Keksa avlod vakillari oʻrtasida “Nuroniylar kuylaganda” nomli koʻrik-tanlov oʻtkazildi

Jamiyatda keksa avlod vakillariga koʻrsatilayotgan yuksak eʼtirom va doimiy gʻamxoʻrlik har bir davlatning madaniy hamda maʼnaviy qiyofasini, uning insonparvarlik tamoyillarini belgilab beradigan asosiy omillardan biridir. Shu bois ham yurtimizda nuroniylarni har tomonlama va manzilli qoʻllab-quvvatlash, ularning jamiyatdagi ijtimoiy faolligini oshirish davlat ijtimoiy siyosatining ustuvor yoʻnalishlaridan biriga aylangan. Oʻzbekiston Respublikasi Prezidentining 2023-yil 11-martdagi “Keksa avlod vakillarini har tomonlama qoʻllab-quvvatlash hamda ularning ijtimoiy faolligini oshirishga doir qoʻshimcha chora-tadbirlar toʻgʻrisida”gi qarori bu boradagi ezgu ishlarni yangi bosqichga olib chiqdi. Mazkur hujjat ijrosini taʼminlash doirasida turli madaniy-maʼrifiy tadbirlar, avlodlar uchrashuvlari, ijodiy kechalar va koʻrik-tanlovlar muntazam ravishda oʻtkazib kelinmoqda.

Ayniqsa, asrlar osha ajdodlarimizdan bizgacha yetib kelgan bebaho maʼnaviy merosimiz boʻlmish maqom hamda milliy qoʻshiqchilik sanʼatini mahallalarda, aholi qatlamlari orasida keng targʻib qilish, shu orqali yoshi ulugʻ insonlarning boʻsh vaqtlarini har tomonlama mazmunli va foydali tashkil etish bugungi kunning muhim vazifalaridan sanaladi.

Ana shunday olijanob va ezgu maqsadlarni oʻz atrofida mujassam etgan, tom maʼnoda haqiqiy sanʼat va nafosat bayramiga aylanib ketgan navbatdagi tadbir joriy yilning 22-iyul kuni Amudaryo tumani Madaniyat boʻlimi binosida oʻtkazildi. “Nuroniy” jamgʻarmasi hamda Oʻzbekiston Respublikasi Madaniyat vazirligining hamkorlikdagi qoʻshma qarori hamda tegishli nizom talablari asosida tashkil etilgan “Nuroniylar kuylaganda” nomli ushbu koʻrik-tanlov mahallalarda istiqomat qilayotgan keksalar, faxriy otaxonu onaxonlarimiz qalbidagi joʻshqinlikni, ularning ijodga, goʻzallikka va hayotga boʻlgan cheksiz ishtiyoqini namoyon etdi.

Tadbir avvalida Amudaryo tumani hokimining oʻrinbosari Jasur Yaxshimov, “Nuroniy” jamgʻarmasi tuman boʻlimi raisi Bekman Allaberganov va boshqalar soʻzga chiqib, ishtirokchilarga omad tiladilar.

Tanlov shartlariga koʻra ishtirokchilar safidan 60 yosh va undan yuqori boʻlgan erkaklar, shuningdek, 55 yosh va undan yuqori yoshdagi ayol havaskor ijrochilar oʻrin oldilar. Tasdiqlangan nizom talablariga muvofiq, barcha ijrochilar oʻz mahoratlarini fonogrammasiz, faqatgina jonli ijroda namoyish etishdi. Bu holat oʻz navbatida, har bir ishtirokchidan katta tayyorgarlik, uzoq yillik hayotiy tajriba va haqiqiy tabiiy isteʼdodni talab qiladigan jiddiy sinov boʻldi. Sahnada belgilangan vaqt meʼyorlariga qatʼiy amal qilgan holda chiqish qilgan har bir ishtirokchi yigʻilgan tomoshabinlarga oʻziga xos betakror milliy ohanglarni tuhfa etdi.

Ijodiy bellashuv shunchaki odatiy tanlov emas, balki mahalla keksalari, faxriy nuroniylar, qolaversa barcha sanʼatsevar insonlar uchun haqiqiy maʼnaviy bayramga, samimiy diydorlashuv va unutilmas ijod kechasiga aylandi. Sahnada yangragan dilrabo kuy va qoʻshiqlar zalga yigʻilgan har bir tomoshabinning bevosita qalbiga yetib bordi va ularni sehrlab qoʻydi.

