ezgu niyatlar bilan mevali koʻchatlar oʻtqazishdi.

Seminarda qishloq xoʻjaligi sohasini yanada rivojlantirish, intensiv bogʻlarni yanada koʻpaytirish, oziq-ovqat xavfsizligini taʼminlash boʻyicha ishtirokchilar bilan savol-javoblar boʻlib oʻtdi.

“BENE FRUITS” masʼuliyati cheklangan jamiyati rahbari Aydin Lal taʼkidlab oʻtganidek, intensiv bogʻlarda daraxtlarning tanasi kichik boʻlganligi uchun ular bilan ishlash juda qulay. Yaʼni, ularni sugʻorish, kesish, shakl berish, mevalarini terish bogʻbonga aslo qiyinchilik tugʻdirmaydi. Yana bunday bogʻlarda daraxt tanasiga yorugʻlik tushishi, havo aylanishi yaxshi boʻlganligi uchun mevasining sifati ham yuqori boʻladi. Undan tashqari, oddiy olmali bogʻning bir gektaridan 10-20 tonnagacha hosil yetishtirish mumkin. Pakana va yarim pakana daraxtlardan esa 50-80 tonnagacha hosil olsa boʻladi.

Intensiv bogʻlarda asosan olma koʻchatlari ekilishining boisi – olma daraxtining koʻchatlari tez hosilga kiradi, gektariga koʻchat soni qalin ekilishi sababli hosildorlik yuqori boʻladi. Bunda ekilayotgan olma navlari payvandtagga payvand qilinib, koʻchatzorlarda koʻpaytirilib, ekiladi.

Seminarda joriy yilgi chigit ekish ishlarini qisqa muddatlarda va sifatli tarzda uyushqoqlik bilan oʻtkazish borasidagi dolzarb masalalar ham muhokama qilindi. Qolaversa, chigit ekilgan maydonlar atrofiga oshqovoq, tarvuz, qovun, shuningdek tok, tut koʻchatlari va boshqa mevali daraxt koʻchatlarini ekish lozimligi taʼkidlab oʻtildi.

Seminar davomida paxta-toʻqimachilik klasterlari rahbarlari, fermer va dehqonlar, tomorqa yer egalari mutaxassislarga oʻzlarini qiziqtirgan savollar bilan mutaxassislarga murojaat qilib, tegishlicha javoblar olishdi.

Tuman hokimligining Axborot xizmati.