КЕЛАЖАК ТАҚДИРИ ЎҚИТУВЧИЛАР ҚЎЛИДА
Бугунги кунда дунёда кечаётган глобаллашув жараёни, замонавий технологияларнинг шиддат билан ривожланиши халқимизнинг, хусусан, ёшларнинг хорижий тилларни ўрганишга бўлган талаби ва эхтиёжи ортишига сабаб бўлмоқда. Замон билан ҳамнафас қадам ташлаш бу - давр талаби. Шундай экан, бугунги кундаги таълим соҳасида хизмат қилаётган мураббийларимиз, ўқитувчиларимиз зиммасида катта масъулият турибди. Зотан, келажакнинг тақдири ўқитувчилар қўлидадир.
Ўзбекистон Республикаси Президентининг 2021 йил 19 майдаги «Ўзбекистон Республикасида хорижий тилларни ўрганишни сифат жиҳатдан янги босқичга олиб чиқиш тўғрисида»ги Қарори хорижий тиллар ўқитувчилари зиммасига янада юксак масъулият юклади. Чунки, мактаб ривожланса, олий таълимга юқори савияга эга ўғил-қизларимиз келади. Бу мамлакат соҳа ва тармоқлари учун етук кадрлар дегани.
Мактаб таълимини ҳар жиҳатдан ривожлантириш, бугунги кунги талаб асосида такомиллаштириш, ўқув методикаси ва малакали кадрлар таъминотини ташкил этиш борасида барча ҳудудларда, шу жумладан Амударё туманида ҳам самарали ишлар амалга оширилмоқда, фанлар олимпиадалари, кўрик-танловлар, семинарлар, учрашувлар ўтказилиб келинмоқда.
Ўзбекистон Республикаси Вазирлар Маҳкамасининг 2021 йил 9 сентябрдаги 562-сонли Қарори ижросини таъминлаш, мактабларда хорижий тилларни ўқитиш бўйича амалга оширилаётган чора-тадбирлар натижадорлигини таҳлил қилиш ҳамда мактаблар ўртасида соғлом рақобат муҳитини шакллантиришга қаратилган Ўзбекистон Республикаси Президенти соврини учун “Хорижий тилларни ўқитиш бўйича энг яхши мактаб” танловининг ўтказилиши муҳим аҳамият касб этмоқда. Мазкур танловда 40-сонли мактаб терма жамоаси туман миқёсида ғолиб, деб топилиб, танловнинг Қорақалпоғистон Республикаси босқичида фаол иштирок этдилар.
Шунингдек, хорижий тиллар бўйича ўқувчиларга сифатли таълим бераётган ўқитувчиларни аниқлаш ва рағбатлантириш мақсадида умумтаълим мактабларининг чет тили фани ўқитувчилари орасида “Энг яхши чет тили фани ўқитувчиси” кўрик-танлови ҳам ташкил этилиб, унда 30-сонли мактаб ўқитувчиси Фарида Шамсутдинова инглиз тили фани бўйича, 21-сонли умумий ўрта таълим мактаби ўқитувчиси Муқаддам Қурбонбаева немис тили фани бўйича ғолибликни қўлга киритдилар ва танловнинг Қорақалпоғистон Республикаси босқичида фаол иштирок этиш бахтига муяссар бўлдилар.
Бундан ташқари, ўсиб келаётган ёш авлодни инглиз тилини билиш, Европа иттифоқи талаблари даражасига мувофиқ инглиз тилини ўзлаштирган ўқувчиларни қўллаб-қувватлаш мақсадида умумтаълим мактабларининг бошланғич синф ўқувчилари орасида туманда биринчи марта инглиз тилидан “Ақлли болалар” (Smart kids) олимпиадаси ўтказилди. Олимпиадада 48-сонли мактабнинг 4-синф ўқувчиси Оғабек Бозорбаев юқори балл тўплаб, ғолиб деб топилди ва олимпиаданинг Қорақалпоғистон республикаси босқичида ҳам биринчи ўринни эгаллашга муваффақ бўлди.
Бугунги кунда туманимизнинг умумтаълим мактабларида 296 нафар хорижий тил ўқитувчилари фаолият олиб боришмоқда, ҳозирги кунда шундан 16 нафари олий, 51 нафари биринчи, 109 нафари иккинчи тоифали ўқитувчилардир. Улар ўзларининг сермахсул меҳнатлари билан иш фаолиятларида катта натижаларга эришмоқдалар.
Айни пайтда Вазирлар Маҳкамаси ҳузуридаги давлат тест маркази томонидан бериладиган чет тилини билиш ва малака даражаси бўйича маълумотномага эга ўқитувчиларимиз 36 нафар, B2 сертификати эгалари 19 нафарни, С1 даражадаги миллий ёки унга тенглаштирилган мос даражадаги халқаро тан олинган сертификатга эга ўқитувчиларимиз 25 нафарни ташкил этади.
Биз дунёга чиқишимиз, дунё билан мулоқотда бўлишимиз учун хорижий тилларнинг аҳамияти катта. Ёшларимиз қанчалик даражада кўп тил ўрганишса, улар олдида имкониятлар эшиги шунчалик кенг очилади. Туманимизда хорижий тиллар бўйича ўқувчиларга сифатли таълим бераётган илғор, ташаббускор, фидойи устозларимиздан 16-сонли мактабнинг инглиз тили фани ўқитувчиси, Ўзбекистон Республикаси Халқ таълими аълочиси Мавлуда Ниязова, 40-сонли мактабнинг инглиз тили фани ўқитувчиси “Ватан фидойиси” кўкрак нишони соҳиби Нурбек Жуманиязовларнинг педагогик фаолиятлари таҳсинга лойиқ. Нурбек Жуманиёзов ўз фаолияти давомида кўплаб шогирдлар етиштирди. Унинг 16 нафар ўқувчиси инглиз тилидан миллий ва унга тенглаштирилган Халқаро даражадаги сертификатга эга бўлдилар.
Амударё тумани ХТБга қарашли умумтаълим мактабларида таълим соҳасига қаратилаётган эътибор натижасида янада юқори кўрсаткичларга эришиш имконияти мавжуд ва биз албатта буни уддалаймиз. Муҳтарам Президентимиз айтганларидек нажот таълимда, нажот билимда, нажот тарбияда!
Муҳайё ОРТИҚБОЕВА,
Амударё туман ХТБ хорижий тиллар методисти.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
