"ҲОЖИ ЭШОН БОБО" ЖОМЪЕ МАСЖИДИ БИНОСИ ҚУРИЛИШИ ЖАДАЛ ОЛИБ БОРИЛМОҚДА

Мустақиллик – нафақат миллатимизнинг, балки мўъмин-мусулмонларнинг ҳам қадр-қимматини жойига қўйди. Юртдошларимиз имон-эътиқодда собит бўлишиб, тоат-ибодатларини эмин-эркин ирода этиш имконига эга бўлдилар. Бутун мамлакатимизда, хусусан, Амударё туманида ҳам мусулмонларнинг Аллоҳ олдидаги фарз ва қарз амалларини маромида, ҳеч қийинчиликларсиз адо этмоқлари учун зарур шарт-шароитлар яратилгани барчанинг қалбига хушнудлик бағишлайди.

Қипчоқ шаҳарчаси марказида жойлашган “Ҳожи Эшон бобо” жомъе масжиди биноси 1988-1989 йилларда халқ ҳашари йўли билан гувала-лойдан бунёд этилган эди. Гарчи пойдевор-пахсаси гуваладан кўтарилган бўлса-да, ўша даврдаги савобталаб инсонларнинг куч ва рағбати туфайли масжид биноси аввалги кўримсиз ҳолатидан анча яхшиланиб, намозхонлар учун бир мунча қулай шароитлар яратилгани учун масжид қавми ташаббуси ва савобга дахил инсонлар кўмаги билан 2015-2017 йилларда қайта таъмирлаш-тиклаш ишлари олиб борилди.

Ҳомийлар ёрдами билан янгидан таҳоратхона қурилди, масжиднинг том қисми шиферланди, замонавий дераза-ромлар ўрнатилиб, намозхона полланди ва намозхонларнинг ибодат қилишлари учун зарур шарт-шароитлар яратилди.

Лекин доимий равишда ўсиб бораётган аҳоли, айниқса, намозхонлар сафининг кенгайиши туфайли масжид ҳовлиси ҳам, намозхона, маданий-маиший бўлмалар ҳам бугунги давр талабига мос келмай, ибодат пайтида намозхонлар учун қийинчиликлар юзага кела бошлади. Ушбу муаммони ҳал этишнинг бирдан-бир йўли – замон талабларига мос келадиган янги масжид биносини қуриш эди.

Шу боис, “Ҳожи Эшон бобо” жомъе масжиди имом-хатиби Ражаббой Ҳабибуллаев, “Юсуф Эшон бобо” жомъе масжиди имом-хатиби Абдураҳмон Матсапаев ва Қипчоқ шаҳарчасининг ёши улуғ кексалари, шаҳарча фаоллари ҳамда фаол мусулмонлар билан бамаслаҳат янги масжид биносини қуриш ва қурилишга ҳомийлик қилиш истагида бўлган савобталаб инсонлар билан учрашиб, Ўзбекистон Мусулмонлари идораси маъмуриятига мурожаат қилди.

Ниҳоят 2021 йил 23 март санасидаги Ўзбекистон Мусулмонлари идораси раҳбариятининг 907-сонли хати билан 2021-2023 йилларда “Ҳожи Эшон бобо” жомъе масжиди биносини тўла қайта қуришга рухсат берилди.

2021 йилнинг 24 апрель санасида эса Амударё тумани ҳокими Султонбой Йўлдашевнинг 80-сонли қарори билан “Ҳожи Эшон бобо” жомъе масжиди қурилиши учун “Ҳожи Эшон бобо” қадамжоси ёнидан 80 сотих ер ажратиб берилди.

Қипчоқ шаҳарчаси халқи ва кўп сонли намозхонлар учун 2021 йилнинг 22 июль санаси катта шодиёнага айланиб кетди. Чунки айнан шу куни “Ҳожи Эшон бобо” жомъе масжиди қурилиши учун мўлжалланган майдонга рамзий қозиқ қоқилиб, шу куннинг ўзида илк тамал тоши қўйилди ва масжид қурилиши кўтаринки кайфиятда бошлаб юборилди.

Бугунги кунда масжид биносининг асосий қисми тикланиб, гумбазлари қад ростлади. Масжиднинг, умумий ер майдони 625 квадрат метр, кенглиги 25 метрга 25 метрни ташкил этади, сиғими эса 800 нафар намозхонга мўлжалланган.

Айни пайтда таҳоратхона ва қўшимча хоналарининг томлари сифатли ёпилиб, шиферлаш ишлари ниҳоясига етказилмоқда. Шунингдек, умумий майдони 400 квадрат метр бўлган 40 метрга 10 метр кенгликдаги қўшимча намозхонада ҳам қурилиш-таъмирлаш, бўяш-пардозлик ишлари кўнгилдагидек олиб борилмоқда.

Замонавий ва шарқона меъморий ечимга эга масжид биноси қурилишининг муваффақиятли тарзда амалга оширилишини таъминлаш учун қурувчиларга зарур шароит ва имконият яратиб бергани қурилишга мунтазам равишда пишиқ ғишт етказиб бераётгани учун Амударё тумани ҳокими Султонбой Йўлдашевдан қурувчилар мамнун. Шунингдек, савобталаб юртдошларимиз ҳам масжид биноси қурилишига ўзларининг муносиб ҳиссаларини қўшмоқдалар.

– Бизга амалий ёрдам кўрсатаётган барча савобталаб инсонлардан миннатдормиз, – дейди масжид имом-хатиби Ражаббой Ҳабибуллаев. – Айниқса, “Амударё қурилиш моллари” корхонаси раҳбариятига, барча ҳомийларимизга чин дилдан ташаккур изҳор этамиз.

Айни кунларда Қипчоқ шаҳарчаси ҳуснига-ҳусн бағишлаб, кун сайин гўзал қиёфа касб этаётган “Ҳожи Эшон бобо” жомъе масжиди биносида ички ва ташқи пардозлаш ишлари амалга оширилмоқда.

Робия Йўлдошева.