Сувни тежаш — келажак авлод олдидаги катта масъулиятдир

Ўзбекистон Республикаси Президентининг 2026 йил 16 февралдаги “Маҳаллани ривожлантириш ва жамиятни юксалтириш” йилида устувор йўналишлар бўйича ислоҳотлар дастурлари ва “Ўзбекистон — 2030” стратегиясини амалга ошириш бўйича давлат дастури тўғрисида”ги Фармони мамлакатимизда ислоҳотларни янги босқичга олиб чиқишга хизмат қилаётган муҳим ҳужжатлардан бири сифатида эътироф этилмоқда. Ушбу ҳужжатда белгиланган устувор вазифалар нафақат иқтисодий тараққиёт, балки жамиятда замонавий фикрлаш, ресурсларга масъулиятли муносабат ва аҳолининг турмуш фаровонлигини оширишга қаратилгани билан ҳам аҳамиятлидир.

Мазкур Фармонга мувофиқ ишлаб чиқилган ислоҳотлар дастурининг 62-мақсадида республикада сувдан оқилона фойдаланиш маданиятини юксалтириш, сувдан фойдаланиш самарадорлигини ошириш, аҳоли ўртасида сув ресурсларини тежамкорлик билан ишлатиш кўникмасини шакллантириш ҳамда хонадонларда томорқадан унумли фойдаланишни ривожлантириш назарда тутилган. Шунингдек, сув ресурсларидан маиший эҳтиёжлар учун фойдаланишни камайтириш, томорқа хўжалигида суғоришнинг инновацион ва замонавий тежамкор технологияларини жорий этишнинг афзалликларини кенг тарғиб қилиш, бу йўналишда тажриба майдонларини ташкил этишга кўмаклашиш каби вазифалар ҳам алоҳида белгилаб берилган.

Шу муносабат билан Қорақалпоғистон Республикасидаги Нодавлат нотижорат ташкилотлари уйида йиғилиш ўтказилди. Йиғилишда Ўзбекистон Республикаси Олий Мажлиси ҳузуридаги фуқаролик жамияти институтларини қўллаб-қувватлаш жамоат фондининг Қорақалпоғистон бўлинмаси бошлиғи Парахат Турдимуратов, “Юксалиш” умуммиллий ҳаракатининг Қорақалпоғистон Республикаси бўлими бошлиғи Тажибай Раманов, Қорақалпоғистон Республикаси Сув хўжалиги вазирлигининг бўлим бошлиғи Руслан Айтжанов, Қорақалпоғистон Фермерлари Кенгаши бўлим бошлиғи Емберген Ерназаров ҳамда фуқаролик жамияти институтлари ва оммавий ахборот воситалари вакиллари иштирок этди. Мазкур мулоқот Давлат дастурида белгиланган вазифаларнинг мазмун-моҳиятини кенг жамоатчиликка етказиш, соҳа мутахассислари ва жамоатчилик вакиллари ўртасида ўзаро фикр алмашиш майдонини яратиш мақсадида ташкил этилди.

Йиғилиш аввалида “Юксалиш” умуммиллий ҳаракатининг Қорақалпоғистон Республикаси бўлими бошлиғи Тажибай Романов “Маҳаллани ривожлантириш ва жамиятни юксалтириш” йилида “Ўзбекистон – 2030” стратегиясини амалга ошириш бўйича Давлат дастурида фуқаролик жамияти институтларининг иштироки мавзусида маъруза қилди.

У ўз нутқида мамлакатда амалга оширилаётган ислоҳотларда фуқаролик жамияти институтларининг ўрни ва аҳамияти тобора ортиб бораётганини таъкидлади. Қайд этилганидек, маҳаллалардаги ижтимоий фаолликни ошириш, аҳолини долзарб ислоҳотлар мазмуни билан таништириш, жамоатчилик назоратини кучайтириш ва давлат дастурлари ижросига кенг жамоатчиликни жалб этишда нодавлат нотижорат ташкилотлари, оммавий ахборот воситалари ва бошқа жамоат тузилмалари муҳим ўрин тутади. Бу эса ислоҳотларнинг ҳаётга янада самарали татбиқ этилишига хизмат қилади.

Шундан кейин Қорақалпоғистон Республикаси Сув хўжалиги вазирлиги бўлим бошлиғи Руслан Айтжанов “Аҳоли орасида сув ресурсларидан тежамкорлик билан фойдаланиш маданиятини шакллантириш орқали уй хўжалигида томорқадан унумли фойдаланишни ривожлантириш” мавзусида маъруза қилди.

Таъкидланганидек, сув ресурслари бугунги кунда энг муҳим табиий бойликлардан биридир. Ундан оқилона фойдаланиш эса нафақат иқтисодий, балки ижтимоий аҳамиятга ҳам эга. Маърузада хонадонларда томорқадан самарали фойдаланиш, суғоришда замонавий тежамкор усулларни жорий этиш, ортиқча сув сарфининг олдини олиш ҳамда аҳоли ўртасида сувни асраш маданиятини шакллантириш бугунги куннинг муҳим вазифаларидан бири экани қайд этилди.

Қайд қилинганидек, томорқа ерларидан унумли фойдаланиш орқали аҳолининг даромад манбаларини кенгайтириш, оилаларнинг озиқ-овқат хавфсизлигини мустаҳкамлаш ва яшаш сифатига ижобий таъсир кўрсатиш мумкин. Бунинг учун эса аҳолига амалий тушунтириш ишларини олиб бориш, намунали тажриба майдонларини ташкил этиш, замонавий агротехнологияларни оммалаштириш ва соҳа мутахассислари билан яқин ҳамкорликни кучайтириш муҳим аҳамият касб этади.

Йиғилиш якунида иштирокчилар томонидан билдирилган фикр-мулоҳазалар, таклифлар ва ташаббуслар сув ресурсларидан тежамкорлик билан фойдаланиш маданиятини шакллантиришда фуқаролик жамияти институтлари, давлат идоралари ва оммавий ахборот воситаларининг ўзаро ҳамкорлиги янада кучайтирилиши лозимлигини кўрсатди. Бундай мулоқотлар аҳоли онгида масъулиятли муносабатни шакллантириш, давлат дастурларининг мазмун-моҳиятини кенг тарғиб қилиш ва “Ўзбекистон – 2030” стратегиясида белгиланган мақсадларни амалга оширишга муносиб ҳисса қўшиши билан аҳамиятлидир.