Хотин-қизлар фаолининг бир иш куни

Маълумки, Президентимиз Шавкат Мирзиёев раислигида 2022 йил 1 март куни хотин-қизларнинг жамиятдаги мавқеини янада мустаҳкамлаш ҳамда уларни қўллаб-қувватлаш масалаларига бағишланган видеоселектор йиғилиши бўлиб ўтган эди. Йиғилишда юртбошимиз “Агар халқимизни рози бўлишини хоҳласак, аввало мўътабар оналаримиз, опа-сингилларимиз учун муносиб турмуш шароитларини яратишимиз керак. Она рози бўлса, оила рози бўлади, оила рози бўлса, жамият рози бўлади” деган эдилар.

Бу мақсад мамлакатимизнинг “Тараққиёт стратегияси”да энг муҳим йўналишлардан бири қилиб белгиланган. Уларнинг ижросини тизимли равишда ҳар бир маҳалла кесимида амалга ошириш учун Оила ва хотин-қизлар давлат қўмитасини ташкил этиш тўғрисидаги Президент фармони қабул қилинди.

Фармонга мувофиқ, Республикамизнинг барча ҳудудларидаги сингари Амударё туманининг барча овул ва маҳаллаларига очиқ танлов асосида хотин-қизлар фаоллари тайинланди.

Бугунги кунда хотин-қизлар фаоллар ўз маҳалласидаги аёл-қизларнинг ижтимоий-сиёсий фаоллигини ошириш, муаммоларини ҳал қилиш йўлида сидқидилдан меҳнат қилиб келишмоқда.

Жумладан, Амударё тумани Чойкўл овул фуқаролар йиғинининг хотин-қизлар фаоли Сайлихан Муратбаева ҳам ўз маҳалласидаги хотин-қизлар билан бирма-бир суҳбатлашиб, ёрдамга муҳтож аёл-қизларнинг муаммоларини ҳоким ёрдамчиси Рустам Раҳимов билан ҳамкорликда ҳал қилинишига эришмоқда.

Маълумот учун, Чойкўл овулида жами 1 минг 79 та хонадонда 6 минг 945 нафар аҳоли истиқомат қилади. Шундан 3 минг 478 нафарини аёллар ташкил этиб, ушбу аёллардан 107 нафари “Аёллар дафтари”га киритилган.

“Аёллар дафтари” киритилган аёлларни касб-ҳунарга ўқитиш мақсадида хотин-қизлар фаолининг ташаббуси билан Чойкўл овул фуқаролар йиғини биносида сават тўқиш курслари йўлга қўйилди. 20 дан ортиқ шогирдларига сават тўқишнинг сир-асрорларини ўргатиб келаётган Дилбар Гулмурзаева қизларнинг интилувчанлиги, тиришқоқлигидан мамнун.

Қизлар тўқиган саватларини катта-кичиклигига қараб 50 мингдан 100 минг сўмгача сотиб, даромад кўришмоқда.

 Хотин-қизлар фаоли иш кунлари давомида маҳалланинг фаол, ёши улуғ онахонлари билан суҳбатлашиб, маслаҳатларини олади. 5 нафар фарзандни тарбиялаб, вояга етказган, уларни уйли-жойли қилиб, оқил фарзандлар қилиб тарбиялаган Жумабой Камалов ҳамда Гулсара Камаловалар бугун фарзандларининг роҳатини кўриб, кексалик гаштини суришмоқда.

Хотин-қизлар фаоли ёш оилалар ўртасида келиб чиққан низоларни бартараф этишда Гулсара опа сингари онахонлар билан ҳамкорликда ҳаракат қилиб, ажрим ёқасига келиб қолган 9 та оилани яраштиришга муваффақ бўлди.

Хотин-қизлар фаолининг бевосита аралашуви ва ёрдами билан маҳалладги тадбиркорлик қилиш истагидаги аёлларга ҳам алоҳида эътибор ва ёрдамлар кўрсатилмоқда. Жумладан, бугунги кунда хотин-қизлар фаолининг саъй-ҳаракатлари билан ижтимоий ҳимояга муҳтож, ишсиз аёлларнинг 24 нафари ишга жойлаштирилиб, бандлиги таъминланди. “Аёллар дафтари” га киритилган 2 нафар аёлга субсидия асосида иссиқхона қуриб берилди.

Айни кунларда ушбу аёллар томорқасидаги иссиқхоналарда полиз маҳсулотларини етиштириб, даромад кўришмоқда.

Бир сўз билан айтганда, маҳалладаги хотин-қизлар фаоли Сайлихан Муратбаеванинг аёл-қизларнинг муаммоларини ҳал қилиш борасида амалга ошираётган тизимли ишларидан маҳалладошлари мамнун. Улар ҳар қандай масалада хотин-қизлар фаолига мурожаат қилишмоқда. Ўз навбатида мурожаатлар ҳам ўзининг ижобий ечимини топмоқда.

Туман ҳокимлигининг Ахборот хизмати.