Suvni tejash — kelajak avlod oldidagi katta masʼuliyatdir

Oʻzbekiston Respublikasi Prezidentining 2026-yil 16-fevraldagi “Mahallani rivojlantirish va jamiyatni yuksaltirish” yilida ustuvor yoʻnalishlar boʻyicha islohotlar dasturlari va “Oʻzbekiston — 2030” strategiyasini amalga oshirish boʻyicha davlat dasturi toʻgʻrisida”gi Farmoni mamlakatimizda islohotlarni yangi bosqichga olib chiqishga xizmat qilayotgan muhim hujjatlardan biri sifatida eʼtirof etilmoqda. Ushbu hujjatda belgilangan ustuvor vazifalar nafaqat iqtisodiy taraqqiyot, balki jamiyatda zamonaviy fikrlash, resurslarga masʼuliyatli munosabat va aholining turmush farovonligini oshirishga qaratilgani bilan ham ahamiyatlidir.

Mazkur Farmonga muvofiq ishlab chiqilgan islohotlar dasturining 62-maqsadida respublikada suvdan oqilona foydalanish madaniyatini yuksaltirish, suvdan foydalanish samaradorligini oshirish, aholi oʻrtasida suv resurslarini tejamkorlik bilan ishlatish koʻnikmasini shakllantirish hamda xonadonlarda tomorqadan unumli foydalanishni rivojlantirish nazarda tutilgan. Shuningdek, suv resurslaridan maishiy ehtiyojlar uchun foydalanishni kamaytirish, tomorqa xoʻjaligida sugʻorishning innovatsion va zamonaviy tejamkor texnologiyalarini joriy etishning afzalliklarini keng targʻib qilish, bu yoʻnalishda tajriba maydonlarini tashkil etishga koʻmaklashish kabi vazifalar ham alohida belgilab berilgan.

Shu munosabat bilan Qoraqalpogʻiston Respublikasidagi Nodavlat notijorat tashkilotlari uyida yigʻilish oʻtkazildi. Yigʻilishda Oʻzbekiston Respublikasi Oliy Majlisi huzuridagi fuqarolik jamiyati institutlarini qoʻllab-quvvatlash jamoat fondining Qoraqalpogʻiston boʻlinmasi boshligʻi Paraxat Turdimuratov, “Yuksalish” umummilliy harakatining Qoraqalpogʻiston Respublikasi boʻlimi boshligʻi Tajibay Ramanov, Qoraqalpogʻiston Respublikasi Suv xoʻjaligi vazirligining boʻlim boshligʻi Ruslan Aytjanov, Qoraqalpogʻiston Fermerlari Kengashi boʻlim boshligʻi Yembergen Yernazarov hamda fuqarolik jamiyati institutlari va ommaviy axborot vositalari vakillari ishtirok etdi. Mazkur muloqot Davlat dasturida belgilangan vazifalarning mazmun-mohiyatini keng jamoatchilikka yetkazish, soha mutaxassislari va jamoatchilik vakillari oʻrtasida oʻzaro fikr almashish maydonini yaratish maqsadida tashkil etildi.

Yigʻilish avvalida “Yuksalish” umummilliy harakatining Qoraqalpogʻiston Respublikasi boʻlimi boshligʻi Tajibay Romanov “Mahallani rivojlantirish va jamiyatni yuksaltirish” yilida “Oʻzbekiston – 2030” strategiyasini amalga oshirish boʻyicha Davlat dasturida fuqarolik jamiyati institutlarining ishtiroki mavzusida maʼruza qildi.

U oʻz nutqida mamlakatda amalga oshirilayotgan islohotlarda fuqarolik jamiyati institutlarining oʻrni va ahamiyati tobora ortib borayotganini taʼkidladi. Qayd etilganidek, mahallalardagi ijtimoiy faollikni oshirish, aholini dolzarb islohotlar mazmuni bilan tanishtirish, jamoatchilik nazoratini kuchaytirish va davlat dasturlari ijrosiga keng jamoatchilikni jalb etishda nodavlat notijorat tashkilotlari, ommaviy axborot vositalari va boshqa jamoat tuzilmalari muhim oʻrin tutadi. Bu esa islohotlarning hayotga yanada samarali tatbiq etilishiga xizmat qiladi.

Shundan keyin Qoraqalpogʻiston Respublikasi Suv xoʻjaligi vazirligi boʻlim boshligʻi Ruslan Aytjanov “Aholi orasida suv resurslaridan tejamkorlik bilan foydalanish madaniyatini shakllantirish orqali uy xoʻjaligida tomorqadan unumli foydalanishni rivojlantirish” mavzusida maʼruza qildi.

Taʼkidlanganidek, suv resurslari bugungi kunda eng muhim tabiiy boyliklardan biridir. Undan oqilona foydalanish esa nafaqat iqtisodiy, balki ijtimoiy ahamiyatga ham ega. Maʼruzada xonadonlarda tomorqadan samarali foydalanish, sugʻorishda zamonaviy tejamkor usullarni joriy etish, ortiqcha suv sarfining oldini olish hamda aholi oʻrtasida suvni asrash madaniyatini shakllantirish bugungi kunning muhim vazifalaridan biri ekani qayd etildi.

Qayd qilinganidek, tomorqa yerlaridan unumli foydalanish orqali aholining daromad manbalarini kengaytirish, oilalarning oziq-ovqat xavfsizligini mustahkamlash va yashash sifatiga ijobiy taʼsir koʻrsatish mumkin. Buning uchun esa aholiga amaliy tushuntirish ishlarini olib borish, namunali tajriba maydonlarini tashkil etish, zamonaviy agrotexnologiyalarni ommalashtirish va soha mutaxassislari bilan yaqin hamkorlikni kuchaytirish muhim ahamiyat kasb etadi.

Yigʻilish yakunida ishtirokchilar tomonidan bildirilgan fikr-mulohazalar, takliflar va tashabbuslar suv resurslaridan tejamkorlik bilan foydalanish madaniyatini shakllantirishda fuqarolik jamiyati institutlari, davlat idoralari va ommaviy axborot vositalarining oʻzaro hamkorligi yanada kuchaytirilishi lozimligini koʻrsatdi. Bunday muloqotlar aholi ongida masʼuliyatli munosabatni shakllantirish, davlat dasturlarining mazmun-mohiyatini keng targʻib qilish va “Oʻzbekiston – 2030” strategiyasida belgilangan maqsadlarni amalga oshirishga munosib hissa qoʻshishi bilan ahamiyatlidir.