Ayniqsa, uzoq yillar davomida turli sohalarda, el-yurt rivoji yoʻlida halol mehnat qilib, bugungi kunda keksalik gashtini surayotgan piru badavlat nuroniylarning goh shoʻx, goh teran maʼnoli taronalarni yuksak mahorat bilan kuylashi barchaga oʻzgacha maʼnaviy ozuqa va zavq bagʻishladi. Ular oʻzlarining goʻzal chiqishlari bilan nafaqat tadbir ishtirokchilarining maroqli hordiq chiqarishlari va koʻtarinki kayfiyatda dam olishlari uchun munosib sharoit yaratdilar, balki tomoshabinlar qatorida oʻtirgan yosh avlod vakillariga milliy sanʼatimizning asl mohiyatini, uning beqiyos qudratini amalda koʻrsatib berdilar.

Nuroniylar tomonidan joʻshib kuylangan, oʻzida chuqur falsafiy maʼnoni mujassam etgan taronalarda aks etgan ezgu tilaklar, yurtimizdagi barqaror tinchlik, osmonimizning musaffoligi va azaliy qadriyatlarimizga boʻlgan cheksiz ehtirom tadbir qatnashchilariga mamnuniyat bagʻishladi.

Ishtirokchilarning sahnadagi har bir chiqishi malakali hakamlar hayʼati tomonidan ijrochining shaxsiy mahorati, ovozining tabiiy imkoniyatlari, milliy qoʻshiqchilik anʼanalariga qay darajada toʻgʻri rioya qilinganligi hamda sahna madaniyati va tomoshabin bilan ishlash qobiliyati boʻyicha xolis va adolatli baholab borildi.

Qizgʻin va murosasiz ruhda oʻtgan ijodiy bellashuvlarning yakuniy natijalariga koʻra, maqom ijrochiligi yoʻnalishida oʻz ustida tinimsiz ishlagan va qiyin notalarni qoyilmaqom qilib kuylay olgan Toʻliboy Yoʻldashev 1-oʻringa munosib koʻrilgan boʻlsa, faxrli 2-oʻrinni isteʼdodli ijrochi Baxtiyor Jollibayev qoʻlga kiritdi. 3-oʻrin esa Nuraddin Yakupovga nasib etdi. Milliy qoʻshiqchilik yoʻnalishi boʻyicha hakamlar hayʼatining xulosasiga koʻra, sahnada haqiqiy mahorat koʻrsatgan Oʻrazimbat Jumaniyazov 1-oʻrinni, tomoshabinlar olqishiga sazovor boʻlgan Bahrom Bazarboyev 2-oʻrinni hamda oʻziga xos ijro uslubi bilan ajralib turgan Hamza Bobojonov 3-oʻrinni egallashga muvaffaq boʻldilar.

Tanlovda asosiy oʻrinlarni egallagan gʻoliblardan tashqari, oʻzining betakror isteʼdodi bilan koʻpchilikning mehrini va eʼtiborini qozona olgan ishtirokchilar ham tashkilotchilar tomonidan maxsus taʼsis etilgan nominatsiyalar boʻyicha taqdirlandi. Jumladan, oʻz yoʻnalishida ajoyib natija koʻrsatgan Erkaboy Xoʻjaniyazov hamda Yusup Rajabovlar “Eng yaxshi maqom ijrochisi” nominatsiyasi sohiblari boʻlishdi. Goʻzal ovoz egalari Ozod Shomurodov va Komiljon Yangiboyev esa “Eng yaxshi milliy qoʻshiq ijrochisi” nominatsiyasi boʻyicha gʻoliblikni qoʻlga kiritishdi. Sahnada oʻzini erkin tutishi va tomoshabinlar bilan jonli muloqot oʻrnata olish mahorati yuqori baholangan Jalol Saparov “Tomoshabinlar eʼtirofi sohibi” nominatsiyasiga loyiq koʻrilgan boʻlsa, Madrahim Otamuratov “Sahna madaniyati uchun” nomli maxsus nominatsiya bilan taqdirlandi. Milliy musiqamiz va qoʻshiqchilik sanʼatimiz targʻibotiga qoʻshgan ulkan hissasi uchun Asqar Matyakubov “Milliy anʼanalar targʻibotchisi” nominatsiyasida eʼtirof etilgan boʻlsa, tadbir davomida oʻzining faolligi va gʻayrati bilan barchaga oʻrnak boʻlgan Bahodir Kenjaboyev “Eng faol ishtirokchi” nominatsiyasiga munosib koʻrildi.

Koʻrik-tanlovning barcha gʻolib va sovrindorlariga, shuningdek, turli nominatsiyalar egalariga tashkilotchilar tomonidan maxsus diplomlar va esdalik sovgʻalari topshirildi. Ushbu maʼnaviyat va ijod bayrami shuni yaqqol tasdiqladiki, inson qalbidagi sanʼatga, ezgulikka boʻlgan muhabbat yillar oʻtgani sayin aslo soʻnmaydi, aksincha, orttirilgan boy hayot tajribasi bilan yanada sayqallanib, teran va taʼsirchan tus oladi.